2 Bakalenga 13 - MUKANDA WA MYIDI MUKULU

Yowakaze, mukalenga wa bena Izrayele

¹ Yowashe, muana wa Akaziya, mumane kulala mu bukalenga bua Yuda bidimu makumi abidi ne bisatu, Yowakaze, muana wa Yehu, kudia bukalenga mu Izrayele, mu Samariya. Kushalaye mu bukalenga bidimu dikumi ne muanda mutekete.

² Kadi, Yowakaze uvua muenze malu adi Maweja-Nangila ubenga. Uvua muenze anu buenzayi bu Yerobowame, muana wa Nebate, uvua mufikishe bena Izrayele ku dienza bibi.

³ Nanku, Maweja-Nangila kufikila bena Izrayele munda. Kubafilaye mu bianza bia Azayele, mukalenga wa bena Siriya, ne mu bianza bia Benadade, muana wa Azayele, matuku onsu avua bantu abu mu bukalenga.

⁴ Kadi, Yowakaze kusengelela Maweja-Nangila, Maweja-Nangila kumuitaba. Maweja-Nangila mumane kumona muvua mukalenga wa bena Siriya ukengesha bena Izrayele,

⁵ kutuminaye bena Izrayele muntu uvua mua kubasungidila mu bianza bia bena Siriya. Biangatshile tshikondu atshi, bena Izrayele kusomba ne ditalala, bu muvuabu basombe bangabanga.

⁶ Kadi, bena Izrayele bavua anu benza buenzayi, bu Yerobowame ne bena nzubu wende. Bualu Yerobowame uvua mufikishe bena Izrayele ku dienza bibi. Nansha dikunji dia kutendelela Ashera, mvidie mukaji, divua anu dishale dimanyike mu Samariya.

⁷ Ku ndekelu, bena mvita ba mukalenga Yowakaze bavua babande pa nyama ya tubalu, bavua bashale anu makumi atanu, matempu a mvita anu dikumi. Bena mvita bavua benda ku makasa bavua bashale anu binunu dikumi. Bualu mukalenga wa bena Siriya uvua mushipe bena mvita ba mukalenga Yowakaze bapite bungi. Uvua mubabutule bonsu, bu mudibu badiata lupuishi mu njila.

⁸ Malu makuabu a Yowakaze, mbaafunde mu mukanda udibu babikila ne: Malu adi bakalenga ba bena Izrayele benza. Mu mukanda amu, mbafundemu malu onsu avua Yowakaze muenze, baleja kabidi ne bukitu buvuaye nabu.

⁹ Yowakaze mumane kufua, kumujiikabu mu Samariya. Muanende wa balume Yowashe, kumupingana mu bukalenga.

Yowashe, mukalenga wa bena Izrayele

¹⁰ Yowashe, muana wa Akaziya, mumane kulala mu bukalenga bua bena Yuda bidimu makumi asatu ne muanda mutekete, Yowashe, muana wa Yowakaze kudia bukalenga bua Izrayele, mu Samariya. Kushalayemu bidimu dikumi ne bisambombu.

¹¹ Kadi, Yowashe, muana wa Yowakaze, uvua wenza malu adi Maweja-Nangila ubenga. Uvua anu wenza buenzayi buonsu bu Yerobowame, muana wa Nebate. Yerobowame uvua mufikishe bena Izrayele ku dienza bibi.

¹² Malu makuabu a Yowashe, muana wa Yowakaze, mbaafunde mu mukanda udibu babikila ne: Malu adi bakalenga ba bena Izrayele benza. Mu mukanda amu, mbafundemu malu onsu avua Yowashe muenze, baleja ne bukitu buvuaye nabu, pavuaye uluisha Amashiya, mukalenga wa bena Yuda.

¹³ Yowashe mumane kufua, kumujiikabu mu Samariya mu lukita lua bakalenga ba bena Izrayele. Nanku, muanende wa balume Yerobowame, kumupingana mu bukalenga.

Muambi Elisha udi umanyisha bena Izrayele ne: nenutshimune bena Siriya

¹⁴ Disama dia lufu kukuata muambi Elisha. Nanku, Yowashe, mukalenga wa bena Izrayele, kuya kudi muambi Elisha, kumupukila, udila, wamba ne: — Tatu wanyi! Tatu wanyi! Wewe udi mupite matempu a mvita ne babandi ba pa nyama ya tubalu bonsu ba bena Izrayele!

¹⁵ Elisha kumuambila ne: — Uye kuangata buta bua miketa ne miketa. Mukalenga Yowashe kufika ne bintu abi.

^16-17 Muambi Elisha kumuambila ne: — Unzulula dididishi luseke ludi diba dipatukila. Mukalenga Yowashe kunzulula. Muambi kumuambila kabidi ne: — Ambule buta buebe ne miketa, unane. Mukalenga Yowashe kuambula buta. Elisha kutentakaja bianza biende pa bianza bia mukalenga Yowashe. Pashishe, kutumaye diyi bua mukalenga ele muketa. Anu mukalenga Yowashe wela muketa, muambi kuela diyi, wamba ne: — Muketa awu, mbua kumanyisha bena Izrayele ne: Maweja-Nangila neanupe bukole bua nuenu kutshimuna bena mvita ba bena Siriya. Eyowa, neutshimune bena Siriya mu tshimenga tshia Afeke Neubabutule.

¹⁸ Pashishe, Elisha kuambila mukalenga Yowashe ne: — Ambule miketa mikuabu. Mukalenga Yowashe kuyambula. Muambi kumuambila ne: — Tuuta ne miketa ayi panshi. Mukalenga Yowashe kutuuta miketa ayi panshi misangu isatu, kulekela.

¹⁹ Muambi kufika munda, wambila mukalenga ne: — Bu wewe mutuute miketa ayi panshi misangu itanu nansha isambombu, uvua mua kutshimuna bena Siriya kashidi. Kadi mpindiewu, neubatshimune anu misangu isatu.

²⁰ Elisha kufua. Kumujiikabu. Ku tshidimu tshionsu, bivi ba bena Mowabe bavua babuela mu buloba bua bena Izrayele bua kupawula bintu.

²¹ Dituku dikuabu, bantu bavua baya kujiika tshitalu. Diakamue, kumonabu bivi abu. Kuimanshabu tshitalu tshivuabu natshi mu lukita lua Elisha, kunyemabu. Anu tshitalu atshi tshilengangane ne mifuba ya muambi Elisha, muntu mufue kufululuka, kuimana kulu.

Bena Izrayele badi batshimuna bena Siriya

²² Azayele, mukalenga wa bena Siriya, uvua mukengeshe bena Izrayele bikole, matuku onsu avua Yowakaze mu bukalenga.

²³ Kadi, pashishe Maweja-Nangila kufuila bena Izrayele luse, kulekela bubi buabu, bua ndondu uvuaye mutue ne Abrahame, Izake ne Yakobe. Nanku, Maweja-Nangila kena mubutule bena Izrayele to. Kavua muanji kubatuma kule mu bupika to.

²⁴ Azayele mumane kufua, muanende wa balume Benadade kumupingana mu bukalenga bua bena Siriya.

²⁵ Diakamue, Yowashe kunyenga Benadade bimenga bionsu bia bena Izrayele, bivua Azayele munyenge tatuende Yowakaze. Yowashe kutshimuna Benadade misangu isatu milondangane. Kunyengaye bimenga biende abi bionsu.