2 Bakalenga 22 - MUKANDA WA MYIDI MUKULU

Yoshiya, mukalenga wa bena Yuda

¹ Yoshiya kudia bukalenga muikale ne bidimu muanda mukulu. Kushalaye mu bukalenga bidimu makumi asatu ne tshimue, mu Yerushalayime. Mamuende wa Yoshiya uvua Yedida, muana wa Adaya, wa mu tshimenga tshia Boskate.

² Yoshiya uvua wenza malu adi Maweja-Nangila musue, anu bu muvua nkambua wende Davide muenze. Uvua ulonda tshilejilu tshiende menemene.

Mutuangaji munene udi wangula mukanda wa mikenji

³ Yoshiya mumane kulala mu bukalenga bidimu dikumi ne muanda mukulu, dituku dikuabu, kutumaye mufundi Shafane, muana wa Ashaliya, mu nzubu wa Mvidi Mukulu. Shafane uvua muikulu wa Meshulame. Yoshiya kuambila Shafane ne:

⁴ — Uye kumonangana ne Ilkiya, mutuangaji munene. Umuambile bua kubalaye makuta onsu avua bantu bafila bua kulongolola nawu nzubu wa Mvidi Mukulu, avuabu basangisha kudi batuangaji bavua balama ku mushiku wa nzubu wa Mvidi Mukulu.

^5-6 Makuta awu, baapeshe balombodi ba bena mudimu badi balongoluesha nzubu wa Mvidi Mukulu. Nanku, bobu nebafute bantu badi benza mudimu wa mabaya, bibaki, ne bena mudimu bakuabu. Nebasumbe kabidi mitshi ne mabue masonge bimpe, bua kulongolola nawu nzubu wa Mvidi Mukulu.

⁷ Kadi, bantu badi bafuta bena mudimu, kabena mua kubalondesha bua makuta adibu benza nawu mudimu to. Bualu badi benza mudimu wabu bimpe.

⁸ Shafane mumane kuambila Ilkiya, mutuangaji munene, bionsu abi, Ilkiya kumumanyisha bua mukanda wa mikenji uvuaye muangule mu nzubu wa Maweja-Nangila. Kupeshaye Shafane mukanda awu. Shafane mumane kuubala,

⁹ kuyaye kuambila mukalenge Yoshiya ne: — Batuangaji mbumushe makuta onsu mu mushete udi mu nzubu wa Mvidi Mukulu. Mbaapeshe balombodi ba bena mudimu badi balongoluesha nzubu wa Mvidi Mukulu.

¹⁰ Shafane kuamba kabidi ne: — Ilkiya, mutuangaji munene, mmumpeshe mukanda ewu. Shafane kubadila mukalenga Yoshiya mukanda awu.

Yoshiya udi utuma bantu kudi muambi mukaji Ulda

¹¹ Anu mukalenga Yoshiya umvua malu avua mu mukanda wa mikenji, kunyingalalaye bikole. Kupandaye bilamba biende.

¹² Kubikidishaye Ilkiya, mutuangaji munene. Ahikame, muana wa Shafane, Akbore, muana wa Mikaya, Shafane mufundi, ne Ashaya mulombodi wa mu bukalenga, ubambila ne:

¹³ — Nuye kukonka Maweja-Nangila, buanyi meme ne bua bena Yuda bonsu, tumanye tshitudi mua kuenza, bua malu adibu bafunda mu mukanda udibu bangula ewu. Bualu bankambua betu kabavua bakumbaja mikenji yonsu ivuabu bafundemu to. Ke padi Maweja-Nangila mutufikile munda bikole.

¹⁴ Ilkiya, mutuangaji munene, Ahikame, Akbore, Shafane, ne Ashaya, kuya kudi muambi mukaji Ulda, uvua musombele mu tshitupa tshipiatshipia tshia Yerushalayime. Bayende wa Ulda uvua Shalume, muana wa Tikva, ne muikulu wa Arase. Shalume ke uvua ulama bilamba bia tshijila bivua mu nzubu wa Mvidi Mukulu. Bantu abu, kuambila muambi mukaji Ulda malu onsu awu.

¹⁵ Ke Ulda kubatuma bua baye kuambila mukalenga Yoshiya ne:

¹⁶ “Maweja-Nangila Mvidi Mukulu wa bena Izrayele udi wamba ne: ‘Nennyoke tshimenga tshia Yerushalayime ne bantu bonsu badimu, anu bu mudibu bafunde mu mukanda uvua mukalenga wa bena Yuda mubale.

¹⁷ Bena mu Yerushalayime mbambenge, mbalambule milambu kudi mvidie mikuabu. Bionsu bidibu benza mbimfikishe munda. Ke pandi mufikile tshimenga etshi munda bikole. Tshiji tshianyi katshiena tshijika mpindiewu to.

¹⁸ Kadi, mukalenga Yoshiya mmunutume bua kunkonka, numuambile ne: meme Maweja-Nangila Mvidi Mukulu wa bena Izrayele ndi ngamba ne: Wewe Yoshiya uvua mumvue malu onsu adi mu mukanda awu.

¹⁹ Uvua muteleje bimpe tshindi muambe bua Yerushalayime ne bantu bonsu badimu. Dikenga diabu nedikale dikole. Bantu nebikale baditshipa, batele mena a bena tshimenga atshi. Kadi wewe Yoshiya, uvua mulombe luse, uvua muvuluke bubi buebe kumpala kuanyi, uvua mupanda bilamba biebe, mudile muadi. Nanku, meme Maweja-Nangila ndi nkujadikila ne: ndi mumvue dilomba diebe.

²⁰ Kuakumona makenga onsu aa to. Neufue anu bimpe. Nebakujiike mu Yerushalayime.’ ” Ilkiya mutuangaji munene, ne bantu bavuaye nabu, kuyabu kuambila mukalenga Yoshiya bionsu abi.