2 Bakalenga 24 - MUKANDA WA MYIDI MUKULU

¹ Pavua Yowakime mu bukalenga, Nebukadnesare, mukalenga wa bena Babilone, kubuela ne mvita mu ditunga dia bena Yuda. Yowakime uvua ne bua kuitaba bumfumu buende. Kadi bidimu bisatu bimane kupita, Yowakime kutombokela mukalenga Nebukadnesare.

² Pashishe, Maweja-Nangila kutumina Yowakime bena buenzayi ba bena Babilone, ba bena Arame, ba bena Mowabe ne ba bena Amone, bua banyangakaje buloba bua bena Yuda bu muvua bambi bambe mu dina dia Maweja-Nangila.

³ Maweja-Nangila uvua mutume makenga aa mu bukalenga bua bena Yuda, bualu kavua musue kumona kabidi bena bukalenga bua Yuda kumpala kuende to. Menashe uvua muenze bibi bitambe,

⁴ bualu uvua mushipe bantu bapite bungi bavua kabayi ne bualu to, muele mashi mapite bungi panshi mu Yerushalayime. Ke muvua Maweja-Nangila kayi musue kufuila bena Yuda kabidi luse to.

⁵ Malu makuabu a Yowakime, mbaafunde mu mukanda udibu babikila ne: Malu adi bakalenga ba bena Yuda benza.

⁶ Yowakime mumane kufua, muanende wa balume Yowakine kumupingana mu bukalenga.

⁷ Mukalenga wa bena Ejipitu kavua kabidi ne dikima bua kupatuka mu ditunga diende to. Bualu mukalenga wa bena Babilone uvua mumane kukuata maloba onsu avua kale ku bumfumu bua bena Ejipitu, avua pankatshi pa mukalu uvua ku mutu kua ditunga dia bena Ejipitu, too ne ku Perate, musulu wa bena Babilone.

Yowakine, mukalenga wa bena Yuda; badi bakuata bantu mu bupika musangu wa kumpala, baya nabu

⁸ Yowakine kubuela mu bukalenga, muikale ne bidimu dikumi ne muanda mukulu. Kushalaye mu bukalenga anu ngondu isatu mu Yerushalayime. Mamuende wa Yowakine uvua Nehusheta, muana wa Elnatane, wa mu Yerushalayime.

⁹ Yowakine uvua muenze malu avua Maweja-Nangila mubenge, anu bu muvua tatuende muenze.

¹⁰ Tshikondu atshi, bena mvita ba bena Babilone bavua ku diyi dia balombodi ba mukalenga Nebukadnesare, kunyungulula Yerushalayime.

¹¹ Pavuabu baluisha tshimenga atshi, Nebukadnesare kufika muaba awu.

¹² Ke mukalenga Yowakine kumuka mu tshimenga ne mamuende, balombodi ba bena mvita bende, bena mudimu bende bavua bamanyike bikole, kabidi ne bantu bonsu bavuaye mutekemene bikole. Yowakine kuya kudi mukalenga wa bena Babilone. Kadi, mukalenga wa bena Babilone kubela mu nzubu wa lukanu. Tshikondu atshi, Nebukadnesare uvua mumane kulala mu bukalenga bidimu muanda mukulu.

¹³ Nanku, Nebukadnesare kupawula bintu bia mushinga mukole bivua mu nzubu wa Mvidi Mukulu ne bivua mu nzubu wa bukalenga. Kushipaye bintu bionsu bivuabu benza ne tshiamu tshia mpawungi, bivua mukalenga Shelomu muenzeje bua kutendelela nabi mu nzubu wa Mvidi Mukulu.

¹⁴ Nebukadnesare kuya ne bena Yerushalayime, balombodi ba mu bukalenga, ne bantu bonsu bavua bamanyike bikole. Bantu bonsu bavua binunu dikumi, katuyi tubala bena midimu ya bianza, ne bansenda. Kuvua kushala mu ditunga anu bantu bapela menemene.

¹⁵ Nebukadnesare kuya ne mukalenga Yowakine, ne mamuende, bakaji ba Yowakine, kabidi ne bantu bavua mukalenga Yowakine mutekemene bikole, ne bamfumu ba bena Yuda.

¹⁶ Nanku, Nebukadnesare kuya mu ditunga dia bena Babilone ne bantu bonsu bavua bamanyike bikole. Bantu bonsu aba bavua binunu muanda mutekete. Kuyaye kabidi ne bena midimu ya bianza ne bansenda tshinunu. Bantu bonsu aba, bavua ne bukole bua kuenza mudimu wa bena mvita.

¹⁷ Pashishe, Nebukadnesare kusungula Mataniya, mansebende wa Yowakine bua kuikalaye mukalenga. Kadi, Nebukadnesare kushintulula dina dia Mataniya, kumuinyika Sedekiya.

Sedekiya, mukalenga wa bena Yuda

¹⁸ Sedekiya kudia bukalenga, muikale ne bidimu makumi abidi ne tshimue. Kushalaye mu bukalenga bidimu dikumi ne tshimue mu Yerushalayime. Mamuende wa Sedekiya uvua Amutale, muana wa Irmeya, wa mu tshimenga tshia Libna.

¹⁹ Sedekiya kuenza malu adi Maweja-Nangila mubenge, anu bu muvuabu benza kudi Yowakime.

²⁰ Maweja-Nangila pavuaye ne tshiji, uvua mutume makenga mu Yerushalayime ne mu bukalenga bua Yuda. Maweja-Nangila kubenga bantu bende, kubalekelaye. Sedekiya kutombokela Nebukadnesare, mukalenga wa bena Babilone.