1 Korente 2 - MUKANDA WA MYIDI MUKULU

Lufu lua Kristu ku mutshi mutshiamakane

¹ Bana hetu, tshikondu tshimvua mufike kuenu aku musangu wanyi wa kumpala, bua kunulongesha bualu bulelela busokome bua Mvidi Mukulu, tshivua muakule miaku mikole, nansha ya lungenyi lutue to.

² Bualu pamvua nenu, tshivua musue kunumanyisha bunga bualu, amu Yezu Kristu, nangananga Yezu Kristu uvuabu bapopele pa mutshi mutshiamakane.

³ Ke pamvua mudileje kunudi ne butekete, nzakala ne buowa.

⁴ Bimvua muambe, bimvua munulongeshe, kabivua binutuila bualu mvua ngakula ne miaku ya lubombu, nansha ne meji matue a bantu; kadi amu bualu bukole bua Mueyelu wa Mvidi Mukulu buvua budileja munda muanyi.

⁵ Nanku ditaba dienu kadiena dishindama pa meji a bantu, kadi amu pa bukole bua Mvidi Mukulu.

Meji a Mvidi Mukulu

⁶ Numanye ne: malu atudi tulongesha adi a meji, kadi amu bua bantu bakadi bashindame mu malu a Mvidi Mukulu. Nanku meji aa ki nga panu, nansha a bamfumu badi balombola buloba, bualu badi ne bua kubutuka.

⁷ Kadi ndi nnumanyisha meji masokome a Mvidi Mukulu. Mvidi Mukulu kayi muanji kufuka buloba, ukavua mupangadike bua kutusanga mu butumbi buende. Kadi uvua musokoke bantu meji awu.

⁸ Nansha umue wa ku bamfumu ba pa buloba ebu kavua mujingulule meji aa. Bu bobu baajingulule, kabavua mua kupopela Mfumu, udi wenza tshintu tshimue ne Mvidi Mukulu mu butumbi buende, pa mutshi mutshiamakane.

⁹ Mukanda wa tshijila udi wamba ne: “Bidi muntu nansha umue kayi muanji kumona nansha kumvua, bidi kabiyi bianji kubuela mu meji a muntu, ke bidi Mvidi Mukulu mulongoluele badiye unanga.”

¹⁰ KadiMvidi Mukulu mmutusokoluele tuetu bualu busokome ebu ku bukole bua Mueyelu wa Tshijila. Bualu Mueyelu udi mua kujingulula bionsu, nansha meji masokome menemene adi Mvidi Mukulu wela.

¹¹ Amu lungenyi lua muntu, ke ludi lujingulula bionsu bidi munda muende. Ke mudi kabidi Mueyelu wa Mvidi Mukulu nkayawu ujingulula bidi munda mua Mvidi Mukulu.

¹² Tuetu katuena bapete lungenyi lua pa buloba. Kadi tudi bapete Mueyelu udi ufuma kudi Mvidi Mukulu. Ke mutudi tumanya bionsu bidi Mvidi Mukulu mutuenzele.

¹³ Nanku katuena tulongesha malu aa ne miaku idi ileja meji a bantu, kadi amu ne miaku idi Mueyelu wa Mvidi Mukulu utumanyisha. Ke mutudi tumvuija bantu bidi Mvidi Mukulu muenze, ne miaku idi Mueyelu ewu utumanyisha.

¹⁴ Muntu udi kayi ne Mueyelu wa Mvidi Mukulu, kena mua kuitaba malu malelela adi Mueyelu ewu utumanyisha. Neaatangile bu a bupale. Kena mua kuajingulula, bualu amu muntu udi ne Mueyelu, ke udi mua kuamanya.

¹⁵ Muntu udi ne Mueyelu wa Mvidi Mukulu udi mua kukonkonona bionsu, kadi yeye mene muntu nansha umue kena mua kumukonkonona to.

¹⁶ Ke padi Mukanda wa tshijila wamba ne: “Udi mumanye lungenyi lua Mfumu nnganyi? Udi mua kumupesha lungenyi udiku anyi?” Kadi lungenyi lua Kristu, tuetu tudi nalu.