1 Bakalenga 22 - MUKANDA WA MYIDI MUKULU

Akabe udi musue kukuata tshiakabidi Ramote

¹ Bidimu bibidi bimane kupita, bena Siriya ne bena Izrayele kabayi baluangana mvita.

² Mu tshidimu tshisatu, Yosafate, mukalenga wa bena Yuda, kufika bua kumonangana ne Akabe, mukalenga wa bena Izrayele.

³ Kadi, Akabe uvua mumane kuambila balombodi ba mu bukalenga buende ne: “Nudi bamanye bimpe ne: tshimenga tshia Ramote, tshidi mu ditunga dia Ngilaade, ntshietu. Tudi tutshina bua kuya kukuata tshiakabidi tshimenga tshietu etshi, kudi mukalenga wa bena Siriya bua tshinyi?”

⁴ Nanku, Akabe kukonka mukalenga Yosafate ne: — Udi mua kuya kumfila mu mvita bua tuetu kukuata tshimenga tshia Ramote, tshidi mu ditunga dia Ngilaade anyi? Mukalenga Yosafate kuandamuna ne: — Wewe ne meme tudi bantu bamue. Bantu bebe, mbanyi meme. Bantu banyi, mbebe wewe. Nyama yanyi ya tubalu nyebe wewe.

Bambi bena mudimu ba mukalenga Akabe badi bamuambila ne: neutshimune

⁵ Mukalenga Yosafate kumuambila kabidi ne: — Kadi, bangabanga, ukonke Maweja-Nangila.

⁶ Nanku, Akabe, mukalenga wa bena Izrayele, kubikidisha bambi bende bonsu bu nkama inayi, ubakonka ne: — Ndi mua kuya kuluangana, bua meme kukuata tshimenga tshia Ramote tshidi mu ditunga dia Ngilaade, anyi tshiena mua kuya? Bambi kuandamuna ne: — Udi mua kuya. Maweja-Nangila neafile tshimenga atshi mu bianza biebe.

⁷ Kadi, mukalenga Yosafate kumukonka ne: — Munemu, kamuena muambi mukuabu wa Maweja-Nangila utudi mua kuebeja anyi?

⁸ Akabe, mukalenga wa bena Izrayele, kuandamuna ne: — Muambi mukuabu umue udi munemu. Dina diende Mika, muana wa Imla. Kadi tshiena mumunange to. Bualu misangu yonsu udi ummanyisha amu malu mabi. Katshia, kena muanji kungambilaku bualu buimpe to. Mukalenga Yosafate kukema ne: — Kuangatshi muambi bibi nanku to!

⁹ Ke, Akabe mukalenga wa bena Izrayele, kubikila muntu uvua ulombola bena mudimu ba mu nzubu wa bukalenga. Kumutumaye lukasa bua kuya kukeba Mika, muana wa Imla.

¹⁰ Pavua bambi babambila malu, Akabe, mukalenga wa bena Izrayele, ne Yosafate, mukalenga wa bena Yuda, bavua basombe mu nkuasa yabu ya bukalenga. Bavua bavuala bilamba bia bukalenga, basombe pabuipi ne tshiibi tshia ku tshimenga tshia Samariya.

¹¹ Muntu mukuabu, Sedekiya, muana wa Kenaane, uvua muenze nsengu ya tshiamu, wamba ne: — Maweja-Nangila udi wamba ne: “Nsengu eyi, ke tshimanyinu tshidi tshileja bukole bundi mua kubutula nabu bena mvita ba bena Siriya.”

¹² Bambi bakuabu bonsu kujadika meyi awu, bamba ne: — Mukalenga, uye kuluisha tshimenga tshia Ramote tshidi mu ditunga dia Ngilaade. Neutshimune. Maweja-Nangila neafile tshimenga atshi mu bianza biebe.

Muambi Mika udi umanyisha Akabe ne: nebakutshimune

¹³ Muntu uvua muye kukeba Mika, kuambilaye Mika ne: — Teleja, bambi bonsu mbambile mukalenga Akabe anu meyi a mushindu umue ne: neutshimune. Wewe kabidi umuambile anu meyi a mushindu umue ne bambi bakuabu. Umuambile ne: neutshimune.

¹⁴ Kadi, muambi Mika kuandamuna ne: — Bu mudi Maweja-Nangila ne muoyi, nemmuambile anu tshidi Maweja-Nangila ungambila.

¹⁵ Mika ufika kudi mukalenga Akabe, awu kumukonka ne: — Mika, tudi mua kuya kuluangana, bua tuetu kukuata tshimenga tshia Ramote tshidi mu ditunga dia Ngilaade, anyi katuena mua kuya? Muambi kuandamuna ne: — Udi mua kuya. Neutshimune, Maweja-Nangila neafile tshimenga atshi mu bianza biebe.

¹⁶ Kadi, mukalenga Akabe kumukonka kabidi ne: — Ndi mua kukusengelela misangu bungi munyi bua wewe kungambila anu bualu bulelela, paudi wakula mu dina dia Maweja-Nangila?

¹⁷ Ke muambi Mika kumuambila ne: — Ndi mumone bena Izrayele. Bonsu mbamuangalake mu mikuna. Bu mudi tshisumbu tshia mikoku katshiyi ne mulami. Kabidi Maweja-Nangila udi wamba ne: “Bena Izrayele kabatshiena ne mfumu to. Muntu yonsu apingane ku nzubu kuende talala.”

¹⁸ Akabe mukalenga wa bena Izrayele, kuambila Yosafate ne: — Mvua mumane kukuambila! Mika udi ungambila anu malu mabi misangu yonsu. Katshia kena muanji kungambila bualu buimpe to!

¹⁹ Mika kuamba kabidi ne: — Teleja anu tshidi Maweja-Nangila wamba ne: Ndi mumone Maweja-Nangila musombe mu nkuasa wende wa bukalenga, bena mudimu bende bonsu ba mu diulu, bimana, aba ku dia balume diende, bakuabu ku dia bakaji.

²⁰ Nanku, Maweja-Nangila kukonka ne: “Udi mua kuya kushima Akabe bua kuyaye kuluisha tshimenga tshia Ramote tshidi mu ditunga dia Ngilaade, kumushipelabu mu tshimenga atshi nnganyi?” Kufilabu meji mushilangane.

²¹ Nanku, mutumibue uvua ulombola bambi, kusemena kudi Maweja-Nangila, umuambila ne: “Meme nenye kumushima!” Maweja-Nangila kukonka ne: “Neuye kumushima mushindu kaayi?”

²² Mutumibue kuandamuna ne: “Nengenzeje bambi bonsu, bua bambile mukalenga Akabe malu a dishima.” Maweja-Nangila kuandamuna ne: “Ke mushindu muimpe mutambe wa kumushima. Uye kuenza nanku!”

²³ Eyowa, mpindiewu bionsu ebi mbimane kuenzeka. Maweja-Nangila ke uvua mutume mutumibue bua kushimaye bambi bebe bonsu. Kadi Maweja-Nangila uvua mumane kujadika bua kukukengesha.

²⁴ Diakamue, Sedekiya, muana wa Kenaane, kusemena kudi muambi Mika, kumutapa dipi ku ditama, wamba ne: — Mmunyi muudi mua kujadika ne: mueyelu wa Maweja-Nangila mmupatuke munda muanyi bua kubuela munda muebe, kukuakuisha anu wewe?

²⁵ Muambi Mika kuandamuna ne: — Eyowa! Wewe neujadike bionsu ebi, dituku diwikala musokome mu tshibambalu tshia munda mua nzubu webe.

²⁶ Pashishe, Akabe, mukalenga wa bena Izrayele, kutuma diyi kudi muena mudimu wende ne: — Ukuate muambi Mika, umufile kudi mulombodi wa tshimenga tshia Amone ne kudi Yowashe, muana wa mukalenga.

²⁷ Ubambile ne: bele muntu awu mu nzubu wa lukanu mu dina dianyi. Bamupeshe kapese ka diampa ne mayi makese a kunua, too ne pangapingana katakata ku mvita eyi.

²⁸ Mika kuandamuna ne: — Wewe mupingane katakata, nanku Maweja-Nangila kena muambe bualu mukana muanyi to.

Badi bashipa mukalenga Akabe mu mvita

²⁹ Akabe, mukalenga wa bena Izrayele, ne Yosafate, mukalenga wa bena Yuda, kuya kuluisha tshimenga tshia Ramote tshivua mu ditunga dia Ngilaade.

³⁰ Akabe, mukalenga wa bena Izrayele, kuambila Yosafate ne: — Ndi musue kudisokoka, kuvuala bilamba bia muntu mukuabu, bua meme kuya mu mvita. Kadi wewe Yosafate uvuale bilamba bia bukalenga. Nenku, Akabe mukalenga wa bena Izrayele, kudisokoka bu muntu mukuabu, bua kuya mu mvita.

³¹ Kadi, mukalenga wa bena Siriya, uvua mumane kutuma diyi kudi bamfumu makumi asatu ne babidi, bavua ne matempu ende a mvita, bua kuluisha anu Akabe, mukalenga wa bena Izrayele, kabayi baluisha bena mvita bakuabu, nansha balombodi ba bena mvita.

³² Nanku, bamfumu bavua ne matempu a mvita bamona Yosafate, kuambilanganabu ne: bulelela ke Akabe, mukalenga wa bena Izrayele ewu. Kutuadijabu kumuluisha. Kadi, Yosafate kuela mbila ya mvita.

³³ Ke bamfumu bavua ne matempu a mvita, kujadika ne: ki ngʼAkabe, mukalenga wa bena Izrayele to. Nanku, kulekelabu kumulondakaja.

³⁴ Muena mvita mukuabu wa bena Siriya kuela muketa mu mpukapuka. Muketa awu, kuasa Akabe, mukalenga wa bena Izrayele. Kubuelawu mu mubidi wende, ku kazaku kende ka mvita. Mukalenga Akabe kuambila muntu uvua wendesha ditempu diende dia mvita ne: — Pingana panyima! Umuka nanyi munkatshi mua bena mvita, bualu tshiena mumvue bimpe to.

³⁵ Dituku adi, mvita ivua mikole mitambe. Nanku, Akabe mukalenga wa bena Izrayele uvua ne bua kushala muaba awu, bamuimanyike mu ditempu diende dia mvita, mululamangane ne bena mvita ba bena Siriya. Ke Akabe kufua dilolu. Mashi avua apatuka mu mputa wende awu, avua apuekela mu ditempu dia mvita.

³⁶ Diba dimane kubuela, kuelabu mbila mu mitanda ne: — Muntu yonsu apingane mu tshimenga tshiende, aye ku nzubu kuende,

³⁷ bualu mukalenga Akabe mmufue! Kuyabu kujiika tshitalu tshia mukalenga Akabe, mu tshimenga tshia Samariya.

³⁸ Kadi pavuabu basukula ditempu dia Akabe mu dijiba dia mayi dia mu Samariya, mbua kulaka mashi a mukalenga Akabe. Kabidi bakaji bena tshiendenda bavua bowa mayi muaba awu, bu muvua Maweja-Nangila mumane kuamba.

³⁹ Malu makuabu a Akabe, mbaafunde mumukanda udibu babikila ne: Malu adi bakalenga ba bena Izrayele benza. Mbafundemu kabidi bionsu bivuaye muenze: nzubu muimpe wa bukalenga uvuaye muase mulengeje ne mibanga, ne bimenga bionsu bivuaye muibake.

⁴⁰ Mukalenga Akabe mumane kufua, muanende Akaziya kumupingana mu bukalenga.

Yosafate, mukalenga wa bena Yuda

⁴¹ Yosafate, muana wa Asa, uvua mubuele mu bukalenga bua bena Yuda, mu tshidimu tshinayi tshivua Akabe mu bukalenga bua bena Izrayele.

⁴² Yosafate uvua ne bidimu makumi asatu ne bitanu pa kubuelaye mu bukalenga. Uvua mushale mu bukalenga mu Yerushalayime bidimu makumi abidi ne bitanu. Dina dia mamuende divua Azuba, muana wa Shili.

⁴³ Yosafate kuenza malu mimpe, mulonde tshilejilu tshia tatuende Asa, ku bionsu bivuaye wenza. Uvua muenze malu mimpe avua asankisha Maweja-Nangila.

⁴⁴ Kadi, Yosafate kavua mukandike miaba ya tshijila ivua bantu baya kutendelela mvidie. Bantu bavua anu baya miaba ayi, bua kulambula milambu ya nyama, ne ya manananshi.

⁴⁵ Yosafate bavua basombe ne mukalenga wa bena Izrayele anu bimpe mu ditalala.

⁴⁶ Malu makuabu a Yosafate, mbaafunde mu mukanda udibu babikila ne: Malu adi bakalenga ba bena Yuda benza. Mbafundemu kabidi bukitu buvua nabu Yosafate, mvita yonsu ivuaye muluangane,

⁴⁷ ne mushindu uvuaye muipate balume ne bakaji bonsu bavua benda tshiendenda mu nzubu ya mvidie yabu bua kuyitendelela. Bavua bashala benza nanku nansha tshikondu tshia tatuende Asa.

⁴⁸ Kadi, tshikondu atshi, mu ditunga dia Edome kamuvua mukalenga to. Muvua anu mulombodi uvua mukalenga wa bena Yuda mutekemu.

⁴⁹ Mukalenga Yosafate uvua muenzeje matu manene ku Eshiyone-Ngebere bua kuya kukeba biamu bia mpawungi mu ditunga dia Ofire. Kadi, kena mupete tshipeta tshimpe to. Bualu matu avua majame ku Eshiyone-Ngebere.

⁵⁰ Ke Akaziya, muana wa Akabe, kuanyisha kabidi bua bitshi ba matu ba mu ditunga diende baye kushindikija bitshi ba matu ba Yosafate. Kadi, mukalenga Yosafate kubenga.

⁵¹ Yosafate mumane kufua, kumujiikabu mu Tshimenga tshia Davide, mu lukita lua bankambua babu. Muanende wa balume Yorame kumupingana mu bukalenga.

Akaziya, mukalenga wa bena Izrayele

⁵² Akaziya, muana wa Akabe, uvua mubuele mu bukalenga bua bena Izrayele, mu tshimenga tshia Samariya, mu tshidimu tshia dikumi ne muanda mutekete tshivua Yosafate mu bukalenga bua bena Yuda. Akaziya kushala mu bukalenga bua bena Izrayele bidimu bibidi.

⁵³ Kuenzaye tshidi Maweja-Nangila ubenga. Kuenzaye buenzayi anu muvua tatuende Akabe ne mamuende Yezabele benza. Kabidi muvua Yerobowame, muana wa Nebate muenze, mufikishe bena Izrayele ku dienza bibi.

⁵⁴ Akaziya uvua mutue mpala panshi kumpala kua Baale bua kumutendelela. Ke muvuaye mufikishe Maweja-Nangila Mvidi Mukulu wa bena Izrayele munda, bu muvuabu benza kudi tatuende Akabe.