2 Bakalenga 12 - MUKANDA WA MYIDI MUKULU

Yowashe, mukalenga wa bena Yuda

^1-2 Yehu mumane kulala mu bukalenga bua bena Izrayele bidimu muanda mutekete. Yowashe mutshikale ne bidimu muanda mutekete, kudiaye bukalenga bua Yuda. Kushalaye mu bukalenga mu Yerushalayime bidimu makumi anayi. Mamuende wa Yowashe uvua wa mu tshimenga tshia Bersheba, dina diende Sibiya.

³ Yowashe uvua wenza malu mimpe, usankisha Maweja-Nangila matuku onsu. Bualu mutuangaji Yoyada uvua mumulongeshe bimpe.

⁴ Kadi, kavua munyangakaje miaba ya kutendelela mvidie to. Bantu bavua anu baya miaba ayi bua kulambula milambu ya nyama ne ya manananshi.

Yowashe udi ulongoluesha nzubu wa Mvidi Mukulu

^5-6 Dituku dikuabu, Yowashe kuambila batuangaji ne: — Nusangishe makuta onsu adi bantu bafila bua milambu, nansha adibu bafila ku budisuile buabu. Nuenu batuangaji nusangishe makuta awu, nuenze nawu mudimu wa kulongolola nzubu wa Mvidi Mukulu, muaba onsu unudi bamona ne udi munyanguke.

⁷ Kadi, mu tshidimu tshia makumi abidi ne tshisatu tshivua Yowashe mu bukalenga, batuangaji kabavua banji kulongolola tshintu nansha tshimue mu nzubu wa Mvidi Mukulu to.

⁸ Nanku, mukalenga Yowashe, kubikidisha mutuangaji Yoyada ne batuangaji bakuabu, kubakonka ne: — Kanuena balongolueshe nzubu wa Mvidi Mukulu bua tshinyi? Nanku mpindiewu kanulami kabidi makuta adibu basangisha to. Nuanyishe bua balongolueshe nawu nzubu wa Mvidi Mukulu.

⁹ Ke batuangaji kuitaba. Kabavua basangisha kabidi makuta kudi bantu to. Kabavua batangila kabidi midimu ya kulongoluesha nzubu wa Mvidi Mukulu to.

¹⁰ Mutuangaji Yoyada kusumba mushete, kuenza dikela pa tshibuikidiji tshia mushete awu. Kuutekaye ku luseke lua tshilambuilu, ku dia balume dia mushiku wa nzubu wa Mvidi Mukulu. Makuta onsu avuabu bafika nawu mu nzubu wa Mvidi Mukulu, batuangaji bavua balame ku mushiku wa nzubu awu, bavua ne mudimu wa kuela mu mushete.

¹¹ Pavua batuangaji bamone ne: makuta awu adi a bungi mu mushete, bavua babikila mufundi wa malu a mukalenga ne mfumu wa batuangaji, bua babale makuta awu, baye nawu.

¹² Bobu bamane kubala makuta awu, bavua baapesha balombodi ba bibaki ba nzubu ne bantu bavua batangila midimu ayi. Ke mu wabu mua kufuta bantu bavua balongolola nzubu wa Mvidi Mukulu, bena mudimu wa mabaya,

¹³ bibaki, ne basongi ba mabue. Makuta awu, batangidi ba midimu ayi, bavua basumba nawu kabidi mabaya ne mabue masonge. Nanku bavua baatula anu bua midimu ya kulongolola nzubu wa Mvidi Mukulu.

¹⁴ Makuta avuabu bafila mu nzubu wa Mvidi Mukulu awu, kabavua baatula bua kuenzeja nawu malongu, bintu bia kusukula nabi miendu, nansha makopu a kumiamina nawu, mpungi, ne bintu bikuabu bia tshiamu tshia mpawungi, nansha bia tshiamu tshitoke tshia mushinga mukole to.

¹⁵ Bavua bafila makuta awu onsu kudi balombodi ba bibaki ba nzubu, anu bua bamone mua kulongolola miaba ivua minyanguke.

¹⁶ Bantu bavua bafuta bena mudimu, bavua benza mudimu awu bimpe. Nanku kabavua babalondesha bua makuta avuabu bangata bua kufuta bena mudimu to.

¹⁷ Makuta avua bantu bakuabu bafila bua mulambu wa kukobolola, kabavua baela mu mushete to. Bavua baangata kudi batuangaji.

Ndekelu wa bukalenga bua Yowashe

¹⁸ Tshikondu atshi, Azayele, mukalenga wa bena Siriya, kufika bua kuluisha tshimenga tshia Ngate. Yeye mumane kutshikuata, kudilongololaye bua kuluisha Yerushalayime.

¹⁹ Diakamue, Yowashe mukalenga wa bena Yuda, kusangisha bintu bia mushinga mukole bionsu bivuabu balambula Maweja-Nangila kudi bankambua bende, bakalenga ba bena Yuda: Yosafate, Yorame, Akaziya, kabidi ne bivuaye mulambule yeye. Kusangishaye ne tshiamu tshia mpawungi tshionsu tshivuabu bateka mu tshibambalu tshia ku nzubu wa Mvidi Mukulu, ne mu tshibambalu tshia kutekela bintu mu nzubu wa bukalenga. Kutuminaye mukalenga Azayele bintu abi, bua kumusankisha. Nanku, mukalenga Azayele mmulekele kuluisha Yerushalayime.

²⁰ Malu makuabu a mukalenga Yowashe, mbaafunde mu mukanda udibu babikila ne: Malu adi bakalenga ba bena Yuda benza.

^21-22 Balombodi ba bena mvita ba Yowashe, kumuelela tshifufu. Balombodi babidi ba munkatshi muabu: Yozabade, muana wa Shimeyi, ne Yehozabade, muana wa Shomere, kushipabu Yowashe ku Bete-Milo. Kumujiikabu mu lukita lua bena diku diabu, luvua mu Tshimenga tshia Davide. Muanende wa balume Amashiya kumupingana mu bukalenga.