1 Samuele 28 - MUKANDA WA MYIDI MUKULU

¹ Tshikondu atshi, bena Peleshete kusangisha bena mvita babu bonsu mu tshisumbu tshimue, bua kuya kuluisha bena Izrayele. Mukalenga Akishe kuambila Davide ne: — Wewe ne bantu baudi nabu netuye nenu ku mvita eyi.

² Davide kuandamuna ne: — Eyowa, mukalenga wewe nkayebe neudimuene tshindi ngenza. Mukalenga Akishe kuandamuna ne: — Mbimpe bitambe! Nanku ndi nkuteka pabuipi nanyi. Wikale undama meme kashidi.

Shawule udi uya kubuka kudi mukaji wa ku Endore

³ Samuwele mumane kufua, kumujikabu mu tshimenga tshiabu tshia Rama. Bena Izrayele bonsu kumuenzela madilu. Kadi Shawule mu bukalenga buende uvua mumane kukandika bilelu bia kubuka, ne bia kukonka bakishi malu.

⁴ Dituku dikuabu, bena Peleshete kusangisha bena mvita babu. Kuasabu mitanda yabu pabuipi ne Shuneme. Shawule kubikidisha bena mvita ba bena Izrayele. Kuasabu mitanda yabu pabuipi ne mukuna wa Ngilbowa.

⁵ Shawule umona amu mitanda ya bena Peleshete, kumvuaye bowa bikole. Kutuadijaye kuzakala.

⁶ Shawule kukonka Maweja-Nangila tshia kuenza. Kadi Maweja-Nangila kena mumuandamune nansha mu tshilota, nansha ku Urime ne Tumime, nansha kudi muambi.

⁷ Ke Shawule kutumina balombodi ba bena mvita bende diyi ne: — Nunkebele mukaji udi mumanye mua kukonka bakishi malu, bua meme kuya kubuka kudiye. Kumuandamunabu ne: — Mukaji muena lubuku udi ku Endore.

⁸ Shawule kuvualaye bilamba bia patupu bua kabamumanyi to. Kuyaye ku Endore ne bantu babidi. Kufikaye ku nzubu kua mukaji awu butuku, umuambila ne: — Ndi musue, ukonkeku mukishi bualu buanyi. Umbikidileku mukishi undi nkuambila.

⁹ Mukaji muena lubuku kuandamuna ne: — Udi mumanye bimpe ne: bantu bonsu bavua babuka, bakonka bakishi malu, mukalenga Shawule mmumane kubabutula mu ditunga diende. Wewe udi mufike kundi ne budimu bua kunshipesha anyi?

¹⁰ Shawule kumuambila ne: — Bu mudi Maweja-Nangila ne muoyi, ndi nditshipa ne: kabena bakushipa bua bualu ebu to.

¹¹ Mukaji kukonka Shawule ne: — Udi musue nkubikidile mukishi wa nganyi? Shawule kuandamuna ne: — Umbikidile mukishi wa Samuwele.

¹² Mukaji umona mukishi wa Samuwele, kuelaye diyi dikole, ukonka Shawule ne: — Wewe udi Shawule! Kadi uvua unshima bua tshinyi?

¹³ Mukalenga Shawule kuandamuna ne: — Kutshinyi to. Ungambile amu tshiudi mumone. Mukaji kuandamuna ne: — Ndi mumone tshintu bu mukishi, upatuka munda mua buloba.

¹⁴ Mukalenga Shawule kukonka ne: — Mukishi awu udi mushindu kaayi? Mukaji kuandamuna ne: — Ndi mumone muntu mukole mukulakaje, muvuale muntumpu. Shawule kumvua ne: mukishi awu ngua Samuwele menemene. Kutuaye mpala panshi ne kanemu.

¹⁵ Mukishi wa Samuwele kukonka Shawule ne: — Meme mumane kuikisha, udi mumbishe bua tshinyi? Udi umbikila bua tshinyi? Shawule kuandamuna ne: — Bualu ndi nkenga bikole. Bena Peleshete mbafike bua kunduisha. Maweja-Nangila mmumane kumbenga. Kena ungandamuna nansha kudi bambi, nansha mu tshilota. Ke pandi mukubikile bua wewe ungambile tshindi mua kuenza.

¹⁶ Mukishi wa Samuwele kukonka Shawule ne: — Udi unkonka meme tshia kuenza bua tshinyi? Udi mumone ne: Maweja-Nangila mmumane kukubenga mmushale muluishi webe.

¹⁷ Maweja-Nangila mmukumbaje bionsu bimvua muambe mu dina diende. Maweja-Nangila mmukunyenge bukalenga buebe bua kubupesha Davide.

¹⁸ Bualu wewe kuvua mutumikile meyi a Maweja-Nangila. Kuvua mubutule bena Amaleke bonsu to. Ke padi Maweja-Nangila ukukengesha lelu mushindu ewu.

¹⁹ Maweja-Nangila neakufile ne bantu bebe bonsu mu bianza bia bena Peleshete. Malaba, wewe ne bana bebe netuikale nenu mu kandondu ka bafue emu. Bena mvita bebe bonsu nebikale mu bianza bia bena Peleshete.

²⁰ Shawule umvua amu meyi a mukishi wa Samuwele awu, kudishindaye panshi ne bowa bua bungi. Katshivua kabidi ne bukole to, bualu kavua mudie dituku adi dijima too ne butuku.

²¹ Mukaji muena lubuku kusemena pabuipi ne Shawule, kumona ne Shawule, uvua ne bowa bua bungi. Nanku mukaji kuambila Shawule ne: — Mukalenga Shawule, meme ndi muitabe diyi diebe. Ndi mubuele mu njiwu ya lufu bua kukumbaja tshiuvua mundombe.

²² Mpindiewu, wewe unteleje. Ndi nkupesha biakudia, udie, bua wewe kupeta bukole bukumbane bua kupingana kuebe.

²³ Shawule kubenga mua kudia biakudia nansha bikese. Kadi bantu bavuaye nabu ne mukaji muena lubuku, kumusengelela bikole. Nanku kuitabaye. Kujukaye panshi, kusomba pa bulalu.

²⁴ Mukaji muena lubuku kushipa lukasa kana ka ngombe ka mafuta. Kusopaye bukula, kulamba tukata tua mampa.

²⁵ Mukaji muena lubuku kupesha Shawule ne bavuaye nabu biakudia abi. Bobu bamane kudia, kupinganabu amu butuku abu.