1 Tesalonike 1 - MUKANDA WA MYIDI MUKULU

Diela dia muoyi

¹ Tuetu bonsu, Polu, Silase, ne Timote, tudi tunufundila mukanda ewu, nuenu bena ditaba ba mu Tesalonike, bantu ba Mvidi Mukulu Tatu, ne ba Mfumu Yezu Kristu. Dinanga ne bupole bishindame munda muenu.

Tshilejilu tshimpe tshia bena Tesalonike

² Matuku onsu tudi tuela Mvidi Mukulu tuasakidila bualu buenu buonsu, tunuvuluka mu malomba etu, katuyi tupungila.

³ Bualu kumpala kua Mvidi Mukulu ne Tatu wetu, tudi tuvuluka munudi nukumbaja malu adi ditaba dienu dinulomba, mudi dinanga dienu dinukuatshisha midimu mikole, kabidi munudi nutekemena kudi Mfumu wetu Yezu Kristu ne muoyi umue.

⁴ Bana hetu, tudi bamanye ne: Mvidi Mukulu mmununange, munusungule bua nuikale bantu bende.

⁵ Bualu katuvua banulongeshe Lumu lua Disanka anu ku mishiku patupu, kadi ne bukole kabidi. Mueyelu wa Tshijila uvua utuambuluisha. Ke mutuvua bajadike bulelela bua Lumu lua Disanka elu ne bukitu. Nudi bamanye mutuvua basombe munkatshi muenu, anu bua kunuenzela bimpe.

⁶ Nuvua bidikije tshituvua benze, ne tshivua Mfumu wenza. Nansha banukengeshe bikole, nuvua bitabe muaku wa Mvidi Mukulu, ne disanka didi Mueyelu wa Tshijila ufila.

⁷ Nunku, nukadi tshilejilu tshia bena ditaba bonsu badi mu Masedoniya ne mu Akaya.

⁸ Bualu bituadije kuenu, muaku wa Mfumu kutangalaka mu Masedoniya, ne mu Akaya. Kadi nansha miaba mikuabu yonsu, bantu badi amu bamanye munudi nuitaba Mvidi Mukulu. Nanku katuena ne bua kuakula bualu ebu to.

⁹ Bonsu badi balonda munuvua batuakidile bimpe patuvua bafike kuenu, munuvua babenge mvidie, bapingane kudi Mvidi Mukulu wa muoyi ne mulelela, bua kumukuatshila mudimu.

¹⁰ Nudi bindile Muanende Yezu, uvuaye mubishe ku lufu, udi ne bua kutuluka mu diulu. Yeye mene ke udi utusungidila ku tshilumbuluilu tshia Mvidi Mukulu tshikadi pabuipi.