1 Samuele 11 - MUKANDA WA MYIDI MUKULU

Shawule udi utshimuna bena Amone

¹ Nakashe, mukalenga wa bena Amone, kuluisha tshimenga tshia Yabeshe tshivua mu Ngilaade. Bena Yabeshe kuambila Nakashe ne: — Utue netu ndondu. Tudi basue kushala bantu bebe.

² Mukalenga Nakashe kuandamuna ne: — Eyowa, ndi musue kutua nenu ndondu, kadi anu panuikala bitabe bua meme kushipa disu dia luseke lua balume dia muntu yonsu wa kunudi, bua meme kufuisha bena Izrayele bonsu bundu.

³ Bakulu ba Yabeshe kuandamuna ne: — Anji kutupa matuku muanda mutekete. Tudi basue kutuma bantu mu ditunga dia bena Izrayele dijima. Patuikala katuyi bapete muntu udi mua kutuambuluisha, netudifile kuudi.

⁴ Bantu kuya ku Ngibeya, tshimenga tshia ba Shawule. Kuambilabu bantu bionsu bivuabu bakula kudi mukalenga Nakashe. Bena Ngibeya bonsu kudila muadi bikole.

⁵ Shawule utshivua ufumina ku madimi ne ngombe yende. Kukonkaye tshivua bantu bonsu badidila. Kumuambilabu bionsu bivua bena Yabeshe bamba.

⁶ Shawule umvua nanku, Mueyelu wa Mvidi Mukulu kumutulukila, kupetaye tshiji tshikole.

⁷ Kusayaye ngombe ibidi ayi. Pashishe kutumaye bantu ne munyinyi wa ngombe awu mu ditunga dia bena Izrayele dijima, ubadimuja ne: — Mushindu utudi benza ngombe eyi, ke muenzelebu ngombe ya muntu yonsu udi ubenga mua kuya ku mvita ne Shawule ne Samuwele. Bena Izrayele bonsu kutshina, kudisangisha lukasa, benza anu bu muntu umue.

⁸ Shawule kuya ku Bezeke, kutentekela bantu bonsu. Bantu ba bisamba bia ku mutu wa ditunga bavua binunu nkama isatu, ba mu tshisamba tshia Yuda, bavua binunu makumi asatu.

⁹ Kadi bantu bavua bafuma ku Yabeshe, kubapingajabu ku tshimenga atshi bua kuambila bana babu ne: “Malaba munda munya, netunusungidile.” Bantu bavuabu batume, kuyabu kuambila bena mu Yabeshe lumu alu. Nanku bena Yabeshe kusanka bikole.

¹⁰ Kuambilabu bena Amone ne: — Malaba netufike kunudi bua nutuenzele muonsu munudi basue.

¹¹ Butshia dinda, Shawule kutapulula bena mvita bende mu bisumbu bisatu. Kubuelabu munkatshi mua mitanda ya baluishi babu, butuku kabuyi buanji kutshia. Kushipabu bena Amone too ne munda munya. Bena Amone bavua bashala ne muoyi kutangalaka bonsu. Muntu yonsu uvua ukeba anu mua kudipandisha, kabayi nansha mua kunyema babidi babidi to.

¹² Pashishe bena Izrayele kukonka Samuwele ne: — Bantu bavua babenga bua Shawule kikadi mukalenga wetu, badi penyi? Batupeshabu, tubashipe!

¹³ Shawule kuandamuna ne: — Kabena mua kushipa muntu nansha umue dituku dia mushindu ewu to. Bualu lelu ndituku didi Maweja-Nangila mupeshe bena Izrayele bukole bua kutshimuna.

¹⁴ Ke Samuwele kuambila bena Izrayele ne: — Tuyayi ku Ngilgale bua kubanjija Shawule mu bukalenga.

¹⁵ Bena Izrayele bonsu kuya ku Ngilgale. Bafike mu nzubu wa Mvidi Mukulu, kubandabu tshiakabidi Shawule mu bukalenga. Pashishe kulambulabu Maweja-Nangila milambu ya bobumue. Nanku Shawule ne bena Izrayele bonsu, kusanka bikole.