1 Samuele 29 - MUKANDA WA MYIDI MUKULU

Bena Peleshete badi bipata Davide

¹ Bena Peleshete kusangisha bena mvita babu bonsu ku Afeke. Bena Izrayele bavua basa mitanda yabu ku mpokolu wa mayi pabuipi ne tshimenga tshia Yizreyele.

² Bamfumu ba bena Peleshete kuenda, balombola bisumbu bia bena mvita. Davide ne bantu bende bavuaye nabu, ne mukalenga Akishe, bavua balonda panyima.

³ Balombodi ba bena mvita ba bena Peleshete kukonkabu ne: — Bena Ebrewu aba mbanganyi? Mukalenga Akishe kuandamuna ne: — Kanuena bamanye Davide uvua muena mudimu wa Shawule, mukalenga wa bena Izrayele. Mpindiewu tudi nende, kukadi bidimu bu bibidi. Biangatshile dituku diakumukaye kudi mfumuende Shawule too ne mpindiewu, tshiena muanji kumubanda ne bualu bubi nansha bumue.

⁴ Balombodi ba mvita ba bena Peleshete, kufiikila mukalenga Akishe munda, bamuambila ne: — Umushe muntu ewu, apingane mu tshimenga tshiudi mumupe bua kusomba. Kena mua kuikala netu mu mvita to. Udi mua kutukudimukila, munkatshi mua mvita bua kutuluisha. Bualu bua kumunangabu tshiakabidi kudi Shawule mfumuende wa kale, Davide kena mua kufila bena mvita betu mu bianza bia Shawule anyi?

⁵ Katupu muoyi ne: Davide ewu, ke uvua bakaji, bajiila maja, bimbila misambu, bamba ne: “Shawule uvua mushipe bantu binunu tshinunu, kadi Davide mmushipe bantu binunu makumi ne makumi.”

⁶ Nanku mukalenga Akishe, kubikila Davide umuambila ne: — Bu mudi Maweja-Nangila ne muoyi, ndi mukunange bikole. Mvua mumone ne: udi ukumbana bua tuetu kuya nebe mu mvita. Bualu biangatshile dituku diuvua mufike kuanyi too ne mpindiewu, tshiena muanji kumona wewe muenze bualu bubi to. Kadi, bamfumu bakuabu ba bena Peleshete kabena bakunange to.

⁷ Nanku, pingana kuebe ne ditalala, bua bamfumu aba kabafiiki munda to.

⁸ Davide kukonka mukalenga Akishe ne: — Mukalenga Akishe, ndi muenze tshinyi? Biangatshile dituku dimvua mutuadije kukuenzela mudimu too ne mpindiewu, udi mua kumbanda ne bualu kaayi, budi bumpumbisha mua meme kuya kuluangana ne baluishi bebe?

⁹ Mukalenga Akishe kuandamuna ne: — Ndi mumanye ne: kuena ne bualu to. Wewe udi munsankishe. Ndi mukumone amu bu mutumibue wa Mvidi Mukulu. Kadi balombodi ba bena mvita ba bena Peleshete bangambidi ne: “Davide kena mua kuikala netu ku mvita to!”

¹⁰ Nanku, ujuke malaba dinda, ne bantu baudi nabu. Nujuke malaba panshi pamane kutoka, nupingane.

¹¹ Butshia dinda, Davide ne bantu bavuaye nabu, kujuka bua kupingana mu ditunga dia bena Peleshete. Kadi bena Peleshete kuya ku tshimenga tshia Yizreyele.