2 Bakalenga 21 - MUKANDA WA MYIDI MUKULU

Menashe, mukalenga wa bena Yuda

¹ Menashe kudia bukalenga, muikale ne bidimu dikumi ne bibidi. Kushalaye mu bukalenga bidimu makumi atanu ne bitanu mu Yerushalayime. Dina dia mamuende divua Efsi-Ba.

² Menashe kuenza malu avua Maweja-Nangila mubenge, kuenza ne malu mabi onsu a bantu ba bisamba bikuabu, bavua Maweja-Nangila muipate bua kushilabu bena Izrayele ditunga.

³ Kulongololaye ne miaba ya kutendelela mvidie ivuabu banyangakaje kudi tatuende Izkiya. Kuibakaye mvidie Baale bilambuilu. Kuenzaye dikunji dia kutendelela, bu muvuabu benza kale kudi Akabe, mukalenga wa bena Izrayele. Kabidi kutendelelaye bintu bia mu tshibuashibuashi.

⁴ Kuenzaye bilambuilu bikuabu, bia bantu benyi mu nzubu wa Mvidi Mukulu, wa mu Yerushalayime. Maweja-Nangila uvua mumane kuamba bua nzubu awu ne: “Meme Maweja-Nangila nensombe mu nzubu ewu.”

⁵ Pashishe, bintu bia mu tshibuashibuashi, Menashe kubashila bilambuilu mu mbanza ibidi ya ku nzubu wa Mvidi Mukulu.

⁶ Kufikaye ne ku dilambula muanende wa balume bu mulambu wa kuosha. Kuenzaye majimbu a mishindu mishilangane, kubukaye lubuku lua muzangu. Nanku, Menashe uvua wenza anu malu adi Maweja-Nangila mubenge, umufikisha munda.

⁷ Uvua muenze kabidi lupingu lua mvidie mukaji, Ashera, mubiteke mu nzubu wa Mvidi Mukulu. Kadi, Maweja-Nangila uvua muambile Davide ne muanende wa balume Shelomu ne: “Nzubu ewu udi mu Yerushalayime, tshimenga tshindi mumane kusungula ku bimenga bionsu bidi mu bisamba dikumi ne bibidi bia bena Izrayele, ke muaba undi nsomba kashidi munkatshi mua bantu.

⁸ Pikala bena Izrayele bakumbaje meyi anyi ne mikenji yanyi, bivuabu babapesha kudi muntu wanyi Moshe, nanku tshiena mbumusha mu ditunga dimvua mumane kupesha bankambua babu to, bua balalakane miaba mile.”

⁹ Kadi, bena Yuda kabena batumikila Maweja-Nangila to. Menashe ke uvua mubafikishe ku dienza bibi bipite bia bantu, bavua kale mu ditunga adi, bavua Maweja-Nangila muipate bua kushilabu bena Izrayele ditunga.

¹⁰ Pashishe, Maweja-Nangila kutuma bambi, bantu bende ne:

¹¹ “Mukalenga Menashe mmuenze malu mabi a mishindu yonsu, mmupite ne bena Amore ku buenzayi. Kabidi mmufikishe ne bena Yuda ku ditendelela mvidie.

¹² Nanku Maweja-Nangila Mvidi Mukulu wa bena Izrayele udi wamba ne: ‘Nennyoke bena Yerushalayime ne bena Yuda bonsu bikole. Muntu yonsu umvua lumu lua dikenga diabu, neunwue bibi bitambe.

¹³ Nembutule Yerushalayime, bu mumvua mubutule Samariya ne bena diku dia Akabe. Meme nenshiye Yerushalayime munda mutupu, anu bu mudibu basukula dilonga, pashishe, badibuikija.

¹⁴ Bantu bena Izrayele bikale bashale, tshiakuikala nabu ne bualu to. Nembafile ku bumfumu bua baluishi babu. Baluishi abu, nebapawule bintu bionsu bia bena ditunga diabu.

¹⁵ Nengenze bionsu ebi, bualu biangatshile dituku dindi mupatule bankambua babu mu Ejipitu too ne mpindiewu, bantu banyi badi anu banufikisha munda, benza malu andi mubenge!’ ”

¹⁶ Mukalenga Menashe uvua mushipe bantu bapite bungi, bavua kabayi ne bualu to. Tshimenga tshia Yerushalayime tshijima, tshivua ne mashi mapite bungi. Bubi ebu, badi babusangisha kabidi ku buenzayi bonsu budi Menashe muenze, bua kufikisha bena Yuda ku dienza malu adi Maweja-Nangila mubenge.

¹⁷ Malu makuabu a Menashe, mbaafunde mu mukanda udibu babikila ne: Malu adi bakalenga ba bena Yuda benza. Mu mukanda emu, mbafundemu malu onsu adi Menashe muenze ne mushindu uvuaye wenza buenzayi.

¹⁸ Menashe mumane kufua, kumujiikabu mu lupangu luvua ku nzubu wa bukalenga, luvuabu babikila ne: “Lupangu lua Uza”. Muanende wa balume Amone kumupingana mu bukalenga.

Amone, mukalenga wa bena Yuda

¹⁹ Amone kudia bukalenga muikale ne bidimu makumi abidi ne bibidi. Kushalaye mu bukalenga bidimu bibidi mu Yerushalayime. Mamuende wa Amone uvua Meshulemete, muana wa Aruse, wa mu tshimenga tshia Yotba.

²⁰ Amone uvua muenze malu mabi adi Maweja-Nangila mubenge, bu muvua tatuende Menashe muenze.

²¹ Uvua muenze buenzayi anu bu tatuende Menashe. Uvua utendelela mvidie bu muvua tatuende utendelela.

²² Amone kavua wenza malu adi Maweja-Nangila musue to. Uvua mubenge Maweja-Nangila Mvidi Mukulu wa bankambua bende.

²³ Balombodi ba bena mvita ba mukalenga Amone, kumuelela tshifufu tshibi, kumushipela mu nzubu wende wa bukalenga.

²⁴ Kadi, bena Yuda kushipa bantu bavua belele Amone tshifufu abu. Kusungulabu muanende wa balume Yoshiya bua kupinganaye tatuende Amone mu bukalenga.

²⁵ Malu makuabu a Amone, mbaafunde mu mukanda udibu babikila ne: Malu adi bakalenga ba bena Yuda benza.

²⁶ Kumujiikabu mu lukita luende luvua mu: “Lupangu lua Uza.” Nanku, muanende wa balume Yoshiya, kumupingana mu bukalenga.