1 Samuele 23 - MUKANDA WA MYIDI MUKULU

¹ Dituku dikuabu, kuambilabu Davide ne: Bena Peleshete badi baluisha bena mu tshimenga tshia Keyila, bibamu ntete ya kuenza bukula idi bantu bashala nayi.

² Ke Davide kukonka Maweja-Nangila ne: — Ndi ne bua kuluisha bena Peleshete aba anyi? Maweja-Nangila kuandamuna ne: — Eyowa, ubaluishe! Nanku neusungidile bena Keyila.

³ Bantu bavua Davide nabu, kumuambila ne: — Tangila, munemu mu bena Yuda, tudi bamane kuikala ne bowa! Kadi, tuetu baya mu tshimenga tshia Keyila bua kuluisha bena Peleshete, nebikale bibi bitambe.

⁴ Davide kukonka Maweja-Nangila tshiakabidi, Maweja-Nangila kuandamuna ne: — Juka, uye mu tshimenga tshia Keyila! Nemfile bena Peleshete mu bianza biebe.

⁵ Nanku, Davide ne bavuaye nabu, kuyabu mu tshimenga tshia Keyila, kuluisha bena Peleshete. Kubatshimunabu, kushipabu bantu ba bungi ba kudibu. Kunyengabu bimuna biabu. Ke muvua Davide musungidile bena mu tshimenga tshia Keyila nanku.

⁶ Tshikondu tshivua Abiyatare, muana wa mutuangaji Akimeleke, munyemena kudi Davide mu tshimenga tshia Keyila, uvua mufike ne bintu bia tshijila bidi biambuluisha bua kukonka Maweja-Nangila malu.

⁷ Shawule kumvua lumu ne: Davide mmumane kubuela mu tshimenga tshia Keyila, kuambaye ne: — Mvidi Mukulu wafidi Davide mu bianza bianyi, bualu Davide padiye mubuele mu tshimenga tshidi ne biibi bikole, mmubuele mu buteyi.

⁸ Shawule kubikidisha bena mvita bende bonsu bua kuya kuluisha Davide ne bantu bavuaye nabu mu Keyila.

⁹ Davide kumvua lumu ne: Shawule mmumuelele tshifufu tshibi. Nanku, kutumaye diyi bua mutuangaji Abiyatare afike ne bintu bia tshijila bua kukonkabu Mvidi Mukulu bualu abu.

¹⁰ Pashishe Davide kukonka ne: — Maweja-Nangila, Mvidi Mukulu wa bena Izrayele, ndi mumvue lumu ne: Shawule udi udilongolola bua kufika munemu mu Keyila, bua kubutula tshimenga etshi bualu buanyi meme.

¹¹ Kadi, pikala Shawule mufike bua kuluisha tshimenga, bu mundi mumvue lumu emu, bena tshimenga tshia Keyila nebanufile mu bianza bia Shawule anyi? Maweja-Nangila Mvidi Mukulu wa bena Izrayele, ndi nkusengelela ne: ungandamuneku. Maweja-Nangila kuandamuna ne: — Shawule neafike.

¹² Davide kukonka kabidi ne: — Meme ne bantu bandi nabu, bena tshimenga tshia Keyila nebatufile kudi Shawule anyi? Maweja-Nangila kuandamuna ne: — Eyowa, nebanufile kudi Shawule.

¹³ Ke Davide ne bantu bavuaye nabu bu nkama isambombu, kumuka mu tshimenga tshia Keyila, kuya benda balalakana mu njila. Shawule kumvua lumu ne: Davide katshiena mu tshimenga tshia Keyila to, mmumane kunyema. Nanku kulekelaye mvita.

¹⁴ Davide kuya mu tshipela tshia Zife, kusomba mu mbuebue ivua ku mikuna. Dituku dionsu, Shawule uvua anu ukeba Davide. Kadi Mvidi Mukulu kavua musue kufila Davide mu bianza bia Shawule to.

¹⁵ Davide umona ne: Shawule udi wenda unkeba ne mvita bua kunshipa, kusombaye ku Orsha mu tshipela tshia Zife.

¹⁶ Dituku dikuabu, Yonatane, muana wa Shawule kufika muaba uvua Davide ku Orsha. Kukoleshaye Davide ku muoyi bua ikale mutekemena anu kudi Mvidi Mukulu.

¹⁷ Kuambilaye Davide ne: — Kuena mua kutshina to. Tatu wanyi Shawule kena mua kukupeta to. Wewe newikale mukalenga wa bena Izrayele. Meme nengikale anu tshindonda tshiebe. Tatu mmumanye bionsu ebi.

¹⁸ Yonatane ne Davide kutua ndondu wa bulunda mu dina dia Maweja-Nangila. Ke Yonatane kupingana kuende, Davide kushalaye ku Orsha.

Shawule udi ulondakaja Davide

¹⁹ Bena mu Zife kuya ku Ngibeya kuvua Shawule, bamuambila ne: — Kuena mumanye ne: Davide mmusokome mu buloba buetu mu mbuebue idi ku mikuna ya Akila, pabuipi ne Orsha, kuinshi kua tshipela anyi?

²⁰ Nanku, mukalenga, pawikala musue kumukuata, ufike. Tuetu netumukuate, tumufile mu bianza biebe.

²¹ Shawule kubambila ne: — Maweja-Nangila anuele lupemba, bua luse lunudi bamfuile.

²² Mpindiewu, pinganayi, nuye kulondesha bualu ebu. Nujadike muaba menemene udi Davide musokome, numanye muntu uvua mumumone mu muaba awu. Bualu mbamane kungambila ne: Davide mmudimuke bikole.

²³ Nujadike miaba yonsu idiye mua kunyemena. Pashishe, nupingane kundi, nuenu bamane kujadika bionsu ebi bimpe. Nanku netuye nenu. Pikalaye mu ditunga adi, nemmukuate, nansha bu meme ne bua kumukeba miaba yonsu mu buloba bua bena Yuda.

²⁴ Bena mu Zife kumuka kudi Shawule, kupingana kuabu. Matuku awu, Davide uvua mu tshibandabanda mu tshitupa tshia kuinshi tshia tshipela tshia Mayone,

²⁵ Shawule ne bena mvita bende kuya kukeba Davide. Kuambilabu Davide bualu abu. Kuyaye kusomba mu lubuebue lunene luvua mu tshipela tshia Mayone. Shawule umanya ne: Davide udi muaba awu, kutuadijaye kumulondakaja mu buloba abu.

²⁶ Shawule ne bena mvita bende bavua benda basemena luseke lua mukuna. Davide ne bantu bavuaye nabu bavua benda babanda luseke lukuabu. Bualu bavua banyema bua kudipandisha kudi Shawule ne kudi bena mvita bende. Shawule uvua musue kubeela munkatshi bua kubakuata.

²⁷ Kadi muntu kufika muaba awu, kuambila Shawule ne: — Luaku lukasa, bena Peleshete badi baluisha bena ditunga!

²⁸ Diakamue Shawule kulekela kulondakaja Davide. Kupinganaye bua kuluisha bena Peleshete. Ke padibu babikila muaba awu ne: “Lubuebue lua Dishiyangana.”