1 Samuele 14 - MUKANDA WA MYIDI MUKULU

Yonatane udi uluisha bena Peleshete

¹ Dituku dikuabu, Yonatane, muana wa Shawule, kuambila nsongalume uvua umuambuila bia mvita biende ne: — Luaku, tuye too ne kudi tshisumbu tshia mvita tshia bena Peleshete tshidi dishiya kuaka, batangilangane netu. Kadi Yonatane kavua mumanyishe tatuende bualu ebu to.

² Tatuende uvua pabuipi ne Ngibeya, musombe muinshi mua mutshi wa grenadier mu Migrone. Uvua ne bena mvita bu nkama isambombu.

³ Mutuangaji uvua muimane muaba awu, ne bintu bia tshijila bivua bibambuluisha mua kuebeja Mvidi Mukulu malu. Mutuangaji awu, dina diende Akiya, muana wa Akitube. Akitube uvua muanabu ne Ikabode (Ikabode uvua muana wa Pinhase, kabidi muikulu wa Eli. Eli ke uvua mutuangaji wa Maweja-Nangila ku Silo.) Ku bena mvita bonsu, muntu nansha umue kavua mumanye ne: Yonatane mmuye kuluisha bena Peleshete to.

⁴ Bua kufika muaba uvua bena mvita ba bena Peleshete, Yonatane kupitshila pankatshi pa mbuebue ibidi ivua miondoke. Mbuebue ayi, bavua bayibikila, elu ne: Bosese, lukuabu ne: Sene.

⁵ Lubuebue lua kumpala luvua ku mutu, lutangilangane ne Mikmase. Luibidi luvua kuinshi, lutangilangane ne Ngeba.

⁶ Yonatane kuambila nsongalume wende ne: — Luaku tuye too ne ku tshisumbu tshia bena mvita ba bena Peleshete, badibu kabayi bateke panshi. Misangu mikuabu Maweja-Nangila udi mua kutuambuluisha. Bualu kakuena tshidi mua kupumbisha Maweja-Nangila bua atupeteshe ditshimuna, nansha tuetu ba bungi nansha tuetu bakese.

⁷ Muena mudimu kuandamuna ne: — Enza muonsu muudi musue. Tuyaku, meme ndi nkulonda anu bu mudi mundidimbi webe nkulonda.

⁸ Ke Yonatane kuambila nsongalume kabidi ne: — Tuyaya kudi bantu aba. Tudileja kudibu.

⁹ Pikalabu batuambila ne: “Imanayi too ne mutuafika kunudi” netushale bimane anu muaba awu. Katuakuya kudibu to.

¹⁰ Kadi pikalabu batubikila ne: “Bandilayi kuneku,” netuye kudibu. Nenku, ke tshimanyinu tshidi tshitujadikila ne: Maweja-Nangila mmubafile mu bianza bietu.

¹¹ Bonsu babidi, kuya kudileja kudi bena Peleshete. Bobu abu kuambilangana ne: “Akia! Monayi bena Ebrewu bapatuke mu biina muvuabu basokome.”

¹² Nanku kubikilabu Yonatane ne nsongalume wende, bela mbila ne: — Bandilayi kuneku! Tudi basue kunuambila bualu. Ke Yonatane kuambila nsongalume ne: — Tubande, undonde panyima. Maweja-Nangila mmumane kubafila mu bianza bia bena Izrayele.

¹³ Yonatane kubanda, wenda ukalaba ne bianza ne makasa, nsongalume wende wenda umulonda. Ke Yonatane kutapa bena Peleshete, nsongalume wende ubashipa, ubalunguluja.

¹⁴ Ku mvita eyi ya kumpala, Yonatane ne muena mudimu wende bavua bashipa bena Peleshete makumi abidi, babashipela muaba mufinakane.

¹⁵ Bena Peleshete bavua bashala mu mitanda, ne bena mutumba nabu bonsu, kutshinabu bena Izrayele bikole. Bena mvita bonsu ba bena Peleshete, ne bavuabu bateke bua kutentekela ditunga, ne bavua bamanye mvita bikole, kutshina bikole, buloba mene kuzakala. Ke bena Peleshete bonsu kupapuka, bikale ne bowa bunene.

¹⁶ Batentekedi ba Shawule bavua ku Ngibeya, tshimenga tshia bena Binyamine, kumona bena Peleshete bavule banyemakane nseke yonsu.

¹⁷ Shawule kutumina bena mvita bende diyi ne: — Balanganayi, nungambile muntu udi kayi munkatshi muenu. Kusanganabu ne: Yonatane ne nsongalume wende kabavuaku to.

¹⁸ Nanku Shawule kuambila mutuangaji Akiya ne: — Ambula mushete wa ndondu wa Maweja-Nangila, ufike nawu apa. (Dituku adi mushete wa ndondu uvua mu mitanda ya bena Izrayele).

¹⁹ Patshivua Shawule bayukila ne mutuangaji Akiya, tshimvundu tshivua tshienda tshivula mu mitanda ya bena Peleshete. Nanku Shawule kuambila mutuangaji Akiya ne: — Kutatshi bua kuebeja Maweja-Nangila to.

²⁰ Shawule kusangisha bena mvita bende, kuyabu mu mvita. Kadi, kusanganabu baluishi babu baluangana nkayabu mu tshimvundu tshinene.

²¹ Nanku, bena Ebrewu bakuabu bavua babuele kale ku bumfumu bua bena Peleshete, kudisangisha ne bena Izrayele luseke luvua Shawule ne Yonatane.

²² Bena Izrayele bakuabu bonsu, bavua basokome mu buloba bua mikuna bua Efrayime, kumvuabu lumu ne: bena Peleshete mbanyema bena Izrayele. Ke kutuadijabu kulondakaja bena Peleshete, benda babaluisha.

²³ Ke muvua Maweja-Nangila muambuluishe bena Izrayele bua kutshimuna bena Peleshete dituku adi nanku. Mvita kutungunuka too ne dishiya dia Bete-Avene.

Bena mvita ba bena Izrayele badi basungidila Yonatane

²⁴ Dituku adi, bena Izrayele kukenga bikole bua mutshipu uvua Shawule mubatshipishe ne: “Pikala muntu mudie biakudia, katuyi banji kufika ku dilolu, tshiyi muanji kusombuela baluishi banyi, muntu awu mmuena tshibawu.” Nanku, muntu nansha umue kavua mudie tshintu to.

²⁵ Bena Izrayele bonsu kufika mu ditu, muvua buitshi miaba yonsu too ne panshi.

²⁶ Pavua bena mvita babuele mu ditu, kumonabu buitshi bumata panshi. Kadi muntu nansha umue wa kudibu kena mubuambule bua kudia to. Bonsu bavua batshina bua mutshipu.

²⁷ Kadi Yonatane kavua mumanye ne: tatuende Shawule mmuenzeje bantu bua kuditshipabu to. Nanku, Yonatane kuolola dikombu divuaye nadi, kutua lusongu lua dikombu mu buitshi, kuelaye buitshi mukana. Ke muisu kubutama, dipungi kujika.

²⁸ Muena mvita mukuabu kuambila Yonatane ne: — Tatuebe Shawule uvua mutuenzeje bua tuetu kuditshipa, mutukanyine ne: “Pikala muntu mudie biakudia lelu, muntu awu mmuena tshibawu!” Ke padi bantu bonsu bapungila bua nzala!

²⁹ Yonatane kuamba ne: — Tatu mmukengeshishe ditunga edi! Mona katshia ngadia buitshi bukese, ndi mupete bukole.

³⁰ Bu bena mvita bonsu badie lelu bintu bivuabu banyenga baluishi babu, tuvua mua kuikala batshimune bena Peleshete bikole bipite.

³¹ Dituku adi, bena Izrayele kuipata, balondakaja bena Peleshete biangatshile ku Mikmase too ne ku Ayalone. Bavua bapungila bikole.

³² Nanku kufuilakanabu bintu bivuabu bapawule: mikoku, ngombe ne bana ba ngombe. Kushipelabu nyama ayi anu muaba awu. Kudiabu munyinyi awu, mutshikale ne mashi.

³³ Kuambilabu Shawule ne: bena Izrayele mbenzele Maweja-Nangila bibi, bualu mbadie munyinyi, mutshikale ne mashi. Shawule kuela mbila ne: — Mbenze bualu bubi butambe! Bungulujayi lukasa dibue dinene, nufike nadi muaba undi ewu.

³⁴ Pashishe, nuye kudi bantu, nubambile bafike muaba undi ewu. Muntu yonsu ikale ne wende ngombe, nansha mukoku. Bashipele nyama yabu ayi muaba ewu, pashishe nebayidie. Nanku kabakuenzela Maweja-Nangila bibi, padibu badia munyinyi, mutshikale ne mashi. Dilolu adi, muntu yonsu kufika ne nyama wende, kumushipelaye muaba awu.

³⁵ Shawule kuashila Maweja-Nangila tshilambuilu. Ke tshilambuilu tshia kumpala tshivuaye pende mumuashile.

³⁶ Ke Shawule kutumina bena Izrayele diyi ne: — Tuyayi butuku ebu, tulondakaje bena Peleshete. Mubanyenge bintu biabu, too ne muatshia butuku. Katushiyi muntu nansha umue ne muoyi to. Bena mvita kuandamuna ne: — Enza muudi musue. Kadi mutuangaji Akiya kuamba ne: — Bangabanga, tuebeje Mvidi Mukulu.

³⁷ Nanku Shawule kukonka Mvidi Mukulu ne: — Ndi mua kulondakaja bena Peleshete anyi? Wewe Maweja-Nangila neufile bena Peleshete mu bianza bietu anyi? Mvidi Mukulu kena mumuandamune dituku adi to.

³⁸ Nanku, Shawule kubikidisha bamfumu bonsu ba bena Izrayele, ubambila ne: — Konkanganayi bimpe, bua tumanye bubi butudi benza lelu.

³⁹ Bu mudi Maweja-Nangila, Musungidi wa bena Izrayele ne muoyi, ndi nditshipa ne: muntu udi muenze bibi neafue, nansha yeye muananyi wa balume Yonatane. Munkatshi mua bena mvita bonsu, muntu nansha umue kena muandamune to.

⁴⁰ Shawule kuamba kabidi ne: — Nuenu bena Izrayele imanayi ku luseke, meme ne muananyi wa balume Yonatane netuimane luseke lukuabu. Bena mvita kuandamuna ne: — Enza muonsu muudi musue.

⁴¹ Shawule kulomba Maweja-Nangila ne: — Mvidi Mukulu wa bena Izrayele, kuena mungandamune lelu bua tshinyi? Maweja-Nangila, ungandamune ku bintu bia tshijila ebi: pikala Yonatane muenze bibi nansha meme, ungandamune ku Urime. Kadi pikala bena mvita benze bibi, ungandamune ku Tumime. Kujadikabu ne bubi budi luseke lua Yonatane ne tatuende. Bena mvita kabena ne bualu to.

⁴² Shawule kutuma diyi ne: — Batshinke kabidi pankatshi panyi ne Yonatane bua kumanya udi muenze bibi. Kujadikabu ne: Yonatane ke uvua muenze bibi.

⁴³ Ke Shawule kuambila Yonatane ne: — Unsokoluele bualu buudi muenze. Yonatane kuandamuna ne: — Mvua muangate buitshi bukese ku lusongu lua dikombu dianyi, meme kudia. Mpindiewu ndi amu mua kufua.

⁴⁴ Shawule kuamba ne: — Yonatane wewe kuyi mufue, Mvidi Mukulu annyoke ne dinyoka dikole!

⁴⁵ Kadi bena mvita kuambila Shawule ne: — Yonatane udi mupeteshe bena Izrayele ditshimuna mu mvita eyi minene, neafue bua tshinyi? Kabiena mua kuenzeka to. Bu mudi Maweja-Nangila ne muoyi, katuena tuitabe nansha bua lusuki lua Yonatane lumate panshi to. Bualu bionsu bidiye muenze lelu ebi, mmuenze ne diambuluisha dia Mvidi Mukulu. Nanku, bena mvita kusungidila Yonatane bua kafu to.

⁴⁶ Shawule kulekela kulondakaja bena Peleshete. Ke bena Peleshete kupingana kuabu.

Bisamba bidi Shawule mutshimune Bena nzubu wa Shawule

⁴⁷ Anu Shawule upeta bukalenga mu bena Izrayele, kuluishaye baluishi bende bavua ku nseke yonsu: bena Mowabe, bena Amone, bena Edome, bena mu bukalenge bua Soba, ne bena Peleshete. Miaba yonsu ayi, Shawule uvua anu utshimuna.

⁴⁸ Dituku dikuabu, Shawule kuleja dikima diende. Kutshimunaye bena Amaleke. Ke muvuaye musungidile bena Izrayele mu bianza bia bantu bavua bibe bintu mu ditunga diabu.

⁴⁹ Shawule uvua ne bana ba balume basatu: Yonatane, Ishevi ne Malkishuwa. Uvua kabidi ne bana ba bakaji babidi: wa kumpala uvua Merabe, muakunyi uvua Mikale.

⁵⁰ Mukaji wa Shawule uvua Akinowame, muana wa Akimase. Mfumu uvua ulombola bena mvita ba Shawule, uvua Abnere, muana wa Nere, uvua tatuende mukuabu wa Shawule.

⁵¹ Bualu Kishe tatuende wa Shawule, ne Nere tatuende wa Abnere, bavua bana ba balume ba Abiyele.

⁵² Matuku onsu avua Shawule mushale mu bukalenga, uvua muluishe bena Peleshete bikole. Nanku misangu yonsu ivua Shawule upeta muntu wa dikima nansha wa mukitshi, uvua umuangata bua kuikalaye muena mvita wende.