1 Samuele 24 - MUKANDA WA MYIDI MUKULU

Davide kena musue kushipa Shawule to

¹ Davide kumuka mu buloba abu, kuyaye kusomba pabuipi ne Engedi, muaba mukole.

² Shawule upingana ku mvita kuvuaye muye kuluisha bena Peleshete, kumvuaye lumu ne: Davide udi mu tshipela tshia Engedi.

³ Kusungulaye bantu binunu bisatu, munkatshi mua bena mvita ba bena Izrayele. Kuyaye nabu, wenda ukeba Davide ne bantu bende, bavua basokome pabuipi ne lubuebue lua mbuji wa mpumbu.

⁴ Shawule upitshila muaba uvua bikumbi bia mikoku pabuipi ne njila, kumonaye lubuebue, kubuelaye mu lubuebue alu bua kusesuka. Kadi, Davide ne bantu bavuaye nabu, bavua basokome munda mua lubuebue alu ku luseke.

⁵ Bantu bavua nabu Davide kumuambila bitekete ku ditshi ne: — Ke dituku divua Maweja-Nangila mukulaye, mukuambile ne: “Dituku dikuabu, nemfile muena lukuna webe mu bianza biebe bua umuenzele muudi musue.” Ke Davide kusemena mu musokoku, kukosaye tshipesa tshia muntumpu wa Shawule.

⁶ Kadi Davide mumane kukosa tshipesa atshi, kuzakalaye bikole.

⁷ Kuambilaye bantu bavuaye nabu ne: — Maweja-Nangila angambuluishe bua tshishipi mfumuanyi Shawule, bu munudi nujinga amu! Bualu Maweja-Nangila nkayende ke uvua musungule Shawule bua kuikalaye mukalenga.

⁸ Ke muvua Davide ubela bantu bende bua kabaluishi Shawule to. Shawule kupatuka mu lubuebue, kutungunuka ne luendu.

⁹ Pashishe Davide kupatuka mu lubuebue, ulonda Shawule. Kumuelaye diyi ne: — Mukalenga Shawule, mukalenga Shawule! Shawule ukenzakana, utangila panyima. Davide kutua mpala panshi ne kanemu,

¹⁰ wela Shawule lusanzu ne: — Mukalenga Shawule, bua tshinyi udi witaba malu adi bantu bakuambila ne: meme Davide ndi nkukeba mua kukuenzela bibi?

¹¹ Lelu ewu, ujadike ne: Maweja-Nangila uvua mukufile mu bianza bianyi mu lubuebue emu. Bakungambila bua meme kukushipa. Kadi meme kukufuila luse. Tshivua musue kukushipa to. Bualu Maweja-Nangila ke uvua mukusungule bua wikale mukalenga.

¹² Tangila, mukalenga wanyi, tangila tshindi mukuate ku bianza etshi. Ndi ne tshipesa tshia muntumpu webe! Ndi mukose anu tshipesa tshia muntumpu webe, kadi tshiena mukushipe to, bua kujadika ne: tshiena ne dijinga dia kukuenzela bibi, nansha kukutombokela. Udi mumone ne: meme Davide tshiena mukuenzele bubi nansha bumue. Anu wewe udi wenda ungipata bua kunshipa.

¹³ Maweja-Nangila nkayende akose tshilumbu tshidi pankatshi petu nebe. Amu yeye akunyoke bua malu mabi audi mungenzele. Kadi, meme tshiena mua kukusombuela to.

¹⁴ Wewe udi mumanye lusumuinu lua bankambua, ludi luamba ne: “Anu bantu babi ke badi benza bibi.” Nanku meme tshiena mua kukuenzela bibi to.

¹⁵ Mukalenga Shawule, uudi wenda ukeba nenku nnganyi? Udi wenda unkeba anu meme Davide. Kadi, meme ndi anu bu mbua mumane kufua, nansha bu tshipu!

¹⁶ Nanku, Maweja-Nangila neatulumbuluishe nebe. Yeye antangile, angakuile. Neakose tshilumbu tshianyi. Neansungidile mu bianza biebe.

¹⁷ Davide ujikija kuakula, Shawule kumukonka ne: — Mulunda wanyi Davide, udi wakula nanku ngwewe menemene anyi? Shawule kudila muadi bikole.

¹⁸ Pashishe kuambaye ne: — Wewe Davide udi mubinge, meme ndi mupile. Wewe Davide udi mungenzele bimpe. Meme ndi mukuenzele bibi.

¹⁹ Lelu, wandeji ne: kuena nanyi ne bualu. Maweja-Nangila uvua mmufile mu bianza biebe, kadi kuena munshipe to.

²⁰ Padi muntu ukuata muluishi wende, udi mua kumulekela anu katakata anyi? Kabiena mua kuenzeka to. Nanku, Maweja-Nangila akufute bua malu audi mungenzele lelu aa.

²¹ Ndi mumanye ne: dituku dikuabu, wewe newikale mukalenga. Kabidi, pawikala mukalenga, bukalenga bua bena Izrayele nebushindame.

²² Nanku utshipe mu dina dia Maweja-Nangila, bua pangikala mumane kufua, ushale kulama ndelanganyi yanyi bimpe, bua dina dianyi ne dia bena diku dianyi kadijiminyi kashidi to.

²³ Davide kuditshipa. Pashishe, Shawule kupingana kuende. Davide ne bantu bavuaye nabu kupingana ku mukuna, muaba uvuabu basokome.