1 Samuele 3 - MUKANDA WA MYIDI MUKULU

¹ Kadi, Samuwele muana uvua wenzele Mvidi Mukulu mudimu, bamulombola kudi mutuangaji Eli. Tshikondu atshi, bua Maweja-Nangila kuyukila ne muntu, nansha kumumuenekela, bivua bualu bukole.

Mvidi Mukulu udi ubikila Samuwele

² Mutuangaji Eli mumane kukulakaja, katshiyi umona kabidi bimpe, dituku dikuabu butuku, uvua mu lala muaba wende wa tshibidilu.

³ Samuwele kabidi uvua mulala, mu nzubu wa Maweja-Nangila, pabuipi ne mushete wa ndondu. Butuku kabuyi buanji kutshia, muendu wa muaba wa tshijila utshivua utema.

⁴ Maweja-Nangila kubikila Samuwele. Samuwele kuitaba ne: “Eyowa, mfumuanyi.”

⁵ Pashishe kuyaye lubilu kudi Eli, umuambila ne: — Ke meme uuvua ubikila ewu! Eli kumuambila ne: — Pingana, uye kulala. Tshiena mukubikila to. Samuwele kuya kulala.

⁶ Musangu muibidi, Maweja-Nangila kubikila Samuwele ne: “Samuwele!” Muana kujuka, kuya kudi Eli, kumuambila ne: — Ke meme uuvua ubikila ewu! Eli umuambila ne: — Muananyi, tshiena mukubikila to! Pingana, uye kulala.

⁷ Samuwele kavua muanji kumanya Maweja-Nangila bimpe to, bualu Maweja-Nangila kavua muanji kuyukila nende to.

⁸ Musangu muisatu, Maweja-Nangila kubikila muana: “Samuwele!” Samuwele kujuka kuya kudi Eli, umuambila ne: — Ke meme uuvua ubikila ewu! Musangu ewu, Eli kujadika ne: Maweja-Nangila ke udi ubikila muana ewu.

⁹ Nanku Eli kuambila Samuwele ne: — Pingana, uye kulala. Pikalabu bakubikila kabidi, witabe ne: “Maweja-Nangila ngambilaku. Meme muntu webe ndi nkuteleja!” Samuwele kupingana, kuya kulala muaba wende.

¹⁰ Maweja-Nangila kufika, kuimana kabidi muaba awu bu misangu mikuabu. Kubikilaye ne: “Samuwele, Samuwele”! Muana kuitaba ne: — Ke meme muntu webe ewu ndi muteleja, ngambilaku.

¹¹ Maweja-Nangila kuambila Samuwele ne: — Nenkengeshe bena Izrayele bikole. Dikenga adi nedikemeshe bikole bantu badi badiumvua.

¹² Dituku adi, nenkumbaje bionsu bimvua mumane kuamba bua kuenzela Eli ne bena nzubu wende. Nebapete makenga onsu amvua mumane kubambila. Tshiena ndekela to.

¹³ Meme Maweja-Nangila mvua mumane kuambila Eli ne: Nennyoke bena nzubu webe kashidi. Bualu bana bebe ba balume bavua benza bibi, kabayi bannemeka. Kadi, Eli uvua mumanye buenzayi bua bana bende, kayi ubabela to.

¹⁴ Nanku, ndi mumane kuditshipa bua bena nzubu wa Eli ne: nansha bobu bandambula nyama miosha, nansha bintu bia mu madimi, tshiena mua kupua bubi buabu muoyi to.

¹⁵ Samuwele kushala mulala too ne mu dinda. Pashishe kuyaye kunzulula biibi bia nzubu wa Mvidi Mukulu. Kadi uvua utshina bua kulondela Eli bionsu bivuaye mumvue kudi Mvidi Mukulu.

¹⁶ Ke Eli kumubikila, wamba ne: — Muananyi Samuwele! Samuwele kuitaba ne: — Eyowa, mfumuanyi.

¹⁷ Eli kumukonka ne: — Maweja-Nangila wakuambidi tshinyi? Kunsokoki bualu nansha bumue to. Wewe munsokoke bualu nansha bumue budi Mvidi Mukulu mukuambile, nemmulombe bua akunyoke bikole bitambe.

¹⁸ Nanku Samuwele kena musokoke bualu nansha bumue. Eli kuamba ne: — Yeye udi Maweja-Nangila! Enze mudiye musue.

¹⁹ Samuwele kukola, Maweja-Nangila uvua amu nende. Bualu buonsu buvua Samuwele wamba mu dina dia Maweja-Nangila, Maweja-Nangila uvua amu ubukumbaja.

²⁰ Nanku mu ditunga dijima dia bena Izrayele, biangatshile ku Dane too ne ku Bersheba, bantu bonsu bavua bajadika ne: Samuwele mmuambi wa bushiwa wa Maweja-Nangila.

²¹ Maweja-Nangila uvua udimuenesha ku Silo. Bualu ke muaba uvuaye mumuenekela Samuwele bua kumumanyisha meyi ende.