1 Samuele 8 - MUKANDA WA MYIDI MUKULU

Bena Izrayele badi balomba mukalenga

¹ Samuwele mumane kukulakaja, kutekaye bana bende ba balume mu bumfumu, bua kulombolabu bena Izrayele.

² Muanende muanabute uvua Yowele, muana muibidi uvua Abiya. Bana aba, bavua basombela mu Bersheba bua kulumbuluisha bena Izrayele.

³ Kadi bana abu, kabawa balonda tshilejilu tshia tatuabu Samuwele to. Bavua ne lukuka lua biuma, bangata mabuejila, bakose bilumbu bia bantu bibi.

⁴ Bua buenzayi abu, bakulu ba bena Izrayele kudisangisha, kuya kudi Samuwele ku Rama,

⁵ bamuambila ne: — Wewe Samuwele udi mumane kukulakaja, kadi bana bebe ba balume kabena balonda tshilejilu tshiebe to. Nanku, utupeshe mukalenga udi mua kushala mfumuetu, anu bu mudi bantu ba bisamba bikuabu ne muntu udi ubalombola kashidi.

⁶ Samuwele kubungama bikole, bua pavua bantu bamulomba mukalenga. Ke kukonkaye Maweja-Nangila bualu ebu.

⁷ Maweja-Nangila kumuandamuna ne: — Uteleje bena Izrayele, ubenzele bionsu bidibu balomba. Bualu udibu babenga ki ngwewe to, mmeme! Kabatshiena basue bua meme kuikala mukalenga wabu to.

⁸ Bualu biangatshile dituku dindi mubapatula mu Ejipitu too ne mpindiewu, badi anu bambenga meme, batendelela mvidie mikuabu. Bionsu bivuabu bangenzele abi, ke bidibu bakuenzela wewe mpindiewu.

⁹ Nanku itaba bionsu bidibu bakulomba. Kadi ubabela, ubambile patoke, ubaleje malu onsu abenzelabu kudi mukalenga udi ushala mfumuabu.

Malu adi mukalenga mua kuenzela bantu bende

¹⁰ Samuwele kufikisha meyi a Maweja-Nangila kudi bavua bamulomba mukalenga, ubambila ne:

¹¹ — Numanye ne: mukalenga washala mfumuenu neanukengeshe mushindu ewu: Munkatshi mua bana benu ba balume, neasungule bena mvita badi mua kuendesha matempu ende a mvita, badi mua kubanda pa nyama yende ya tubalu, nansha badi mua kunyema kumpala kua ditempu diende.

¹² Bana benu bakuabu nebikale balombola bena mvita tshinunu, balombola bena mvita makumi atanu. Mfumu awu, neangate bana benu nansha bakuabu bua kumudiminabu madimi, bua kunowa biakudia, nansha bua kumuenzela biamu bia kuluangana nabi, ne bintu bia kuteka mu matempu ende.

¹³ Neangate bana benu ba bakaji bua kumuenzejabu manananshi, kumulambila biakudia, kumoshila mampa.

¹⁴ Neanunyenge madimi mimpe, mionji mimpe ya mvinyo, ne mitshi ya olive mimpe inudi nukuna. Bionsu ebi, neabipeshe balombodi ba bena mvita bende.

¹⁵ Ku biakudia bionsu bia mu madimi enu, ne ku maluvu enu a mvinyo, neanunyenge tshia dikumi. Neatshipeshe bena mudimu bende ne balombodi ba bena mvita bende.

¹⁶ Neanunyenge bena mudimu benu balume ne bakaji, bansongalume benu badi ne bukole bua bungi bua kumukuatshila mudimu. Neanunyenge ne nyama yenu ya mpunde bua kumuenzelayi mudimu.

¹⁷ Ku mikoku yenu ne ku mbuji yenu dikumi, neangate tshimuna tshimue. Mu tshikosu, nenuikale bapika bende.

¹⁸ Pashishe nenudidile Maweja-Nangila bua mukalenga unuikala badisunguile awu. Kadi Maweja-Nangila kakunuteleja to.

¹⁹ Bena Izrayele kabawa bitaba bionsu bivua Samuwele ubambila abi to. Kumuandamunabu ne: — Nansha wewe muambe nanku, tudi basue anu mukalenga,

²⁰ bua tuikale bu mudi bena bisamba bikuabu bionsu. Tudi basue mukalenga bua ikale ukosa nsambu yetu, wenda kumpala kua bena mvita betu, utuluila mvita.

²¹ Samuwele mumane kumvua bionsu bivua bena Izrayele bamba, kuyaye kuambila Maweja-Nangila.

²² Maweja-Nangila kumuambila ne: — Kumbaja dijinga diabu, ubapeshe mukalenga. Ke Samuwele kuambila bena Izrayele bua muntu yonsu apingane ku nzubu kuende.