1 Samuele 18 - MUKANDA WA MYIDI MUKULU

¹ Davide ujikija kuyukila ne Shawule, Yonatane, muana wa Shawule, kutuadija kunanga nsongalume awu bikole. Kumunangaye bu mudi muntu udinanga mene.

² Dituku adi, Shawule kulama Davide, kena mumulekela bua kupinganaye kudi tatuende to.

³ Kadi bu muvua Yonatane munanga Davide bikole, kutuabu ndondu wa bulunda kashidi.

⁴ Yonatane kuvula tshinkutu tshivuaye muvuale, kutshipesha Davide. Kumupeshaye kabidi bilamba biende bia mvita, muela wa mvita, buta bua miketa, ne mukaba uvuaye muvuale.

⁵ Misangu yonsu, ivua Shawule utuma Davide mu mvita, Davide uvua amu utshimuna. Ke muvua Shawule mumuteke mfumu, mulombodi wa bena mvita bende. Bena mvita bonsu, ne balombodi ba bena mvita ba mukalenga Shawule kusanka bikole bua bualu ebu.

Shawule udi ukeba kushipa Davide

⁶ Pavua bena mvita bafuma ku mvita, Davide mumane kushipa Ngoliyate muena Peleshete, ke bakaji ba mu bimenga bionsu bia bena Izrayele kufika bua kuakidila mukalenga Shawule. Bavua bimba misambu, baja maja, balonda dikasa dia ngoma ne bisanji, bela mbila ya disanka.

⁷ Bavua batuma misambu, bapunguluja, bela mbila ne disanka ne: “Shawule mmushipe baluishi tshinunu. Davide mmushipe binunu makumi ne makumi.”

⁸ Shawule uvua ne tshiji tshikole, mufike munda bua musambu awu. Uvua udiambila munda ne: “Badi batumbisha Davide ne: mmushipe bantu binunu makumi ne makumi, meme bantumbisha anu bua tshinunu.

⁹ Tshidi tshishale mpindiewu, mbua kupabu Davide bukalenga ebu!” Biangatshile diba adi, Shawule uvua utangila Davide ne muoyi mubi.

¹⁰ Butshia dinda, mukishi mubi mutuma kudi Mvidi Mukulu kutulukila Shawule. Kuendakanaye mu nzubu muende bu muntu mupale. Davide uvua umuimbila lunkombe, bu muvuaye wenza misangu yonsu. Shawule uvua mukuate difuma diende mu tshianza.

¹¹ Diakamue Shawule kufuna ne difuma, udiambila ne: “Ndi mbambila Davide ku tshimana eku.” Shawule kuela difuma misangu ibidi, Davide kupanduka.

¹² Shawule kutshina Davide. Bualu uvua mujadike ne: Maweja-Nangila mmumane kumbenga, musungule amu Davide.

¹³ Ke Shawule kumusha Davide pabuipi nende. Kumutekaye mfumu wa tshisumbu tshia bena mvita bende. Biangatshile diba adi, Davide uvua anu mu mvita, ulombola bena mvita.

¹⁴ Nanku, Davide uvua ne diakalenga mu midimu yonsu iwaye wenza, bualu Maweja-Nangila uvua umuambuluisha.

¹⁵ Pavua Shawule umvua ne: Davide udi ne diakalenga mu midimu yonsu iwaye wenza, uvua utshina Davide bikole.

¹⁶ Kadi bena Izrayele bonsu ne bena Yuda bavua banange Davide bikole. Bualu Davide uvua ubalombola bimpe mu mvita.

Davide udi usela Mikale, muana wa Shawule

¹⁷ Shawule kudiambila munda ne: “Meme tshiena musue kushipa Davide to. Bena Peleshete nebamushipe.” Nanku, Shawule kuambila Davide ne: — Merabe, muananyi wa bakaji muanabute, nyeye ewu. Pawikala mungenzela mudimu ne dikima, pawikala muluangana mvita mu dina dia Maweja-Nangila, ndi nkupesha muananyi ewu bua ikale mukajebe.

¹⁸ Davide kuandamuna ne: — Mukalenga, meme ndi muntu tshianana. Bena diku dia tatu, ne bena nzubu wetu, badi anu bantu tshianana. Kadi, meme nengikale muku wa mukalenga mushindu kaayi?

¹⁹ Kadi, tshikondu tshivuabu ne bua kufila Merabe kudi Davide bua ikale mukajende, Shawule kufila muanende awu kudi Adriyele, wa mu Abele-Mekola.

²⁰ Kadi, Mikale, muana wa bakaji mukuabu wa Shawule, kunanga Davide bikole. Kuambilabu Shawule bualu ebu, kusankaye bikole.

²¹ Uvua udiambila munda ne: “Ndi musue kufila Mikale kudi Davide bua ikale mukajende. Nanku, Mikale neikale bu buteyi kudi Davide, bua kumushipabu kudi bena Peleshete.” (Nanku misangu ibidi, Shawule uvua anu wambila Davide bua ikale muku wende.)

²² Shawule kuambila balombodi ba mu bukalenga buende ne: — Nuyukile ne Davide mu musokoku. Numuambile ne: Mukalenga Shawule udi ukuanyisha bikole. Tuetu balombodi ba mu bukalenga buende tudi bakunange bikole. Nanku, itabe mpindiewu bua wikale muku wa mukalenga Shawule.

²³ Balombodi ba mu bukalenga bua Shawule kuambila Davide bionsu abi. Kubakonkaye ne: — Bua meme muntu mupele, tshiyi ne tshindi natshi, kushala muku wa mukalenga, nuenu nudi bamone ne: mbualu bukese anyi?

²⁴ Balombodi ba mu bukalenga kuya kuambila mukalenga bivua Davide muambe.

²⁵ Ke Shawule kubatuma ne: — Ambilayi Davide ne: “Mukalenga Shawule kena ukulomba lupetu lua tshibidilu bua dibaka edi to. Kadi, udi ukulomba anu makoba lukama a misosu ya bena Peleshete, bua kusombuelaye baluishi bende.” Shawule uvua wela meji ne: ke mudibu mua kushipa Davide kudi bena Peleshete.

²⁶ Balombodi ba mu bukalenga kuambila Davide bionsu abi. Davide kuitaba bivuabu bamulomba bua kuikalaye muku wa mukalenga. Matuku avua mukalenga Shawule mumukosela kaayi manji kukumbana,

²⁷ Davide ne bena mvita bavuaye nabu kuya mu mvita, kushipa bena Peleshete nkama ibidi. Davide kuangata makoba a misosu yabu, kuya nawu kua Shawule bua baabale bungi buawu, bua kushalaye muku wende. Ke Shawule kupesha Davide muanende wa bakaji Mikale, bua ikale mukajende.

²⁸ Shawule mumane kujadika ne: Maweja-Nangila udi ne Davide bulelela, kabidi Mikale muananyi wa bakaji, mmunange Davide bikole,

²⁹ kumutshinaye bikole bipite, kushalaye nende lukuna kashidi.

³⁰ Tshikondu atshi, bamfumu ba bena Peleshete kuya mu mvita bua kuluangana ne bena Izrayele. Kadi mu mvita yonsu, Davide uvua upete anu tshipeta tshimpe, tshipite tshia balombodi ba bena mvita ba Shawule bakuabu bonsu. Ke muvuaye mupete lumu lunene kudi bantu.