1 Samuele 9 - MUKANDA WA MYIDI MUKULU

Shawule ne nyama ya mpunde mijimine

¹ Tshikondu atshi, mu ditunga dia Binyamine, muvua muntu mukuabu wa mu ditunga adi, muikale mubanji, dina diende Kishe. Uvua muana wa Abiyele, ne muikulu wa Serore. Serore pende uvua muana wa Bekorate, ne muikulu wa Afiya.

² Kishe uvua ne muana wa balume, dina diende Shawule. Shawule uvua nsongalume muimpe mutambe. Mu ditunga dia bena Izrayele dijima, kamuvua muntu mukuabu mufuanangane ne Shawule ku buimpe to. Kabidi uvua mupite bantu bonsu ku bule.

³ Dituku dikuabu, nyama ya mpunde ya tatuende Kishe ivua mijimine. Kishe kutuma muanende Shawule bua baye ne muena mudimu bua kukeba nyama ayi.

⁴ Shawule ne muena mudimu awu, kudianjilabu kupitshila mu buloba bua mikuna ya Efrayime. Pashishe kupitshilabu mu buloba bua Shalisha. Kadi kabena bamona nyama ayi to. Kupitshilabu mu buloba bua Shalime, kabayi bayimona. Kuyabu mu buloba bua Binyamine, kadi kabena bayimona to.

⁵ Kadi bafika mu buloba bua Sufa, Shawule kuambila muena mudimu ne: — Tupingane ku nzubu. Patupu tatu wanyi, kakupampakana kabidi bua nyama ya mpunde to. Neatuadije kunyingalala bualu buetu.

⁶ Muena mudimu kuandamuna ne: — Ndi mumanye bimpe ne: mu tshimenga tshidi kumpala kuetu, mudi muambi, muntu udi ne lumu lunene. Bionsu bidiye umanyisha bantu, bidi bienzeka anu mudiye muambe amu. Nanku tuye kudiye mpindiewu. Misangu mikuabu udi mua kutuleja luseke lutudi mua kuya kukebela nyama ayi.

⁷ Shawule kukonka muena mudimu ne: — Patuafika kudi muambi awu, netumupeshe tshinyi? Katuena kabidi ne mampa mu mifuku yetu to. Katuena nansha ne tshintu tshia disanka tshia kumulambula. Tudi tshianana.

⁸ Muena mudimu kuandamuna ne: — Ndi ne lukanu lumue lua tshiamu tshitoke tshia mushinga mukole. Netumupeshelu bua atuleje njila utudi mua kuyila.

^9-11 Shawule kuitaba ne: — Mbimpe, tuyaku. Nanku kuyabu mu tshimenga, muaba uvua muambi. Patshi wabu mu njila, kusambakenabu ne bansongakaji bafuma mu tshimenga, baya kusuna mayi. Kukonkabu bansongakaji abu ne: — Mumonyi wa malu udi muenu munemu anyi? (Ku kale, mu bena Izrayele, pavua muntu uya kuebeja Mvidi Mukulu malu, bavua bamba ne: “Tuyaye kudi mumonyi wa malu.” Nanku muntu udibu babikila mpindiewu ne: “Muambi,” bavua bamubikila kale ne: “Mmumonyi wa malu.”)

¹² Bansongakaji kubandamuna ne: — Eyowa, ukadi mumane kufika. Mmufike mu tshimenga tshietu anu lelu, bualu ke dituku didi bantu balambula mulambu muaba wa tshijila. Koleshayi.

¹³ Nanku nenumupete anu panudi nubuela mu tshimenga, kayi muanji kubanda muaba wa tshijila bua kudia biakudia bia mulambu. Muntu nansha umue kena mua kudianza kudi a, mumonyi wa malu kayi muanji kufika. Yeye ke udi ne bua kuela milambu lupemba. Pashishe bantu bavuabu babikila nebadie. Buelayi mu tshimenga lukasa, nenumusangane anu mpindiewu.

Shawule udi umonangana ne Samuwele

¹⁴ Shawule ne muena mudimu wende kutungunuka ne luendu. Pavuabu babuela mu tshimenga, Samuwele uvua upatukamu bua kuya muaba wa tshijila. Nanku kusambakenaye nabu.

¹⁵ Kadi muladilu wa dituku adi, Maweja-Nangila uvua mumane kumanyisha Samuwele muvuabu ne bua kupetangana ne Shawule. Mmumuambile ne:

¹⁶ “Malaba anu pa diba ditudi edi, nenkutumine muntu wa mu tshisamba tshia Binyamine. Wewe neumujidile bua ikale mukalenga wa bantu banyi bena Izrayele. Neabumushe ku bumfumu bua bena Peleshete. Bualu bantu banyi bena Izrayele, mbambikila bua meme kubambuluisha, kabidi ndi mumone dikenga diabu.”

¹⁷ Nanku anu Samuwele umona Shawule mutshikale kule, Maweja-Nangila kuambila Samuwele ne: “Tangila muntu umvua mukuambile. Yeye neikale mukalenga wa bantu banyi.”

¹⁸ Shawule usemena pabuipi ne Samuwele ku tshiibi tshia tshimenga, kukonkaye Samuwele ne: — Bu wewe musue, ndeja ku nzubu kua mumonyi wa malu.

¹⁹ Samuwele kuandamuna ne: — Meme ke mumonyi wa malu. Pita kumpala kuanyi eku, tuye nebe muaba wa tshijila. Lelu netudie nebe. Malaba dinda, pangikale mumane kukuandamuna ku makonka ebe onsu, nenkulekele uye.

²⁰ Kadi bua nyama ya mpunde idi mijimine kukadi matuku asatu, kuditatshishi to. Mbamane kuyimona. Kadi mpindiewu, mbimpe umanye muntu udi bena Izrayele bonsu batekemena. Bena Izrayele mbakutekemena anu wewe, batekemena kabidi ne bena nzubu wa tatuebe.

²¹ Shawule kuandamna ne: — Kuambi nanku, bualu meme ndi muena Binyamine. Ndi muntu wa mu kasamba kakese ka bena Izrayele. Kabidi mu tshisamba tshia Binyamine emu, diku dianyi ke didi ne bantu bapite bukese. Kadi mmunyi muudi mua kungambila bualu bua nanku?

²² Kadi Samuwele kuya ne Shawule ne muena mudimu wa Shawule mu nzubu wa tshidiilu. Kubasombeshaye muaba wa bantu ba lumu. Mu nzubu, muvua anu bantu bu makumi asatu bavuabu babikila.

²³ Pashishe Samuwele kuambila mulambi wende bua amutuadile dibulu dia munyinyi divuaye mumupe bua kuteka ku luseke.

²⁴ Mulambi kuya kuangata tshibelu tshia nyama ne mukila, kubiteka kumpala kua Samuwele. Samuwele kuambila Shawule ne: — Ke munyinyi uvuabu bakutekela ewu, udie ne bantu bonsu bandi mubikila aba. Dituku adi, Shawule ne Samuwele kudia muaba umue.

²⁵ Pashishe kumukabu muaba wa tshijila, kupueka mu tshimenga. Samuwele kuyukila ne Shawule ku musaka wa nzubu.

Badi bajidila Shawule

²⁶ Butshia dinda dionsu, Shawule ne muena mudimu wende kubika. Panshi patoke, Samuwele kubikila Shawule uvua ku musaka wa nzubu, umuambila ne: — Tuyayi, meme ndi musue kukushindikija mu njila. Nanku Samuwele kuya kushindikija Shawule.

²⁷ Bafike ku ndekelu kua mikalu ya tshimenga, Samuwele kuambila Shawule ne: — Ambila muena mudimu webe adianjila kumpala. Muena mudimu mumane kuya mutantshi, Samuwele kuamba ne: — Wewe Shawule, mpindiewu, imana muaba ewu. Ndi musue kukumanyisha tshidi Maweja-Nangila wamba.