1 Samuele 6 - MUKANDA WA MYIDI MUKULU

Bena Peleshete badi bapingajila bena Izrayele mushete wa tshijila

¹ Mushete wa tshijila wa Maweja-Nangila kushala mu ditunga dia bena Peleshete ngondu muanda mutekete.

² Pashishe bena ditunga adi kukonka batuangaji babu ne bena mbuku ne: — Mushete wa Maweja-Nangila, tuenze nawu tshinyi? Nutuleje mushindu utudi mua kuupingaja mu ditunga diawu.

³ Batuangaji ne bena Mbuku kuandamuna ne: — Panuikala basue kupingaja mushete wa Mvidi Mukulu wa bena Izrayele, kanuena mua kuupingaja tshianana to. Mbimpe nulambuleku Mvidi Mukulu wa bena Izrayele mulambu wa didia tshibalu. Nanku masama enu neajike. Kabidi nenujadike tshivua Maweja-Nangila ewu unukengeshila anu kunukengesha, kayi ulekela kunuleja bukole buende.

⁴ Bena Peleshete kukonka ne: — Kadi mulambu wa didia tshibalu utudi mua kulambula ngua mushindu kaayi? Batuangaji ne bena mbuku kuandamuna ne: — Bilondeshile bungi bua bamfumu ba bena Peleshete, nulambule Maweja-Nangila bintu bitanu bia tshiamu tshia mpawungi, bileja disama dia mulaka, kabidi ne mpuku itanu ya tshiamu tshia mpawungi. Bualu tshipupu tshidi tshinukuata nuenu ne bamfumu benu, tshidi anu tshimue, kabidi tshia mushindu umue.

⁵ Nanku nuenze bintu bidi bileja disama dia mulaka. Nuenze kabidi mpingu ya mpuku idi inyangakaja ditunga dienu. Nutumbishe Mvidi Mukulu wa bena Izrayele. Misangu mikuabu nealekele kunukengesha nuenu, mvidie yenu ne ditunga dienu dijima.

⁶ Kanuenji tshitunu bu muvuabu benza kudi mukalenga wa bena Ejipitu ne bantu bende. Nuvuluke muvua Mvidi Mukulu ewu mukengeshe bena Ejipitu, too ne muavubu kuanyisha bua bena Izrayele bapatuke ku bupika.

⁷ Nanku mpindiewu, enzayi ditempu dipiadipia. Nuangate nyama ya ngombe ibidi itshidi yamusha bana mabela, kabayi banji kuenza nayi mudimu. Nuyisuike ku ditempu. Kadi nupingaje bana bayi mu tshikumbi.

⁸ Nuangate mushete, nuuteke pa ditempu apu. Bintu bia tshiamu tshia mpawungi binudi nulambula Mvidi Mukulu bua mulambu wa didia tshibalu, nubiteke mu kashete, kanudi nuteka ku luseke lua mushete wa Maweja-Nangila. Pashishe nulekele ngombe ayi, idiyile nkayayi ne ditempu.

⁹ Nanku nenumone: pikala ngombe milonde njila udi muye mu ditunga dia bena Izrayele, luseke lua ku Bete-Shemeshe, nenujadike ne: Mvidi Mukulu wa bena Izrayele, ke udi munutumina makenga onsu aa. Kadi pikala ngombe kayiyi milonda njila ewu, netujadike ne: Maweja-Nangila wa bena Izrayele kena mututumina makenga aa to, kadi tudi bapeta makenga aa mu mpukapuka.

¹⁰ Bena Peleshete kuenza bionsu bivuabu babambile. Kuangatabu ngombe ibidi itshivua yamusha bana, kuyisuikabu ku ditempu, kadi kuinjidilabu bana bayi mu tshikumbi.

¹¹ Kutekabu mushete wa tshijila pa ditempu, ne kashete kavua ne mpuku ya tshiamu tshia mpawungi ne bintu bidi bileja disama dia mulaka.

¹² Ngombe kuya buludi, ilonda njila wa ku Bete-Shemeshe, yenda idila, kayiyi yepuka ku dia balume nansha ku dia bakaji. Bamfumu ba bena Peleshete bavua benda balonda ditempu panyima too ne ku mukalu wa Bete-Shemeshe.

¹³ Bena tshimenga bavua mu budimi, banowa ntete ya kuenza bukula. Kumonabu mushete wa tshijila kule, kusankabu bikole.

¹⁴ Ditempu difika mu budimi bua Yoshuwa, muena mu Bete-Shemeshe, kuimanadi mu budimi amu, pabuipi ne dibue dinene. Bena tshimenga kukosolola mabaya a ditempu adi bitupa, bua kuenza nkunyi. Pashishe, kulambulabu Maweja-Nangila ngombe ayi bu mulambu wa kuosha.

¹⁵ Bena Levi bavua bamana kumbusha mushete wa Maweja-Nangila uvua pa ditempu, ne kashete kavua ne bintu bia tshiamu tshia mpawungi. Bavua babiteka pa dibue dinene. Pashishe, bena mu tshimenga tshia Bete-Shemeshe, kulambula Maweja-Nangila milambu ya kuosha ne ya bobumue anu dituku adi.

¹⁶ Bamfumu batanu ba bena Peleshete, bamane kumona bionsu abi, kupinganabu mu tshimenga tshia Ekrone, anu dituku adi kabidi.

¹⁷ Bintu bivua bileja disama dia mulaka, bia tshiamu tshia mpawungi, bivua bena Peleshete balambula Maweja-Nangila, bua mulambu wa didia tshibalu bivua bungi nenku: bena tshimenga tshia Asdode bavua bafila tshintu tshimue, bena Ngaza tshimue, bena Askalone tshintu tshimue, bena Ngate tshintu tshimue ne bena Ekrone tshintu tshimue.

¹⁸ Kadi, mpuku ya tshiamu tshia mpawungi ivua bungi bupite, bilondeshile bungi bua bimenga bidi ku bumfumu bua bamfumu batanu ba bena Peleshete. — Nanku dibue dinene divu mu budimi bua Yoshuwa, muena mu Bete-Shemeshe, muaba uvuabu bateka mushete wa Maweja-Nangila, ditshidipu too ne mpindiewu, bua bantu bikale bavuluka bualu ebu.

¹⁹ Kadi Maweja-Nangila kunyoka bena tshimenga tshia Bete-Shemeshe, bualu bavua batangila mushete wa tshijila. Kushipaye bantu balume makumi muanda mutekete munkatshi muabu. Nanku bantu bavua bashala, kuenzabu madilu, bualu Maweja-Nangila uvua mubanyoka bikole.

²⁰ Pashishe bantu abu kuamba ne: — Muntu nansha umue kena mua kuimana kumpala kua Maweja-Nangila Mvidi Mukulu ewu wa tshijila. Kadi mmuaba kaayi utudi mua kuya kushiya mushete wende wa ndondu, mutantshi mule ne ditunga dietu?

²¹ Kutumabu bantu ku Kiriyate-Yeyarime bua kuambila bena tshimenga atshi ne: — Bena Peleshete mbapingaje mushete wa Maweja-Nangila. Nanku nufike bua kuwangata, kuya nawu kuenu.