1 Samuele 12 - MUKANDA WA MYIDI MUKULU

Samuwele udi uyukila ne bena Izrayele

¹ Samuwele kuambila bena Izrayele ne: — Eyowa, mbanupeshi tshinuvua bandombe. Mbanupi mukalenga.

² Mpindiewu yeye neandombole. Meme ndi mumane kukola mukalakaje. — Bana banyi ba balume mbamane kukola, munudi amu. — Meme ndi munulombola biangatshile ku buana buanyi too ne mpindiewu.

³ Ke pandi muimana kumpala kuenu, muaba udi Maweja-Nangila ne mukalenga udiye musungule. Pangikala munuenzele bualu bubi, numfunde kudibu patoke too. Ndi muibe ngombe wa muntu anyi? Ndi muibe mpunde wa muntu anyi? Ndi mukengeshe muntu anyi? Ndi muenzele muntu bibi anyi? Ndi muangataku tshintu tshia mabuejila kudi muntu bua tshitangidi buenzayi budiye wenza anyi? Pangikala muangate tshintu tshia muntu, angambile, mmupingajilatshi.

⁴ Bena Izrayele kuandamuna ne: — Kuena mutukengeshe, kuena mutuenzele bibi. Katshia kuena muangate tshintu tshia mabuejila to.

⁵ Samuwele kuamba ne: — Nanku Maweja-Nangila ne mukalenga Shawule bajadike bualu ebu lelu. Nuenu bena Izrayele kanuena batela bualu bubi nansha bumue bundi meme Samuwele munuenzela. Bena Izrayele kuandamuna ne: — Muwambi amu, mmomu.

⁶ Samuwele kubambila kabidi ne: — Maweja-Nangila ke mujadiki wa bualu ebu. Yeye ke uvua musungula Moshe ne Arone bua kupatula bankambua benu mu Ejipitu.

⁷ Nanku mpindiewu, imanayi kumpala kua Maweja-Nangila. Meme ndi musue kunufunda kudiye. Diambedi, ndi musue kunuvuluija malu mimpe onsu adi Maweja-Nangila munuenzele nuenu ne bankambua benu.

⁸ Yakobe ne bena diende bonsu bamane kuya mu Ejipitu, bankambua benu kukenga bikole. Kubikilabu Maweja bua abambuluishe. Maweja-Nangila kutuma Moshe ne Arone bua kupatula bena Izrayele mu Ejipitu, ne bua kubafila mu ditunga ditudi edi.

⁹ Kadi bankambua benu bakupua Maweja-Nangila Mvidi Mukulu wabu muoyi. Nanku, Maweja-Nangila kuitaba bua baluishe bena Izrayele, babatshimune kudi Sisra, mulombodi wa bena mvita ba Ashore, kudi bena Peleshete ne kudi mukalenga wa bena Mowabe.

¹⁰ Bankambua benu kubikila kabidi Maweja-Nangila, bua kubambuluisha, bamuambila ne: “Maweja-Nangila, tudi benze bibi, bualu tuvua bakubenga, bua kutendelela mvidie Baale ne Astarte. Kadi mpindiewu, utusungidileku kudi baluishi betu, netukuenzele mudimu.”

¹¹ Pashishe Maweja-Nangila kutuma Ngideyone, Bedane, Yefete, kuntumaye ne meme Samuwele bua kunusungidila, kudi baluishi benu, bavua nenu mutumba. Ke munuvua basombe mu ditunga ne ditalala.

¹² Kadi panuamonyi Nakashe, mukalenga wa bena Amone, mufike bua kunuluisha, nuenu kungambila ne: “Tudi basue kuikala ne mukalenga!” Mbimueneka ne: Maweja-Nangila kavua mukalenga wenu to.

¹³ Eyowa, nudi ne mukalenga unuvua basungula. Mukalenga unuvua balombe, Maweja-Nangila, wanupeshiye.

¹⁴ Mpindiewu, nenuikale bena diakalenga anu panuikala banemeka Maweja-Nangila Mvidi Mukulu wenu, numuenzela mudimu, numutumikila kanuyi numutombokela, nukumbaja mikenji yende, nuenu ne mukalenga wenu, numulonda.

¹⁵ Kadi panuikala kanuyi bamutumikila, bamutombokela, kanuyi bakumbaja mikenji yende, Maweja-Nangila neanuleje bukole buende, bu muvuaye muleje bankambua benu kale.

¹⁶ Mpindiewu dilongololayi, nutangile tshishima tshinene tshidi Maweja-Nangila musue kuenza, nuenu bamone.

¹⁷ Tudi mu tshikondu tshia kunowa ntete ya kuenza bukula, ki mmomu anyi? Ndi musue kulomba Maweja-Nangila, adidishe makubakuba, alokeshe mvula. Nanku nenujadike ne: nudi benzela Maweja-Nangila tshilema tshipite bunene, panudi balomba bua kuikala ne mukalenga.

¹⁸ Samuwele kulomba Maweja-Nangila. Dituku adi, Maweja-Nangila kudidisha makubakuba, kulokesha mwla. Bena Izrayele bonsu kutshipa Maweja-Nangila ne Samuwele bikole.

¹⁹ Kuambilabu Samuwele ne: — Usengelele Maweja-Nangila Mvidi Mukulu wetu bualu buetu, bua katufu to. Bualu ku malu mabi onsu atudi benza, tudi basakidila kabidi bualu bubi bukuabu bua dilomba dia mukalenga.

²⁰ Samuwele kuandamuna ne: — Kanutshinyi to. Bulelela, nudi bamane kuenza tshilema etshi tshinene. Kadi kanumuki kabidi kudi Maweja-Nangila to. Numuenzele anu mudimu ne muoyi mujima.

²¹ Kanukebi bua kuenzela mvidie ya tshianana mudimu. Bualu kayena ne bukole bua kunuambuluisha, nansha bua kusungila muntu. Idi amu mvidie ya dishima.

²² Maweja-Nangila kakunulekela to. Bualu yeye nkayende ke uvua munusungule bua nuikale tshisamba tshia bantu bende. Maweja-Nangila neavuluke lumu luende lunene.

²³ Meme Samuwele, tshiena musue kuenzela Maweja-Nangila bibi to. Misangu yonsu nengikale ndomba Maweja-Nangila bualu buenu. Ndi anu nnuleja njila muimpe, mululame.

²⁴ Kadi nuenu, nuitabe bumfumu bua Maweja-Nangila, numuenzele mudimu muenu muonsu, kabidi ne muoyi mujima. Nuvuluke bishima binene bionsu bidiye munuenzele.

²⁵ Kadi, panuikala benza bibi, nenubutuke bonsu ne mukalenga wenu.