1 Samuele 15 - MUKANDA WA MYIDI MUKULU

Mvidi Mukulu udi ubenga Shawule

¹ Samuwele kuambila Shawule ne: — Ku kale, Maweja-Nangila uvua muntume bua kukujidila, bua ushale mukalenga wa bantu bende bena Izrayele. Nanku, teleja tshindi musue kukuambila mu dina dia Maweja-Nangila.

² Maweja-Nangila Mvidi Mukulu wa tshiluilu tshia bena Izrayele udi wamba ne: “Ndi muvuluke bionsu bivua bena Amaleke benzela bena Izrayele, pavuabu bapatuke mu bupika mu Ejipitu. Bena Amaleke bavua bajikila bena Izrayele njila.

³ Nanku mpindiewu, wewe Shawule, uye kubaluisha, ubabutule ne bintu bionsu bidibu nabi. Kubafuidi luse to. Ushipe bantu ne nyama bionsu: balume, bakaji, bana batoke, ngombe, mikoku, nyama ya tumelu ne ya mpunde.”

⁴ Shawule kubikidisha bena mvita bende ku Teleme, kutuadijaye kubakenketa ku tshisumbu ku tshisumbu. Bena mvita bavua benda ku makasa bavua binunu nkama ibidi. Tusakidile kabidi bantu bakuabu ba bena Yuda binunu dikumi.

⁵ Shawule kuya ne bena mvita abu pabuipi ne tshimenga tshia bena Amaleke. Kualaminaye bena Amaleke mu mikidi ya mayi a mvula, ukeba kubaluisha kabayi banji kudilongolola.

⁶ Ke Shawule kuambila bena Kayine ne: “Umukayi munkatshi mua bena Amaleke, nuye mutantshi mule. Tshiena musue kunukengesha, bu mundi mbakengesha bobu to. Bualu nuenu nuvua bafuile bena Izrayele luse, pavuabu bapatuke mu Ejipitu.” Nanku bena Kayine kumuka muaba uvua bena Amaleke.

⁷ Ke Shawule kutshimuna bena Amaleke, kubipata biangatshile ku Avila too ne ku Shure, luseke ludi diba dipatukila lua ku Ejipitu.

⁸ Shawule kushipa bantu bonsu, kushiya amu mukalenga wabu Agage. Kumuelaye mu lukanu.

⁹ Shawule ne bena mvita bende bavua bashiye Agage ne muoyi, bashiya kabidi nyama mimpe yonsu ivuabu basungule ku bimuna: ngombe, mikoku, nyama ivua ne mafuta, ne bana ba mikoku. Bavua bashipa amu nyama mibi ivua kayiyi ne diambuluisha to.

¹⁰ Ke Maweja-Nangila kuambila Samuwele ne:

¹¹ — Ndi ne kanyinganyinga bua Shawule undi musungule bua kuikalaye mukalenga. Shawule mmumbenge. Kena utumikila mikenji yanyi to. Bualu abu kutonda Samuwele bikole. Kutendelelaye Maweja-Nangila butuku bujima.

¹² Butshia dinda, Samuwele kuya kumonangana ne Shawule. Kumuambilabu ne: “Shawule mmuye ku Karmele, bua kuimanyika dibue dia kuikala bamuvulukila. Pashishe neatungunuke ne luendu too ne ku Ngilgale.”

¹³ Samuwele ufika pabuipi ne Shawule. Shawule kumuambila ne: — Maweja-Nangila akuele lupemba! Ndi mukumbaje bionsu bivua Maweja-Nangila mungambile.

¹⁴ Samuwele kukonka Shawule ne: — Miadi ya mikoku ne ya ngombe indi ngunwua idi ifuma penyi?

¹⁵ Shawule kuandamuna ne: — Bena mvita mbasungule nyama mimpe ya bena Amaleke, bafike nayi muaba ewu, bua kuyilambula Maweja-Nangila Mvidi Mukulu webe. Kadi bintu bikuabu bionsu tudi babishipe.

¹⁶ Samuwele kumukosa ku diyi ne: — Puwa. Ndi musue kukuambila bionsu bidi Maweja-Nangila mummanyishe butuku bua lelu. Shawule kuandamuna ne: — Ambaku.

¹⁷ Samuwele kumuambila ne: — Ku kale uvua mudimone muntu tshianana. Mpindiewu udi mukalenga wa bisamba bionsu bia bena Izrayele. Maweja-Nangila nkayende ke uvua mukujidile bua wikale mukalenga wa bena Izrayele.

¹⁸ Kadi, Mvidi Mukulu uvua mumane kukuambila tshiudi ne bua kuenza. Uvua mukutume bua wewe kushipa bena Amaleke, bena buenzayi, bua wewe kuluangana nabu mvita, too ne pabutukabu bonsu bua buenzayi buabu.

¹⁹ Kuena mutumikile diyi dia Maweja-Nangila bua tshinyi? Udi muangate bintu bia bena Amaleke bua kufikisha Maweja-Nangila munda bua tshinyi?

²⁰ Shawule kuandamuna ne: — Meme ndi mutumikile diyi dia Maweja-Nangila. Ndi muenze bionsu bivuaye mungambile. Ndi mushipe bena Amaleke bonsu. Ndi mushiye anu mukalenga wabu Agage, undi mufike nende muaba ewu.

²¹ Kadi pikala bena mvita banyi basungule nyama ivua mimpe mitambe munkatshi mua mikuabu ivuabu bashipe, bavua basungula nyama ayi anu bua kuyilambula Maweja-Nangila Mvidi Mukulu webe munemu mu Ngilgale.

²² Samuwele kukonka Shawule ne: — Maweja-Nangila udi usanka bua milambu ya bungi idibu bamulambula, anyi udi usanka bua mikenji yende idibu batumikila? Milambu kayena imusankisha to. Bualu, kutumikila Maweja-Nangila, kuenza tshidiye muambe, nkupite milambu ya nyama, nansha yoyi ne mafuta a bungi.

²³ Kadi kubenga kutumikila, nkuenza bualu bubi amu bu mudi kubuka lubuku. Kubenga kuitaba Maweja-Nangila, nkuenza bualu bubi anu bu mudi kutendelela mvidie. Nanku, bu muudi mubenge mua kutumikila mikenji ya Maweja-Nangila, wakubengi. Kuakuikala kabidi mukalenga wa bantu bende bena Izrayele to.

²⁴ Shawule kuandamuna ne: — Ndi muenze bibi. Tshiena mutumikile diyi dia Maweja-Nangila, tshiena muteleje mibelu yebe wewe. Kadi mvua ne bowa, ntshina bena mvita. Ke pandi muenze bionsu bivua bena mvita bajinga.

²⁵ Mpindiewu ndi nkutendakena, umfuile luse bua bubi ebu. Tupingane nebe ku Ngilgale bua meme kutendelela Maweja-Nangila.

²⁶ Samuwele kuandamuna ne: — Nansha! Tshiena mua kuya nebe to. Bualu udi mubenge kutumikila mikenji ya Maweja-Nangila. Nanku Maweja-Nangila mmumane kukubenga. Kuakuikala kabidi mukalenga wa bena Izrayele to.

²⁷ Samuwele kukudimuka bua kumuka. Kadi Shawule kumukuata kuinshi kua tshinkutu tshivuaye muvuale. Tshinkutu kupandika.

²⁸ Ke Shawule kushala ne tshipesa ku bianza. Samuwele kuambila Shawule ne: — Ke mudi Maweja-Nangila upanda bukalenga bua bena Izrayele, ukunyengabu lelu, bua kubupesha muntu mukuabu wa nsongu mukupite wewe.

²⁹ Maweja-Nangila udi butumbi bua bena Izrayele. Nanku, kena mua kushima, kena mudi muntu udi lelu wamba bualu mushindu, maloba wamba mukuabu.

³⁰ Shawule kumuambila ne: — Ndi mumane kuenza bibi. Kadi ndi nkutendakena ne: unnemekeku kumpala kua bakulu, ne kua bena Izrayele bakuabu bonsu. Tupingane nebe bua meme kuya kutendelela Maweja-Nangila Mvidi Mukulu webe.

³¹ Samuwele kuya nende. Shawule kutendelela Maweja-Nangila.

³² Ke Samuwele kutuma diyi bua bafike ne Agage, mukalenga wa bena Amaleke. Agage kufika ne disanka bualu uvua wela meji ne: “Ndi mumane kupanda ku lufu.”

³³ Kadi Samuwele kuambila Agage ne: “Muela webe wa mvita uvua mushipe bana, bamamu bashale bianza bitupu. Nanku, mamuebe neashale kayi ne muana.” Samuwele kushipa Agage, kumusaya kumpala kua tshilambuilu tshia Maweja-Nangila mu Ngilgale.

³⁴ Samuwele kupingana ku Rama. Shawule kuya kuende ku Ngibeya.

³⁵ Biangatshile diba adi, matuku onsu avua Samuwele ne muoyi, kena mumonangane kabidi ne Shawule to. Samuwele uvua ne kanyinganyinga kakole bualu bua Shawule. Maweja-Nangila uvua unyingalala bua pavuaye musungule Shawule mukalenga wa bena Izrayele.