1 Samuele 20 - MUKANDA WA MYIDI MUKULU

Yonatane udi usungidila Davide

¹ Davide kumuka ku Nayote pabuipi ne Rama, kuya kudi Yonatane, muana wa Shawule, umukonka ne: — Mbualu bubi kaayi bundi muenze? Ntshilema kaayi tshindi muenzele tatuebe? Shawule udi ukeba kunshipa.

² Yonatane kuandamuna ne: — Nansha kakese. Kuena mua kulua to. Tatu kena muanji kuenza bualu nansha bumue, kayi muanji kubungambila. Kadi, uvua munsokoke bualu buudi wamba abu bua tshinyi? Kabiena mua kuenzeka to.

³ Davide kuambila Yonatane ne: — Ndi nditshipa, nkujadikila ne: tatuebe udi unkebela lufu! Kadi, tatuebe mmumanye ne: meme Davide ndi mulunda webe. Ke padiye wamba ne: Ki mbimpe bua Yonatane amanye bualu ebu to. Bualu neanyingalale bikole. Nanku, bu mudi Maweja-Nangila ne muoyi, ne bu muudi wewe Yonatane ne muoyi, ndi nkujadikila ne: nkushala anu katupa kakese bua tatuebe kunshipa.

⁴ Ke Yonatane kukonka Davide ne: — Udi musue nkuenzele tshinyi?

⁵ Davide kumuandamuna ne: — Malaba ne kuikala tshibilu tshia dibala dia ngondu mupiamupia. Meme mvua ne bua kuikala ku didia dia tshibilu atshi didi mukalenga mulongolola. Kadi, anyisha bua meme kumuka malaba, ne dituku didi dilonda. Nennye kusokoma mu tshisuku too ne ku dilolu dia dituku dibidi adi.

⁶ Padi tatuebe umona ne: meme tshienapu to, neumuambile ne: Davide mmundombe dianyisha bua kuya lukasa ku Betleyeme mu tshimenga tshiabu tshimulela, bua kudisangisha ne bena diku diabu bonsu, ku mulambu wa ku tshidimu tshionsu.

⁷ Pikala tatuebe Shawule muitabe, umanye ne: kakuena bualu. Tshiena mfua to. Kadi, pikalaye mufike munda, neumanye ne: tatuebe mmumane kujadika bua kunshipa.

⁸ Nanku, wewe undeje muudi munnange. Bualu tudi batue nebe ndondu wa bulunda mu dina dia Maweja-Nangila. Pangikala muenze bualu bubi bua mushindu kaayi, unshipe wewe nkayebe pa mutu pa kumfila kudi tatuebe Shawule.

⁹ Yonatane kuandamuna ne: — Tshiena mua kukufila kudi tatu nansha kakese! Kadi ndi nditshipa ne: pangikala mumvue ne: tatu mmumane kujadika bua kukuenzela bibi, neukumanyishe.

¹⁰ Davide kumukonka ne: — Pikala tatuebe mubandamune bibi, mukukanyine, neutume nganyi bua kungambilaye?

¹¹ Yonatane kumuambila ne: — Luaku, tupatuke pambelu. Nanku, kuyabu bonsu mu mpata.

¹² Yonatane kuambila Davide kabidi ne: — Mu dina dia Maweja-Nangila Mvidi Mukulu wa Izrayele, ndi nkulaya ne: malaba nansha dituku didi dilonda, anu pa diba ditudi nebe edi, nenkonke tatu bua meme kumanya meji adi munda muende. Pikala tatu kayi ne bualu, meme tshiena nkumanyisha bualu to.

¹³ Kadi, pikalaye musue kukuenzela bibi, pangikala tshiyi mukumanyishe, Maweja-Nangila annyoke ne dinyoka dikole. Diba adi nenganyishe bua wewe kuya. Neuye bimpe kabayi bakuatshisha to. Ndi njinga ne: Maweja-Nangila ikale nebe muvuaye ne tatu wanyi Shawule.

¹⁴ Kunyima kua matuku, pangikala anu ne muoyi, wewe Davide ungenzele bimpe mu dina dia Maweja-Nangila bua nshale ne muoyi.

¹⁵ Tshikondu tshidi Maweja-Nangila ubutula baluishi bebe pa buloba, ku umue ku umue, wafuilaku kabidi ndelanganyi yanyi luse.

¹⁶ Ke Yonatane kutua ndondu wa bulunda ne Davide, kabidi ne bena nzubu wa Davide, ubambila ne: “Maweja-Nangila nkayende asombuele bena lukuna ba Davide.”

¹⁷ Yonatane kuambila kabidi Davide bua aditshipe bua kujadika mudiye munange Yonatane. Bualu Yonatane uvua munange Davide ne muoyi mujima.

¹⁸ Yonatane kuamba kabidi ne: — Malaba, nebamone ne wewe Davide kuena mu tshibilu tshia dibala dia ngondu mupiamupia to. Bualu ku mesa, nkuasa webe neashale munda mutupu.

¹⁹ Dituku didi dilonda upueka too ne ku muaba uuvua musokome dituku dikuabu. Wimane pabuipi ne dibue dia Ezele.

²⁰ Meme Yonatane, nengele miketa isatu luseke alu, bu udi ukeba kuasa tshintu.

²¹ Pashishe nentume muana muena mudimu wanyi, bua kukeba miketa ayi. Pangambila muena mudimu ne: “Tangila, miketa kayena kule to, pingana uyangule,” neujadike ne: kakuena bualu to. Diba adi udi mua kupingana bualu kakuena njiwu to. Ndi nkujadikila bualu ebu, kumpala kua Maweja-Nangila.

²² Kadi, pangambila muena mudimu ne: “Miketa idi kule kupita,” wewe ulunguluke, bualu Maweja-Nangila mmusue bua wewe kuya.

²³ Nanku ndondu wa bulunda utudi batue nebe, anu Maweja-Nangila nkayende atuambuluishe bua tuetu kumukumbaja kashidi.

²⁴ Davide kuya kusokoma mu madimi. Dituku dia tshibilu tshia dibala dia ngondu mupiamupia, dilolu, mukalenga Shawule kusomba ku mesa bua kudia.

²⁵ Bu pa tshibidilu, uvua musombe mu nkuasa uvuabu bamulongoluela pabuipi ne tshimana. Abnere, mfumu mulombodi wa bena mvita, kusomba ku luseke lua Shawule. Yonatane kusomba mutangilangane ne Shawule. Kadi, nkuasa wa Davide uvua mutupu.

²⁶ Dituku adi, Shawule kena muebeje bualu to. Uvua wela meji ne: Davide kena mufike, bualu udi mua kuikala ne mikiya ya mu mpukapuka.

²⁷ Kadi, dituku dibidi dia tshibilu, Shawule umona kabidi mu nkuasa wa Davide mutupu, kamuyi muntu, kukonkaye Yonatane ne: — Davide kena mufike ku didia dia tshibilu makelela ne lelu bua tshinyi?

²⁸ Yonatane kuandamuna ne: — Davide uvua mundombe bikole bua kuyaye ku Betleyeme, ungambila ne:

²⁹ “Yonatane, ndi nkulomba bua meme kuya ku Betleyeme. Tudi ne mulambu ne bena nzubu wetu. Mukuluanyi mmutumine diyi bua ngikale muaba awu. Pangikala mulunda webe, wanyisha bua meme kuya ku Betleyeme bua kumonangana ne bana betu.” Ke padi Davide kayi mufike ku biakudia bia tshibilu biudi mulongolole mu nzubu muebe.

³⁰ Shawule kufikila Yonatane munda bikole, umupenda ne: — Kana kalela kudi mbua! Ndi mumanye ne: udi musungule Davide, muana ewu wa Ishayi, bua kuikalaye mulunda webe. Kadi umanye ne: wewe ne mamuebe, bundu nebunukuate.

³¹ Kadi, teleja bimpe. Patshidi mulumiana ewu, muana wa Ishayi ne muoyi, umanye ne: kuena mua kujadika ne newikale mukalenga to. Nanku utume diyi, bakuate Davide, bafike nende apa, bualu udi ne bua kufua.

³² Yonatane kukonka ne: — Udi ne bua kufua bua tshinyi? Tshidiye muenze tshibi ntshinyi?

³³ Shawule kuela difuma bua kuasa Yonatane. Nanku, Yonatane kumanya ne: tatuende Shawule mmupangidike bulelela bua kushipa Davide.

³⁴ Kujukaye ku mesa ne tshiji tshikole, kushiyaye bivuaye udia. Dituku adi dibidi dia tshibilu, Yonatane kena mudie tshintu nansha tshimue to. Bualu uvua ne dipampakana bua Davide uvuabu bapenda bikole kudi Shawule.

³⁵ Butshia dinda, Yonatane kuya dinda mu tshisuku, muaba uvuabu bambilangane ne Davide. Bavua ne muana muena mudimu wende.

³⁶ Yonatane kuambila muena mudimu wende ne: — Nyema, uye kumpala, bua wangula miketa indi ngela eyi. Muena mudimu kuya. Yonatane kuela muketa bikole bua kupitawu muena mudimu.

³⁷ Patshivua muena mudimu uya muaba uvua muketa mumate, Yonatane kumuambila ne: — Mukete utshidi kumpala kuebe mutantshi mule.

³⁸ Nyema kolesha, kuimanyi to. Muena mudimu kuangula muketa. Kupinganaye nawu kudi mfumuende Yonatane.

³⁹ Kadi kavua mumvue bualu to. Anu Yonatane ne Davide ke bavua bumvue.

⁴⁰ Yonatane kupeshaye muena mudimu buta buende ne miketa. Pashishe, kumutuminaye diyi bua aye nabi mu tshimenga.

⁴¹ Muena mudimu mumane kuya, Davide kupatuka muaba uvuaye musokome, kuinshi kua dibue. Kutuaye mpala panshi misangu isatu kumpala kua Yonatane. Pashishe, kupukilanganabu, badila muadi bikole.

⁴² Ke Yonatane kuambila Davide ne: — Uye bimpe. Kadi uvuluke ndondu wa bulunda utudi batue nebe mu dina dia Maweja-Nangila, tuamba ne: “Anu Maweja-Nangila nkayende atuambuluishe bua tukumbaje ndondu ewu nebe kashidi, too ne ku ndelanganyi yetu.”