1 Samuele 16 - MUKANDA WA MYIDI MUKULU

Davide mukalenga mupiamupia

¹ Maweja-Nangila kuambila Samuwele ne: — Neushale anu ne tshiji musangu mule bua Shawule, pandi meme mumane kumubenga, bua kashadi mukalenga wa bena Izrayele anyi? Angata mafuta, uye nawu. Ndi nkutuma kua Ishayi ku Betleyeme. Bualu ndi musungule mukalenga undi musue, munkatshi mua bana bende ba balume.

² Samuwele kukonka ne: — Nengenze munyi? Pangikala mufike ku Betleyeme, Shawule neamanye bualu ebu. Neanshipe. Maweja-Nangila kuambila Samuwele ne: — Angata muana wa ngombe. Pawafika, newambe ne: ndi mufika bua kulambula Maweja-Nangila mulambu.

³ Ubikidishe Ishayi ku mulambu awu. Meme Maweja-Nangila nenkuleje tshiudi mua kuenza. Muntu ungikala mukuleje awu, neumujidile mukalenga, bua kungenzelaye mudimu. Amuwele kuitaba, kuya ku Betleyeme. Bakulu ba mu tshimenga bamumona, kupampakanabu bikole. Kuyabu kumuakidila, bamukonka ne: — Udi mufike munemu bua kutuambilaku bualu bua disanka anyi?

⁵ Samuwele kuandamuna ne: — Eyowa, ndi mufike bua kulambula Maweja-Nangila mulambu. Nanku, nujikije mikiya yonsu inudi nayi, bua tuye nenu. Samuwele kubikidisha kabidi ne Ishayi ne bana bende ba balume, bua bajikije mikiya yabu, badisanga nende ku mulambu.

⁶ Ishayi ne bana bende bamane kufika, Samuwele kumona Eliyabe. Kudiambilaye munda ne: “Bulelela, ke udi Maweja-Nangila musungule ewu.”

⁷ Kadi, Maweja-Nangila kuambila Samuwele ne: “Kutangidi buimpe bua mpala, nansha bule bua muntu. Meme tshiena mumusungule to. Meme tshiena ntangila, mudi bantu batangila to. Bantu badi batangila amu mpala, ne mushindu udi muntu. Kadi meme ndi ntangila too ne munda mua muntu.”

⁸ Ke Ishayi kubikidisha Abinadabe, ku-mupitshisha kumpala kua Samuwele, Samuwele kuamba ne: — Maweja-Nangila kena musungule nansha ewu to.

⁹ Ishayi kupitshisha Shama. Kadi Samuwele kuamba ne: — Maweja-Nangila kena musungule nansha ewu to.

¹⁰ Ishayi kupitshisha bana bende ba balume muanda mutekete kumpala kua Samuwele, Samuwele kumuambila ne: — Ku bana aba, Maweja-Nangila kena musungule muana nansha umue.

¹¹ Ke Samuwele kukonka Ishayi ne: — Bana bebe bonsu badi muaba ewu anyi? Ishayi kuandamuna ne: — To! Nkushale anu Davide, muana a mukala, udi ulama mikoku. Samuwele kutuma diyi ne: — Muntu aye kukeba muana awu. Katuena mua kutuadija kudia bia ku mulambu, muana awu kayi muanji kufika.

¹² Ke Ishayi kubikidisha muana awu. Nsongalume awu uvua ne mubidi mukunze, ne mpala muimpe mutambe, mesu abalakana. Ke Maweja-Nangila kuambila Samuwele ne: “Ke muana undi musungule ewu. Umujidile bua kuikalaye mukalenga.”

¹³ Samuwele kuambula mafuta, kuela Davide pa mutu bua kumujidila, bana babu batangile. Mueyelu wa Maweja-Nangila kutulukila Davide, kushalawu nende biangatshile dituku adi too ne kashidi. Pashishe Samuwele kupingana ku Rama.

¹⁴ Mueyelu wa Maweja-Nangila kumuka kudi Shawule. Maweja-Nangila kutumina Shawule mukishi mubi bua kumukengeshawu.

¹⁵ Bena mudimu ba Shawule kumuambila ne: — Tudi bamone ne: mukishi mubi udibu bakutumina kudi Maweja-Nangila, udi ukukengesha.

¹⁶ Nanku, tuma diyi, tuye kukukebela muntu udi mumanye mua kuimba lunkombe. Pikala mukishi mubi mukutulukile, muena lunkombe neakuimbile bua umvue bimpe.

¹⁷ Shawule kuandamuna ne: — Eyowa, ndi muanyishe. Nkebelayi muntu udi mumanye mua kuimba lunkombe bimpe. Nufike nende kundi.

¹⁸ Muena mudimu mukuabu kuamba ne: — Ndi mumanye muntu, muana wa Ishayi, muena mu Betleyeme. Udi mumanye mua kuimba lunkombe bimpe. Udi kabidi muntu wa mushinga mukole, mumanye mvita, mumanye mua kuakula ne meji. Udi ne mpala muimpe mutambe. Kabidi Maweja-Nangila udi nende.

¹⁹ Shawule kutuma bantu bua bambile Ishayi ne: “Ntumina muanebe wa balume Davide, udi ulama mikoku.”

²⁰ Ishayi kuangata nyama wa mpunde, kutekapu mampa, mulondu wa biseba muela maluvu a mvinyo tente, ne muana mbuji. Kupeshaye Davide bintu abi bua kutuadilaye Shawule.

²¹ Anu Davide ufika kua Shawule, kutuadijaye kumuenzela mudimu. Shawule kunanga Davide bikole. Kumupaye mudimu wa kumuambuila bia mvita biende.

²² Ke Shawule kutumina Ishayi diyi ne: “Ndi musue bua Davide ashale anu ku mudimu wanyi, bualu ndi mumuanyishe bikole.”

²³ Biangatshile musangu awu, pavua mukishi mubi, mutuma kudi Maweja-Nangila, utulukila Shawule, Davide uvua wambula lunkombe, umuimbila. Nanku Shawule uvua umvua bimpe, upeta dikisha, mukishi mubi umuka.