1 Samuele 31 - MUKANDA WA MYIDI MUKULU

Lufu lua Shawule

¹ Bena Peleshete kuluisha bena Izrayele pa mukuna wa Ngilbowa. Kushipabu bena Izrayele ba bungi, bakuabu kunyema.

² Bena Peleshete kuluisha Shawule ne bantu bende bikole, kushipa Yonatane, Abinadabe ne Malkishuwa, bana ba mukalenga Shawule.

³ Nanku, mvita kutshintshimika mukalenga Shawule. Bantu bavua ne mata ne miketa kumonabu Shawule. Ke Shawule kupampakana bikole.

⁴ Kuambilaye muntu uvua mumuambuile bia lulu ne: — Angata muela webe, unshipe. Bualu tshiena musue bua banshipe, banseke kudi bena Peleshete aba, bantu bavuabu kabayi bateke panshi. Kadi, muntu uvua muambuile Shawule bia lulu, kubenga, bualu uvua ne bowa bua bungi. Ke Shawule kuasa muela wende panshi, kudiela pa muela apu.

⁵ Muntu uvua muambuile Shawule bia lufu umona ne: mfumuende wafu, kuasaye wende muela panshi, kudiela pa muela apu, kufua pende.

⁶ Ke muvua Shawule mufue dituku dimue ne bana bende basatu, ne muntu uvua mumuambuile bia lufu, ne bena mvita bende bonsu nanku.

⁷ Bena Izrayele bavua base luseke lukuabu lua tshibandabanda, ne bavua dishiya dia Yardene, kumvuabu lumu ne: bena mvita ba bena Izrayele mbanyeme bena Peleshete, kabidi ne: Shawule ne bana bende mbafue mu mvita amu. Nanku bena Izrayele kunyema, kushiya bimenga biabu. Bena Peleshete kuasa mu bimenga abi.

⁸ Butshia dinda, bena Peleshete kuya bua kuangula bintu bia bantu bavua bafue. Kusanganabu tshitalu tshia Shawule ne bia bana bende basatu pa mukuna wa Ngilbowa.

⁹ Kukosabu tshitalu tshia Shawule mutu. Kuangatabu bia mvita biende bionsu. Kuendakanabu nabi mu ditunga diabu dia bena Peleshete bua kutangalaja lumu lua disanka elu mu nzubu ya mvidie yabu, ne munkatshi mua bantu bonsu.

¹⁰ Pashishe bia mvita bia Shawule abi, kubitekabu mu nzubu wa mvidie wabu Astarte. Kusuikabu tshitalu tshiende ku tshimana tshia ku Bete-Sheyane.

¹¹ Bena mu tshimenga tshia Yabeshe mu Ngilaade, kumvuabu lumu lua bionsu bivua bena Peleshete benzele Shawule.

¹² Bantu ba mu Yabeshe bavua ne dikima, kuenda butuku bujima too ne ku Bete-Sheyane. Kumushabu tshitumpampa tshia tshitalu tshia Shawule, ne bitalu bia bana bende ku tshimana. Pashishe kuyabu kuosha bitalu abi ku tshimenga tshia Yabeshe.

¹³ Kusangishabu mifuba ya bantu abu, kuyijika muinshi mua mutshi wa kampanga nzevu, uvua mu tshimenga tshia Yabeshe. Nanku, bena mu tshimenga tshia Yabeshe, kujilabu biakudia matuku muanda mutekete.