2 Bakalenga 18 - MUKANDA WA MYIDI MUKULU

Izkiya, mukalenga wa bena Yuda

¹ Osheya, muana wa Ela, mumane kulala mu bukalenga bua Izrayele bidimu bisatu, Izkiya, muana wa Akaze kudia bukalenga mu Yuda,

² muikale ne bidimu makumi abidi ne bitanu. Kushalaye mu bukalenga bidimu makumi abidi ne tshitema mu Yerushalayime. Mamuende wa Izkiya uvua Abi, muana wa Zekarya.

³ Izkiya uvua wenza malu adi Maweja-Nangila musue, anu bu muvua nkambua wende Davide muenze.

⁴ Izkiya ke uvua mukandike miaba ya kutendelela mvidie, mupule bibumba bia mabue, mupule kabidi ne makunji a kutendelela. Uvua nuukosolole nyoka wa tshiamu tshikunze, uvua Moshe muenze. Bualu too ne ku tshikondu atshi, bena Izrayele batshi wa anu balambula milambu ya manananshi ku nyoka awu, uvuabu babikila ne: Nehuktane.

⁵ Izkiya uvua mudifile kudi Maweja-Nangila Mvidi Mukulu wa bena Izrayele, mupite bakalenga bonsu ba Yuda, bavua bamudianjidila mu bukalenga, ne bavua bamulonda panyima.

⁶ Uvua muitabe anu Maweja-Nangila, kayi umulekela nansha kakese to. Uvua utumikila bimpe mikenji ivua Maweja-Nangila mupeshe Moshe.

⁷ Maweja-Nangila uvua wambuluisha Izkiya. Izkiya uvua ne diakalenga mu bionsu bivuaye wenza. Izkiya kutombokela mukalenga wa bena Ashure, kubenga mua kushala ku bumfumu buende.

⁸ Kabidi Izkiya kutshimuna bena Peleshete. Kubalondakajilaye too ne mu buloba bua Ngaza. Kukuataye bimenga bivua bibaka ne bimana bikole, kukuata kabidi ne misoku mikese ivua ne batentekedi.

Bena Ashure badi bakuata Samariya

⁹ Izkiya mumane kulala mu bukalenga bidimu binayi, kabidi Osheya, muana wa Ela, mulale mu bukalenga bua Izrayele bidimu muanda mutekete, Shalmanazere, mukalenga wa bena Ashure, kunyungulula tshimenga tshia Samariya.

¹⁰ Bidimu bisatu bimane kupita, mmumue ne: Izkiya mulale mu bukalenga bidimu bisambombu, Osheya mulale mu bukalenga bidimu tshitema, kukuatabu tshimenga.

¹¹ Mukalenga wa bena Ashure kukuata bena Izrayele, kuya nabu ku Ashure, kubapeshaye miaba ya kuasa mu buloba bua Ala, bua Ngozane, ne muaba uvua musulu wa Abore, ne mu bimenga bia Madayi.

¹² Bionsu ebi, biakuenzeka bualu bena Izrayele kabavua batumikila diyi dia Maweja-Nangila Mvidi Mukulu wabu to. Kabidi bavua bashipe ndondu wende. Bavua babenga kuteleja mikenji yende, ne kukumbaja bionsu bivua Moshe, muntu wa Maweja-Nangila, mubambile.

Senakeribe udi ubuela ne mvita mu Yuda

¹³ Izkiya mumane kulala mu bukalenga bidimu dikumi ne binayi, Senakeribe, mukalenga wa bena Ashure, kuluisha bimenga bionsu bia Yuda bivua ne bimana bikole, kubikuata.

¹⁴ Pashishe, Izkiya, mukalenga wa Yuda kutuma mukenji kudi mukalenga wa bena Ashure uvua mu tshimenga tshia Lakishe, umuambila ne: — Meme ndi muenze bibi! Lekela kunduisha muaba ewu. Ndi muitabe bua kufuta mushinga onsu uudi undomba. Mukalenga wa bena Ashure kulomba Izkiya tshiamu tshitoke tshia mushinga mukole kilo binunu tshitema, ne tshiamu tshia mpawungi kilo nkama tshitema.

¹⁵ Izkiya kuangata tshiamu tshitoke tshia mushinga mukole tshionsu tshivua mu nzubu wa Mvidi Mukulu, ne tshivua mu tshibambalu tshia ku nzubu wa bukalenga.

¹⁶ Bua amone mua kulambula mpawungi uvua mumushe tshiamu tshia mpawungi tshivuaye mulamike kale ku biibi bia ku nzubu wa Mvidi Mukulu ne ku mabaya avua ku nseke yatshi. Kupeshaye mukalenga wa bena Ashure bintu bionsu abi.

Diyuki dia mulombodi wa bena mvita muambuluishi wa Senakeribe

¹⁷ Pavua mukalenga wa bena Ashure mu Lakishe, kutumaye mfumu mulombodi wa bena mvita, mutangidi wa bena midimu ba mu nzubu wa bukalenga, ne mulombodi wa badi bela maluvu, mu Yerushalayime kudi mukalenga Izkiya. Bavua ne musumba munene wa bena mvita. Bobu bamane kufika mu tshimenga, kuimanabu pabuipi ne tshiina tshia mayi tshivua kulu, mu njila udi muye ku budimi bua Enrojele.

¹⁸ Kulombabu bua kuyukila ne mukalenga Izkiya. Kadi, mulombodi wa mu nzubu wa bukalenga Elyakime, muana wa Ilkiya, kupatuka mu tshimenga bua kumonangana nabu. Elyakime bavua ne Shebna mufundi, kabidi ne Yowa, muana wa Ashafe, mufikishi wa malu a mu bukalenga kudi bantu.

¹⁹ Mulombodi wa beledi ba mukalenga maluvu, kubambila ne: — Nuye kuambila Izkiya ne: mukalenga munene, mukalenga wa bena Ashure, udi ukonka ne: “Tshidi tshikuleja ne: udi mua kutshimuna ntshinyi?

²⁰ Udi wela meji ne: paudi wakula ufuna bua mvita, udi ne bukole ne meji a mua kuluangana. Paudi mutomboke apu, udi mutekemene nganyi bua kukuambuluisha?

²¹ Udi mutekemene kudi bena Ejipitu anyi? Bena Ejipitu badi anu bu tshikolu tshia dibue tshimane kutshibuka, padi muntu ushindamenapu, tshidi tshimutua mu tshianza. Ke mudi mukalenga wa bena Ejipitu wenzela bantu bonsu badi batekemena kudiye.

²² “Bulelela nenungandamune ne: tudi batekemena kudi Maweja-Nangila Mvidi Mukulu wetu. Kadi, wewe Izkiya ke uvua munyangakaje miaba yonsu ya kumutendelela, ne bilambuilu biende bionsu bivuapu. Uvua mukandike bena Yerushalayime ne bena Yuda bua kabatendeledi muaba mukuabu to, anu kumpala kua tshilambuilu tshidi mu Yerushalayime.

²³ “Nanku, numvuangane ne mfumuanyi, mukalenga wa bena Ashure. Meme ndi mua kunupesha nyama ya tubalu binunu bibidi, panuikala mua kupeta bantu badi mua kubandapu.

²⁴ Kadi, wewe kuena mua kunyemesha mulombodi wa bena mvita ba mfumuanyi nansha umue, nansha yeye kayi mumanye mvita to. Wewe udi mutekemene anu kudi bena Ejipitu bua kumupeshabu matempu a mvita ne nyama ya tubalu!

²⁵ Kabidi, mfumuanyi uvua mua kuluisha ditunga edi, kudinyangakaja, Maweja-Nangila kayi muanyishe anyi? Nansha kakese! Anu Maweja-Nangila nkayende, ke uvua mutume diyi bua mfumuanyi kudinyangakaja.

²⁶ Ke Elyakime, muana wa Ilkiya, Shebna, ne Yowa, kuambila mulombodi wa beledi ba mukalenga wa bena Ashure maluvu ne: — Bu wewe musue, tuyukile nebe mu muakulu wa bena Arame, bualu tudi baumanye. Lekela kuakula netu mu muakulu wa bena Ebrewu, bualu bantu bonsu badi ku bimana badi anu batuteleja.

²⁷ Kadi, mulombodi wa beledi ba mukalenga maluvu, kuandamuna ne: — Nudi nuela meji ne: malu adi mukalenga wanyi mutume bua kuamba, tudi mua kunuambila anu muenu ne mukalenga wenu anyi? Malu aa, tudi mua kuambila kabidi bantu bonsu badi ku bimana aba. Bualu bantu aba ne nuenu, nenudie tumvi tuenu, kabidi nenunue menyi enu anu mutantshi mukese ewu.

²⁸ Pashishe, mulombodi awu, kuimana kulu wela mbila bikole mu muakulu wa bena Ebrewu, wamba ne: — Telejayi tshidi mukalenga munene, mukalenga wa bena Ashure, wamba:

²⁹ “Izkiya kena mua kunushima to. Kena mua kunusungidila ku bianza bianyi.

³⁰ Udi unuambila ne: mbimpe kudifila anu kudi Maweja-Nangila. Yeye neatusungidile bulelela. Kabidi yeye neakandike mukalenga wa bena Ashure bua kakuatshi tshimenga atshi! Kanuitabi bionsu abi to.

³¹ Kanuena mua kuteleja tshidi Izkiya unuambila to. Nuteleje anu tshindi nnuambila meme mukalenga wa bena Ashure. Lekelayi kukandamana! Anyishayi nudifile kundi. Nanku, muntu yonsu wa kunudi neanue maluvu ende, neadie tumuma tuende tua mfiku, kabidi neanue mayi ende adi mu tshiina.

³² Pashishe, nemfike bua kunuangata, kuya nenu mu ditunga didi bu mudi dienu edi, ditunga didi ne ntete ya kuenza bukula bua mampa mipite bungi. Didi kabidi ne mionji ya maluvu a mvinyo, mitshi ya olive ya kuenza mafuta, kabidi ne buitshi. Nanku, pa mutu pa nuenu kufua muaba ewu, nuenu baye kuaka, nenuikale ne muoyi. Kanuteleji tshidi Izkiya unuambila to. Bualu udi unushima, padiye unuambila ne: Maweja-Nangila neatusungidile.

³³ Mvidie ya bantu ba bisamba bikuabu, kayivua munkandike bua meme kukuata ditunga diabu to.

³⁴ Mvidie wa tshimenga tshia Amate ne tshia Arpade, ivua mingenzele tshinyi? Nansha mvidie ya tshimenga tshia Sefarvayime, tshia Ena, ne tshia Ava? Mvidie nansha umue kavua munkandike bua meme kukuata tshimenga tshia Samariya to.

³⁵ Ku mvidie yonsu eyi, kakuena nansha umue uvua munkandike bua meme kukuata ditunga diende to. Kadi, Maweja-Nangila neankandike bua meme kukuata Yerushalayime mushindu kaayi?”

³⁶ Bantu bonsu bavua muaba awu, bavua anu bapuwa. Kabavua bandamuna to, bualu ke muvua mukalenga Izkiya mumane kubambila.

³⁷ Pashishe, Elyakime, muana wa Ilkiya, uvua mulombodi wa nzubu wa bukalenga, Shebna mufundi, ne Yowa, muana wa Ashafe, mufikishi wa malu a mu bukalenga kudi bantu, kupanda bilamba biabu, kupingana kudi mukalenga Izkiya. Kumuambilabu bionsu bivuabu bambe kudi mulombodi wa beledi ba mukalenga wa bena Ashure maluvu.