1 Samuele 4 - MUKANDA WA MYIDI MUKULU

¹ Ke muvua Samuwele mufikishe meyi a Maweja-Nangila kudi bena Izrayele bonsu nanku. Dituku dikuabu, bena Izrayele kuya kuluangana ne bena Peleshete. Kuasabu mitanda yabu muaba uvuabu babikila ne: Dibue-dia-diambuluisha. Bena Peleshete kuasa yabu mitanda mu Afeke.

Baluishi badi banyenga mushete wa tshijila

² Bena Peleshete kuela mualu wa mvita bua kuluisha bena Izrayele. Mvita kupita bukole. Bena Peleshete kubutula bena Izrayele, kushipa bantu bu binunu binayi mu mvita ayi.

³ Bena Izrayele bavua bashale ne muoyi bapingana mu mitanda, bakulu ba bena Izrayele kukonkangana ne: — Maweja-Nangila mmulekela bena Peleshete batushipa lelu bua tshinyi? Tuyayi ku Silo, bua tukebe mushete wa ndondu wa Maweja-Nangila. Pikala Maweja-Nangila munkathi muetu, Yeye neatusungidile kudi baluishi betu.

⁴ Bena Izrayele kutuma bantu ku Silo, bua kuangata mushete wa tshijila wa Maweja-Nangila Mvidi Mukulu wa biluilu bia bena Izrayele, udi usomba pa mutu pa bakerubine. Ofni ne Pinhase, bana ba balume babidi ba mutuangaji Eli, ke bavua benda pabuipi ne mushete wa ndondu.

⁵ Amu bafike ne mushete wa ndondu mu mitanda, bena mvita ba bena Izrayele kuela bibingu bikole, buloba kuzakala.

⁶ Bena Peleshete bumvua bibingu abi, kukonkanganabu ne: — Bibingu bikole bidi mu mitanda ya bena Ebrewu mbia tshinyi? Bena Peleshete kujadika ne: mushete wa Maweja-Nangila wafiki mu mitanda ya bena Izrayele.

⁷ Ke kumvuabu bowa, kuambilanganabu ne: “Mvidi Mukulu wafiki mumitanda ya bena Izrayele. Kuonsu eku, kavuamu to. Mpindiewu tudi bena diakabi!

⁸ Eyowa tudi bena diakabi! Nganyi udi mua kutusungidila kudi Mvidi Mukulu ewu wa bukole, uvua mukengeshe bena Ejipitu ne bipupu bia mishindu ne mishindu mu tshipela?

⁹ Bena Peleshete, jukayi, koleshayi muoyi, tudi bantu balume. Tuetu batekeshe mu maboku, netushale bapika ba bena Ebrewu, bu muvuabu bapika betu. Koleshayi muoyi, tuba-luishayi”!

¹⁰ Bena Peleshete kuluangana ne bena Izrayele. Bena Peleshete kupita bena Izrayele bukole. Bena Izrayele kunyema kupingana kuabu. Bavua bashipe bena mvita ba bena Izrayele bapite bungi, binunu makumi asatu.

¹¹ Bena Peleshete kunyenga mushete wa tshijila. Ofni ne Pinhase, bana ba balume babidi ba mutuangaji Eli, kufua.

Lufu lua mutuangaji Eli ne lua mukaji wa muanende

¹² Anu dituku adi, muntu mukuabu wa mu tshisamba tshia Binyamine uvua mupanduke mu mvita, kuyaye lubilu too ne ku Silo. Kadi bua kuleja kanyinganyinga, uvua mupande bilamba biende, mudiela buloba mu mutu.

¹³ Mutuangaji Eli uvua ku mpenga kua njila, musombe mu nkuasa wende. Uvua muindile, upampakana bikole bua mushete wa tshijila wa Mvidi Mukulu. Muntu uvua munyema mu mvita awu ubuela mu tshimenga, kuambilaye bantu bonsu bivua bienzeka mu mvita. Nanku bantu bonsu kudila muadi bikole.

¹⁴ Mutuangaji Eli umvua miadi ayi, kukonkaye bua kumanya tshivua bantu badidila. Muntu awu kuya lubilu, kumuambila tshi wabu badidila.

¹⁵ Musangu awu, mutuangaji Eli uvua ne bidimu makumi tshitema ne muanda mukulu, ukavua mpofu menemene.

¹⁶ Muntu uvua munyema mu mvita, kuambila mutuangaji Eli ne: — Ndi mfika amu mpindiewu, ngumukila ku mvita. Ndi munyeme anu lelu ewu. Mutuangaji Eli kumukonka ne: — Muananyi, mvita ivua mushindu kaayi?

¹⁷ Muntu awu kuandamuna ne: — Bena Izrayele mbanyeme bena Peleshete. Mbashipe bena mvita ba Izrayele bapite bungi. Mbashipe bana bebe babidi ba balume, Ofni ne Pinhase. Kabidi mushete wa tshijila wa Mvidi Mukulu mbaunyenga kudi bena Peleshete.

¹⁸ Muntu uvua wakula awu utela amu mushete wa tshijila, ke mutuangaji Eli uvua musombe mu nkuasa, kudishinda tshiadi mulu ku tshiibi tshia nzubu wa Mvidi Mukulu. Kutshibuka nshingu, kufuaye. Bualu uvua ne bujitu bua bungi, mumane kukulakaja. Mutuangaji Eli uvua mulombola bena Izrayele bidimu makumi anayi.

¹⁹ Mukaji wa muanende Pinhase uvua ne difu, pabuipi ne kulela. Mukaji awu umvua ne: bena Peleshete mbanyenge mushete wa tshijila, kabidi tatuende muenu ne bayende Pinhase mbafue, munda mukavua mumusama bua kulela, nanku uzonzama, kulelaye.

²⁰ Kadi bu nuwuaye ukengakana bua kukula muoyi, bakaji bavua bimane pabuipi nende kumuambilabu ne: — Kutshinyi to. Udi mulela muana wa balume. Kadi kena mubandamune to. Bualu kavua mubateleja to.

²¹ Pashishe mukaji awu kuamba ne: — Bu mudi butumbi bua Mvidi Mukulu bumuke munkatshi mua bena Izrayele, ndi nginyika muana ewu dina ne: Ikabode. Dina edi mbua kuleja ne: “Butumbi ka-butshienaku.” Dina edi divu bua kuvuluka mushete wa tshijila uvuabu banyenge, ne kuvuluka lufu lua tatuende muenu, ne lua bayende Pinhase.

²² Mukaji awu kujadika ne: butumbi bua Maweja-Nangila kabutshiena munkatshi mua bena Izrayele, bualu baluishi mbanyenge mushete wa ndondu.