2 Bakalenga 10 - MUKANDA WA MYIDI MUKULU

Yehu udi ushipa bena nzubu wa Akabe

¹ Ndelanganyi ya Akabe makumi muanda mutekete, ivua isomba mu Samariya. Yehu kutumina balombodi ba bena mvita ba mu tshimenga atshi, bakulu batshi, ne bantu bavua balongesha ndelanganyi ya Akabe mikanda, ubafundila ne:

² “Nuenu badi ne bana ba mu diku dia bukalenga. Nudi ne matempu a mvita, nyama ya tubalu, ne bia mvita. Nudi mu tshimenga tshidibu bibaka ne bimana bikole. Nanku, panudi nupeta mukanda ewu,

³ nusungule diakamue ku ndelanganyi ya mukalenga Akabe, muntu udi ukumbana bua kuikala mukalenga. Numubanjije, asombe mu nkuasa wa bukalenga. Kabidi nudilongolole bua kuluangana mvita, kusungidila diku dia bukalenga.”

⁴ Bantu bonsu abu kukuatshika bowa bikole. Kukonkanganabu ne: “Tuetu tudi mua kuluangana ne Yehu mushindu kaayi? Bakalenga babidi kabena bakimina kuluangana nende to.”

⁵ Diakamue, mulombodi wa nzubu wa bukalenga, mulombodi wa bena mvita ba tshimenga atshi, bakulu ne balongeshi, kutumina Yehu mukanda ne: “Tuetu tudi bena mudimu bebe. Netuenze bionsu biudi wamba. Katuena basue kusungula mukalenga mukuabu mupiamupia to. Nanku, enza muudi musue.”

⁶ Yehu kubafundila mukanda muibidi, ubambila ne: “Panudi ku luseke luanyi, basue kutumikila meyi anyi, nushipe ndelanganyi ya mukalenga Akabe yonsu. Nuyikose mitu. Malaba diba ditudi edi, nufike bua kumpesha mitu ayi mu tshimenga tshia Yizreyele.” Ndelanganyi ayi makumi muanda mutekete ya mu diku dia bukalenga, bavua bayikolesha kudi bantu bamanyike ba mu Samariya.

⁷ Balombodi bapeta mukanda uvua Yehu mubatumine, kutandishabu ndelanganyi ya mukalenga Akabe yonsu makumi muanda mutekete, kuyishipa. Kuelabu mitu yabu mu bibombu, kutumina Yehu mitu ayi mu Yizreyele.

⁸ Muntu mukuabu kuya kumanyisha Yehu bua mitu ivuabu bafike nayi ayi. Yehu kutuma diyi bua bayiteke mu bisumbu bibidi pabuipi ne tshiibi tshia ku tshimenga too ne ku dinda.

⁹ Butshia, dinda, Yehu kupatuka mu tshimenga, kuimana muaba uvua bantu bonsu. Kubambilaye ne: — Nuenu kanuena ne bualu to! Meme ke uvua muelele mukalenga Yorame tshifufu. Meme ke udi mumushipe. Kadi, bantu bonsu aba, udi mubashipe nnganyi?

¹⁰ Nujadike ne: meyi onsu avua Maweja-Nangila muambe bua bena nzubu wa Akabe, adi anu akumbana! Maweja-Nangila ke udi mukumbaje bionsu bivua muambi Eliya muambe mu dina diende.

¹¹ Ke Yehu kushipa bantu bakuabu bonsu ba mu nzubu wa Akabe bavua bashale ne muoyi mu Yizreyele. Kushipaye kabidi bantu bonsu bavua bamanyike bikole ba ku luseke lua mukalenga Akabe, bena nzubu wende ne batuangaji bende. Yehu kena mushiye muntu nansha umue ne muoyi to.

Yehu udi ushipa bana ba bakalenga ba bena Yuda

¹² Pashishe, Yehu kuya mu Samariya. Ufika ku Bete-Ekede wa balami ba mikoku,

¹³ kusambakenaye ne bana babu ne Akaziya, mukalenga wa bena Yuda. Yehu kubakonka ne: — Nuenu nudi banganyi? Bobu kuandamuna ne: — Tudi bana babu ne Akaziya. Tudi bafika muaba ewu bua kusekelela bana ba mukalenga mukaji Yezabele, ne kusamba bena diku dia bukalenga bakuabu.

¹⁴ Yehu kuela diyi ne: — Bakuatayi ne muoyi! Bantu bavua Yehu nabu, kukuata bana babu ne Akaziya abu ne muoyi! Kabashipabu, kuimansha bitalu biabu mu tshiina tshivua ku Bete-Ekede. Bantu bavuabu bashipe abu, bavua makumi anayi ne babidi. Muntu nansha umue kavua mushale ne muoyi to.

Yehu udi usambakena ne Yonadabe

¹⁵ Yehu umuka muaba uvuaye awu, uye mutantshi, kusambakenaye ne Yonadabe, muana wa Rekabe, umuvuila. Yehu kumuela muoyi, umukonka ne: — Wewe udi wanyi bu mundi meme webe anyi? Yonadabe kuandamuna ne: — Eyowa. Yehu kumuambila ne: — Nanku, tuelangane muoyi ku bianza! Bobu bamane kuelangana muoyi ku bianza, Yehu kuambula Yonadabe mu ditempu diende.

¹⁶ Yehu kuambila Yonadabe ne: — Tuye nebe, umone mundi ngenzela Maweja-Nangila mudimu ne muoyi mujima. Nanku, Yehu kuya ne Yonadabe mu ditempu diende.

¹⁷ Anu Yehu ufika mu Samariya, kushipa bena nzubu wa Akabe bonsu bavua bashale ne muoyi, kubutula nzubu ewu mujima, bu muvua Maweja-Nangila muambile muambi Eliya.

Yehu udi ukandika ditendelela dia mvidie Baale

¹⁸ Yehu kubikidisha bena mu Samariya bonsu, ubambila ne: — Mukalenga Akabe uvua utendelela mvidie Baale nankunanku. Kadi, meme Yehu, nentendelele mvidie awu mupite mukalenga Akabe.

¹⁹ Nanku, bikilayi bambi ba Baale bonsu, batendeledi ne batuangaji bende, bafike kundi bonsu. Muntu nansha umue wa kudibu kashadi to. Bualu ndi musue kuenzeja tshibilu tshinene, bua kulambula Baale milambu. Bantu bonsu badi kabayi bafike, nebabashipe. Yehu uvua wamba nanku ne budimu bua kushipa bantu bavua batendelela mvidie Baale.

²⁰ Ke muvuaye utuma diyi bua babikidishe bantu mu tshibilu tshinene tshia mvidie Baale. Kubikidishabu bantu mu tshibilu atshi.

²¹ Yehu kutuma bantu mu ditunga dia bena Izrayele dijima. Bantu bonsu bavua batendelela mvidie Baale kufika. Muntu nansha umue kavua mukimine kushala to. Mu nzubu wa Baale muvua bantu tente.

²² Pashishe, Yehu kutuma diyi kudi muntu uvua mulame bilamba bia kutendelela nabi mvidie, bua abiabanyine bantu bonsu. Kubabanyinabu bilamba abi. Bamane kuenza nanku,

²³ Yehu, ne Yonadabe, muana wa Rekabe, kubuela mu nzubu wa mvidie Baale, kuambila batendeledi ba mvidie Baale ne: — Nutangile bimpe: munkatshi muenu kamuikadi bantu badi batendelela Mvidi Mukulu wa bena Izrayele. Muikale amu bantu badi batendelela mvidie Baale.

²⁴ Yehu uvua mumane kusokoka bena mvita makumi muanda mukulu pambelu pa nzubu wa mvidie Baale. Uvua muambile bena mvita abu ne: “Ndi nnupesha bantu bonsu aba. Pikala muntu wa kunudi munyemeshe muntu nansha umue ne muoyi, neafue pa muaba wa muntu awu.” Yehu ne Yonadabe kusemena pabuipi bua kulambula milambu ya bobumue, ne ya diosha.

²⁵ Yehu mumane kulambula milambu, kutuma diyi kudi bena mvita ne bamfumu babu, ubambila ne: — Buelayi, nushipe bantu aba bonsu! Muntu nansha umue kena mua kupatuka mu nzubu emu ne muoyi to. Nanku, kushipabu bantu abu bonsu, kuimansha bitalu biabu pambelu. Pashishe, kubuelabu mu nzubu muvuabu batendelela mvidie Baale.

²⁶ Kupatulabu makunji a tshijila avua mu nzubu amu, ku wosha.

²⁷ Kuzazabu dibue divuabu bimanyike bua kutendelela mvidie Baale. Pashishe, kupulabu nzubu wa Baale awu, kuenzamu nkumba ya bantu bonsu. Nkumba ayi, itshidipu too ne mpindiewu.

Yehu, mukalenga wa bena Izrayele

²⁸ Ke muvua Yehu mukandike ditendelela dia mvidie Baale mu bukalenga bua Izrayele nanku.

²⁹ Kadi Yehu uvua anu wenza buenzayi buvua Yerobowame, muana wa Nebate muenze, mufikishe bena Izrayele ku ditendelela dia bana ba ngombe ba tshiamu tshia mpawungi, bavua ku Betele ne ku Dane.

³⁰ Ke Maweja-Nangila kuambila Yehu ne: — Bushuwa, udi muenze bimpe. Udi mukumbaje bionsu bimvua mumane kuamba bua kunyoka bena nzubu wa Akabe. Nanku, bana bebe nebakupingane mu bukalenga bua bena Izrayele, too ne ku ndelanganyi ya musangu muinayi.

³¹ Kadi, Yehu kavua mukumbaje mikenji ya Maweja-Nangila Mvidi Mukulu wa bena Izrayele, ne muoyi mujima to. Uvua anu wenza buenzayi buvua Yerobowame muenze, mufikishe bena Izrayele ku dienza bibi.

³² Tshikondu atshi, Maweja-Nangila kutuadija kukepesha buloba bua bena Izrayele. Kuanyishaye bua Azayele, mukalenga wa bena Siriya, atshimune bena Izrayele mu ditunga diabu dijima.

³³ Kunyengabu bena Izrayele buloba buonsu buvua luseke ludi diba dipatukila lua Yardene, ne buvua ku mutu kua tshimenga tshia Aroyere, ku muelelu wa musulu wa Amone. Ke ditunga dia Ngilaade ne dia Bashane, muaba uvuabu basombe kudi bena Rubene, bena Ngade ne bena Menashe.

³⁴ Malu makuabu a Yehu, mbaafunde mu mukanda udibu babikila ne: Malu adi bakalenga ba bena Izrayele benza. Mu mukanda awu, mbafundemu malu onsu avuaye muenze, baleja kabidi ne bukitu buvuaye nabu.

^35-36 Yehu uvua mushale mu bukalenga mu tshimenga tshia Samariya bidimu makumi abidi ne muanda mukulu. Yeye mumane kufua, kumujiikabu mu Samariya. Muanende wa balume Yowakaze kumupingana mu bukalenga.