2 Bakalenga 23 - MUKANDA WA MYIDI MUKULU

¹ Diakamue, mukalenga Yoshiya kubikidisha bakulu bonsu ba mu ditunga dia Yuda, ne ba mu Yerushalayime.

² Kuyabu bonsu mu nzubu wa Maweja-Nangila. Bavua baye ne bantu bonsu ba mu Yerushalayime ne ba mu ditunga dia Yuda: batuangaji, bambi, ne bantu bakuabu bonsu. Mukalenga Yoshiya kubabadila bonsu mukanda wa ndondu uvuabu bangula mu nzubu wa Mvidi Mukulu.

³ Pashishe, mukalenga kuimana pabuipi ne dikunji dia ku nzubu wa Mvidi Mukulu, kutuaye ndondu ne Maweja-Nangila tshiakabidi. Muntu yonsu kuitaba bua kulamata Maweja-Nangila, ne kukumbaja ne muoyi mujima, meyi ende, mikenji yende, ne mikandu yende, ne kuitaba kabidi, bua kukumbaja bionsu bivua mu mukanda wa ndondu. Bantu bonsu kuitaba mua kuenza nanku.

Bena Yuda badi bapingana kudi Mvidi Mukulu

⁴ Pashishe, mukalenga Yoshiya kuambila Ilkiya, mutuangaji munene, ne batuangaji bakuabu bavuaye nabu, ne batuangaji bavua balame ku mushiku wa nzubu wa Mvidi Mukulu, bua kumushabu mu muaba wa tshijila bintu bionsu bia kutendelela nabi mvidie Baale, mvidie mukaji Ashera, ne bintu bionsu bia mu tshibuashibuashi. Kumukabu ne bintu abi mu Yerushalayime. Kuyabu kubioshila mu tshibandabanda tshia Sedrone. Pashishe, kuyabu ne butu bua bintu abi mu tshimenga tshia Betele.

⁵ Yoshiya kuipata batuangaji bavua batendelela mvidie, bavua bakalenga ba bena Yuda basungula bua kulambula milambu miaba ya kutendelela mvidie ivua mu bimenga bia bena Yuda, ne ivua pabuipi ne Yerushalayime. Yoshiya uvua muipate batuangaji aba, bualu bavua balambula milambu kudi mvidie Baale, mvidie Diba, mvidie Ngondu, kudi mitotu, ne kudi bintu bikuabu bionsu bidi mu tshibuashibuashi.

⁶ Yoshiya kutuma bantu bua bajule dikunji dia mvidie mukaji Ashera, divua mu nzubu wa Mvidi Mukulu. Kumukabu nadi mu Yerushalayime, bua kuya kudioshila mu tshibandabanda tshia Sedrone. Kuoshabu dikunji adi, kudibutula. Butu buadi kubutangalajabu muaba uvua nkita ya bantu bonsu.

⁷ Yoshiya kupula nzubu ivua pabuipi ne nzubu wa Mvidi Mukulu, muaba uvua bantu bendela tshiendenda tshia kutendelela mvidie, kabidi uvua bakaji batelela bilamba bia kutendelela nabi mvidie mukaji Ashera.

⁸ Pashishe, batuangaji bonsu bavua batendelela mvidie mu bimenga bia bena Yuda, biangatshile ku Ngeba too ne ku Bersheba, Yoshiya kubatandisha mu Yerushalayime. Kunyangakajaye miaba ya kutendelela ivua batuangaji abu balambuila milambu, kupula bilambuilu bionsu bivua pabuipi ne biibi bia Yerushalayime, nangananga tshilambuilu tshivua ku tshiibi tshia Yoshuwa, mulombodi wa tshimenga. Tshilambuilu atshi, tshivua ku dia bakaji pa kubuela.

⁹ Kadi, batuangaji bavua batendelela mu miaba ayi ya kutendelela, kabavua babitabe bua kulambulabu milambu pa tshilambuilu tshia Maweja-Nangila tshivua mu Yerushalayime to. Kadi, bavua mua kudia mampa kaayi mela buanga, bu muvua batuangaji bakuabu baadia.

¹⁰ Yoshiya kunyangakaja tshioshelu tshivua ku Tofete, mu tshibandabanda tshia Inome, bua bantu kabayi kuoshilapu kabidi bana babu ba balume, nansha ba bakaji bua kulambula mulambu ku mvidie Moleke.

¹¹ Kunyangakajaye mpingu ya nyama ya tubalu ivua bakalenga ba bena Yuda bajidila bua kutendelela mvidie Diba. Mpingu ya nyama ya tubalu ayi, ivua ku luseke lua mushiku wa nzubu wa Mvidi Mukulu, mu nzubu ivua milamakaja pabuipi ne tshibambalu tshia Netane-Meleke, mulombodi wa mu nzubu wa bukalenga. Yoshiya kuoshisha matempu a mvidie Diba.

¹² Kupulaye bilambuilu bionsu bivua bakalenga ba bena Yuda bibake pa mutu pa nzubu wa Akaze. Kupulaye kabidi bilambuilu bionsu bivua Menashe muibake mu mbanza ibidi ya mu nzubu wa Mvidi Mukulu. Kunyangakajaye bilambuilu abi muaba awu. Kubimanshaye mu tshibandabanda tshivua mu Sedrone.

¹³ Yoshiya kunyangakaja miaba ya kutendelela ivua mukalenga Shelomu muibake kuinshi kua mukuna wa Olive, udi mutangilangane ne tshimenga tshia Yerushalayime. Miaba ayi, bavua batendelela Astarte, mvidie mukaji wa buenzayi wa bena Sidone, Kemoshe, mvidie muena buenzayi wa bena Mowabe, kabidi Milkome, mvidie mubi wa bena Amone.

¹⁴ Yoshiya kupula mabue avuabu bimanyika, kupula makunji a kutendelela mvidie, kubuikilaye miaba ya kutendelela mvidie ayi ne mifuba ya bantu.

Badi balongolola malu a Mvidi Mukulu mu Izrayele

¹⁵ Yoshiya kunyangakaja kabidi muaba wa kutendelela mvidie uvua ku Betele, uvua Yerobowame, muana wa Nebate, muibake bua kufikisha bena Izrayele ku dienza bibi. Yoshiya kuosha muaba uvua bantu batendelela mvidie, kupula tshilambuilu, kuosha dikunji divua bantu batendelela. Bintu bionsu abi, kubutuka, kushala anu butu.

¹⁶ Pashishe, Yoshiya ukudimuka, kumonaye nkita pa mukuna. Nanku, kutumaye bantu bua kuambula mifuba ivua mu nkita amu bua kuyoshila pa tshilambuilu, kutshinyangakaja, bu muvua muambi wa Maweja-Nangila mumane kuamba.

¹⁷ Yoshiya kukonka ne: — Dibue dindi mumone pa lukita bialua, ndia tshivulukilu tshia nganyi? Bena tshimenga kumuandamuna ne: — Ntshivulukilu tshia lukita lua muambi uvua mufume mu ditunga dia Yuda, uvua muambe bionsu biudi muenze mpindiewu ku tshilambuilu etshi.

¹⁸ Ke Yoshiya kutuma diyi, wamba ne: — Lekelayi lukita alu! Muntu kena mua kulenga mifuba ya muambi idi mu lukita elu to! Nanku, kulamabu mifuba ya muambi awu, anu bu muvuabu balame mifuba ya muambi uvua mufume mu tshimenga tshia Samariya.

¹⁹ Bakalenga ba bena Yuda bavua bafikisha Maweja-Nangila munda, bualu bavua bibake mu bimenga bia ditunga dia Samariya, miaba ya kutendelela mvidie ya bisamba bikuabu. Yoshiya kunyangakaja kabidi nzubu yonsu ayi, anu bu muvuaye muenze ku Betele.

²⁰ Nanku, batuangaji bonsu bavua balambula milambu pa bilambuilu bia kutendelela mvidie, Yoshiya kubashipela pa bilambuilu abi. Kuoshaye mifuba ya bantu pa bilambuilu abi. Pashishe, Yoshiya kupingana mu Yerushalayime.

Bena Yuda badi benza tshibilu tshia Dipita dia Maweja-Nangila

²¹ Mukalenga Yoshiya kutuma diyi, bua bantu bonsu benze tshibilu tshia Dipita dia Maweja-Nangila Mvidi Mukulu wabu, bu muvuabu bafunde mu mukanda wa ndondu.

²² Nanku, biangatshile tshikondu tshivua bena Izrayele ku bumfumu bua Balombodi too ne ku matuku onsu avua bena Izrayele ne bena Yuda bikale ne bakalenga, kabavua banji kuenza tshibilu tshia nanku tshia Dipita dia Maweja-Nangila to.

²³ Nanku, kuenzelebu Maweja-Nangila tshibilu atshi mu Yerushalayime diba adi, Yoshiya mumane kulala mu bukalenga bidimu dikumi ne muanda mukulu.

Malu a ndekelu a bukalenga bua Yoshiya

²⁴ Yoshiya kuipata bantu bonsu bavua bakonka bakishi malu ba mu Yerushalayime ne mu ditunga dia Yuda, bua kukumbaja malu, adibu bafunde mu mukanda wa mikenji, uvua Ilkiya, mutuangaji munene, muangule mu nzubu wa Mvidi Mukulu. Kunyangakajaye mpingu ne bintu bikuabu bionsu bivua bantu ba mu bisamba bikuabu batendelela.

²⁵ Mu tshikosu, Yoshiya kayi muanji kubuela mu bukalenga, kakuvua mukalenga mukuabu bu muvua Yoshiya to, uvua muitabe Maweja-Nangila muende muonsu, ne muoyi mujima, kabidi ne bukole buende bonsu, anu bu muvua mikenji ya Moshe miambe. Kabidi Yoshiya mumane kufua, kakuvua mukalenga mukuabu bu yeye to.

²⁶ Kadi, Maweja-Nangila uvua anu ufikila bukalenga bua bena Yuda munda bikole. Tshiji tshiende katshivua tshituya to. Bualu mukalenga Menashe uvua mumufikishe munda bipite.

²⁷ Ke Maweja-Nangila kuamba ne: — Bu mumvua mumane kubenga kale bua kumona bantu ba mu bukalenga bua Izrayele kumpala kuanyi, ke mundi kabidi mbenga bua kumona bantu ba mu bukalenga bua Yuda kumpala kuanyi. Ndi musue kubenga Yerushalayime, tshimenga tshimvua musungule. Ndi musue kubenga kabidi ne nzubu wa Mvidi Mukulu ewu umvua mumane kulaya bua kusombamu.

²⁸ Malu makuabu a Yoshiya, mbaafunde mu mukanda udibu babikila ne: Malu adi bakalenga ba bena Yuda benza.

²⁹ Patshivua Yoshiya mu bukalenga, Neko, mukalenga wa bena Ejipitu, uvua muye ne bena mvita bende ku musulu wa Perate bua kuambuluisha mukalenga wa bena Ashure. Mukalenga Yoshiya uvua musue kukanga njila, bua bena Ejipitu kabapitshi to. Kadi, kumushipabu ku Megido mu mvita ya kumpala.

³⁰ Balombodi ba bena mvita ba Yoshiya, kuambula tshitalu tshiende mu ditempu. Kumukabu natshi ku Megido, kuyabu mu Yerushalayime, kumujiika mu lukita luende. Pashishe, bena Yuda kusungula muanende wa balume Yowakaze. Kuinjidilabu bua apingane tatuende Yoshiya mu bukalenga.

Yowakaze, mukalenga wa bena Yuda

³¹ Yowakaze kudia bukalenga mu bena Yuda, muikale ne bidimu makumi abidi ne bisatu. Kushalaye mu bukalenga ngondu amu isatu mu Yerushalayime. Mamuende wa Yowakaze uvua Amutale, muana wa Irmeya, wa mu tshimenga tshia Libna.

³² Yowakaze kuenza malu avua bankambua bende benza, avua Maweja-Nangila mubenge.

³³ Neko, mukalenga wa bena Ejipitu kukuata Yowakaze, kuyaye nende mu tshimenga tshia Ribla, mu ditunga dia Amate. Kumulamaye mu nzubu wa lukanu. Ke muvua Neko mujikije bukalenga bua Yowakaze nanku. Tshikondu atshi, Neko kuambila bena ditunga dia Yuda bua bafute tshiamu tshitoke tshia mushinga mukole kilo binunu bisatu, ne tshiamu tshia mpawungi kilo makumi asatu.

³⁴ Pashishe, Neko kusungula Eliyakime, muana wa Yoshiya, bua apingane tatuende mu bukalenga. Neko kushintulula dina dia Eliyakime, kumuinyika dina dia Yowakime. Kadi kuyaye ne Yowakaze mu Ejipitu. Yowakaze kufuila mu Ejipitu.

³⁵ Yowakime kulambuisha bena mu bukalenga buende bitadi bua kupeta makuta avua mukalenga wa bena Ejipitu mulombe. Pavua muntu yonsu mumane kulambula tshitadi, Yowakime uvua mua kupesha Neko tshiamu tshitoke tshia mushinga mukole, ne tshiamu tshia mpawungi.

Yowakime, mukalenga wa bena Yuda

³⁶ Yowakime kudia bukalenga, muikale ne bidimu makumi abidi ne bitanu. Kushalaye mu bukalenga bidimu dikumi ne tshimue mu Yerushalayime. Mamuende wa Yowakime uvua Zebuda, muana wa Pedaya, wa mu musoku wa Ruma.

³⁷ Yowakime uvua muenze malu adi Maweja-Nangila mubenge, anu bu muvuabu benza kudi bankambua bende.