1 Bakalenga 3 - MUKANDA WA MYIDI MUKULU

Shelomu udi usela muana wa mukalenga wa bena Ejipitu

¹ Mukalenga Shelomu kusela muana wa mukalenga wa bena Ejipitu. Nanku, Shelomu ne mukalenga wa bena Ejipitu kutua ndondu bua mukaji uvua Shelomu musele awu. Shelomu kuya ne mukajende awu mu Yerushalayime mu Tshimenga tshia Davide. Uvua muindile bua bajikije nzubu wende wa bukalenga, nzubu wa Maweja-Nangila, ne bimana bidi binyungulula Yerushalayime.

² Tshikondu atshi, bantu bavua balambuila milambu miaba ya tshijila ivua mu ditunga amu. Bualu kabavua banji kuasa nzubu wa Maweja-Nangila to.

³ Shelomu kuleja nuwuaye munange Maweja-Nangila, kukumbajaye bionsu bivua tatuende Davide mumuambile. Nansha Shelomu mene, uvua ulambuila milambu ya nyama, ne ya manananshi, miaba ya tshijila mikuabu ayi.

Shelomu udi ulomba meji kudi Mvidi Mukulu

⁴ Dituku dikuabu, mukalenga Shelomu kuya ku Ngibone bua kulambula milambu, bualu Ngibone uvua muaba wa tshjila mupita kumanyika ku yonsu. Shelomu uvua mumane kulambula milambu ya kuosha mipite bungi, nkama ne nkama pa tshilambuilu tshivua muaba awu.

⁵ Patshivua Shelomu ku Ngibone, Maweja-Nangila Mvidi Mukulu kumumuenekela butuku mu tshilota, umukonka ne: — Udi musue nkupeshe tshinyi? Lomba tshintu tshiudi musue bua meme kukupa!

⁶ Shelomu kuandamuna ne: — Maweja-Nangila uvua muenzele tatu wanyi Davide, muntu webe malu mimpe a bungi, bualu Davide uvua mukuitabe muende muonsu, mukuenzele mudimu ne muoyi umue. Udi muenzele Davide bimpe, nansha kunyima kua lufu luende, bualu udi mumupe muana wa balume, udi mua kumupingana mu bukalenga. Ke mudibi bimueneka lelu.

⁷ Eyowa, Maweja-Nangila Mvidi Mukulu wanyi, wewe ke udi mumpe bukalenga bua kupingana tatu wanyi Davide. Kadi, meme ntshidi amu nsongalume. Tshiena mumanye mua kulombola bantu to.

⁸ Mpindiewu nkaadi mulombodi wa bena Izrayele bauvua musungule. Bena Izrayele mbapite bungi, kabayi mua kubala to.

⁹ Nanku, Maweja-Nangila, anyisha umpeshe lungenyi lukumbane bua meme kulombola bantu bebe, ne bua kumanya malu mimpe andi mua kubenzela, ne mabi andi ne bua kulekela. Kuyi muenze nanku, kakuena muntu udi mua kulombola bantu bebe bungi nunku to.

¹⁰ Dilomba dia Shelomu adi kusankisha Maweja-Nangila.

¹¹ Nanku, Maweja-Nangila kuandamuna mukalenga Shelomu ne: — Kuena mulombe bua wewe kuikala ne muoyi matuku a bungi. Kuena mulombe bua wewe kuikala mubanji, nansha bua baluishi bebe bafue bonsu. Kadi udi ulomba anu lungenyi, bua wewe kulombola bantu banyi bimpe, kabidi ne meji.

¹² Nanku, bilondeshile tshiudi mulombe, ndi nkupa lungenyi ne meji. Newikale ne lungenyi lua bungi, lupite lua bantu bonsu bavua kumpala kuebe nansha bakulonda panyima.

¹³ Ndi musue kukupa kabidi bubanji ne butumbi, biudi kuyi mulombe to. Matuku onsu autshidi ne muoyi, newikale ne butumbi, mupite bakalenga bonsu.

¹⁴ Wewe muenze malu andi musue, mutumikile meyi anyi ne mikenji yanyi, bu muvua tatuebe wenza, neushale ne muoyi matuku a bungi.

¹⁵ Shelomu ubika ku tulu, kumanyaye ne: Mvidi Mukulu mmuyukile nanyi mu tshilota. Kupinganaye ku Yerushalayime, kuimanaye kumpala kua Maweja-Nangila, kumpala kua mushete wa ndondu. Shelomu kulambula Mvidi Mukulu milambu ya kuosha, ne ya bobumue. Pashishe kulambishilaye balombodi ba mu bukalenga buende bonsu biakudia bia disanka.

Shelomu ukosa nsambu ne meji

¹⁶ Dituku dikuabu, bakaji bena tshiendenda babidi kuya kuimana kumpala kua mukalenga Shelomu.

¹⁷ Mukaji wa kumpala kuambila Shelomu ne: — Mukalenga wanyi, ndi nkusengelela, unteleje. Meme ne mukaji ewu, tudi mu nzubu umue. Patuvua nende mu nzubu amu, meme kulela muana wa balume.

¹⁸ Kupita matuku abidi, kulelaye wende muana wa balume. Tudi anu babidi mu nzubu amu. Kamuena muntu mukuabu nansha.

¹⁹ Kadi butuku bua lelu, muana wa mukaji ewu wafu, bualu mamuende uvua mumueyemina.

²⁰ Nanku, mukaji ewu kujuka munkatshi mua butuku, meme mulale. Kuambulaye muananyi uvua mulale ku luseke luanyi, kuyaye kumuladika mu bulalu buende. Pashishe muanende uvua mufue, kumuladikaye ku luseke luanyi.

²¹ Mu dinda emu, pandi njuka bua kuamusha muananyi, ndi nsangana muana mufue. Meme kukenketa muana bikole, kumona ne: ki mmuananyi to…

²² Kadi mukaji mukuabu awu kubenga, wamba ne: — Udi ushima! Muananyi udi ne muoyi, muanebe ke udi mufue! Kadi mukaji wa kumpala kuamba ne: — Nansha! Muana udi mufue ngwebe: wanyi ke udi ne muoyi! Ke muvua bakaji abu batandangana kumpala kua Shelomu nanku.

²³ Mukalenga Shelomu kubambila ne: — Bu mudi ewu wamba ne: “Muana udi ne muoyi ke wanyi, udi mufue ngwebe!” Mukuabu ubenga ne: “Nansha, muana udi mufue ngwebe, wanyi udi ne muoyi!”

²⁴ Nanku, telejayi tshindi ngamba: “Mpeshayi muele.” Anu bafika ne muela,

²⁵ mukalenga Shelomu kuamba ne: — Nukose muana udi ne muoyi bitupa bibidi, nupeshe mukaji yonsu tshiende tshitupa.

²⁶ Kadi mamu muena muana uvua ne muoyi, bu muvuaye munange muanende bikole, kuambaye ne: — Mukalenga wanyi, ndi nkusengelela, kushipi muana. Mupesha nansha mukaji ewu! Kadi mukaji mukuabu kuamba ne: — To! Nukose muana bitupa bibidi, bua tumubule bonsu babidi.

²⁷ Nanku, mukalenga Shelomu kuamba ne: — Kanushipi muana to. Numufile kudi mukaji wa kumpala, bualu yeye ke mamuende!

²⁸ Bena Izrayele bonsu kumvua muvua mukalenga Shelomu mukose nsambu ayi. Kunemekabu mukalenga Shelomu bikole. Bualu bavua bamanye ne: Mvidi Mukulu nkayende ke udi mumupe meji a kulumbuluisha nawu bantu.