1 Bakalenga 19 - MUKANDA WA MYIDI MUKULU

Eliya udi uteketa mu maboku

¹ Mukalenga Akabe kuambila mukajende Yezabele bionsu bivua muambi Eliya muenze, ne muvuaye mushipe bambi ba Baale buonsu.

² Ke Yezabele kutuma muntu bua kumanyisha muambi Eliya ne: “Malaba pa diba ditudi edi, meme tshiyi mukushipe, bu muudi mushipe bambi ba Baale, mvidie innyoke ne dinyoka dikole!”

³ Muambi Eliya kumvua bowa, kunyema ne muena mudimu wende bua kushala ne muoyi. Kuyaye ku Bersheba mu ditunga dia bena Yuda. Kushiyaye muena mudimu wende mu ditunga adi.

⁴ Pashishe, kuendaye mu tshipela dituku dijima. Kuyaye kusomba muinshi mua mutshi wa ngenete, ujinga mua kufua, wamba ne: — Maweja-Nangila, mpindiewu biantondi! Unshipe, bualu meme tshiena mupite bankambua banyi to.

⁵ Ke muambi Eliya kulala tulu panshi, muinshi mua mutshi wa ngenete awu. Kadi, mutumibue wa Mvidi Mukulu kufika, kumubisha, umuambila ne: — Juka, udie!

⁶ Muambi Eliya kumona diampa pabuipi nende, dimana kuosha pa mabue. Kumonaye kabidi ne mulondu wa mayi. Mumane kujikija kudia ne kunua, kulalaye tulu tshiakabidi.

⁷ Kadi, mutumibue wa Mvidi Mukulu kumubisha musangu muibidi, umuambila ne: — Juka, udie! Bualu uyaya luendu lule lutambe.

⁸ Ke muambi Eliya kujuka bua kudia ne kunua. Biakudia abi kumupa bukole. Kuendaye matuku makumi anayi, munya ne butuku, too ne ku Sinayi, mukuna wa Mvidi Mukulu.

Mvidi Mukulu udi ukolesha Eliya ku muoyi

⁹ Eliya mumane kufika ku mukuna wa Sinayi, kubuelaye mu lubuebue, kulalamu. Ke Maweja-Nangila kumukonka ne: — Eliya, muaba ewu udi wenza tshinyi?

¹⁰ Eliya kuandamuna ne: — Maweja-Nangila Mvidi Mukulu wa bukole buonsu, ndi mukunange bikole. Nanku tshitshiena musue kumona bionsu bidi bena Izrayele benza to. Bualu bena Izrayele mbanyangakaje ndondu webe, mbupule bilambuilu biebe, mbashipe bambi bebe. Ndi mushale anu meme nkayanyi. Kadi badi bakeba kunshipa ne meme!

¹¹ Maweja-Nangila kuambila Eliya ne: — Patuka mu lubuebue, wimane pa mukuna kumpala kuanyi. Ndi musue kupita. Diakamue, tshipepela tshinene kutuuta bikole. Kupandatshi mikuna ne mbuebue kumpala kua Maweja-Nangila. Kadi, Maweja-Nangila kavua mu tshipepela atshi to. Tshipepela tshimane kujika, buloba kuzakala. Kadi, Maweja-Nangila kavua mu buloba buvua buzakala abu to.

¹² Buloba bumane kuzakala, kapia kumueneka. Kadi, Maweja-Nangila kavua mu kapia aku to. Kapia kamane kujika, tshiona tshia lupepela luteketa kumwikatshi.

¹³ Anu muambi Eliya umvua tshiona atshi, kudibuikilaye tshinkutu tshiende. Kupatukaye mu lubuebue, kuimana mu mbelu. Kumvuaye kabidi diyi dimukonka ne: — Eliya, muaba ewu udi wenza tshinyi?

¹⁴ Kuandamunaye ne: — Maweja-Nangila Mvidi Mukulu wa bukole buonsu, ndi mukunange bikole. Kadi tshiena musue kumona bionsu bidi bena Izrayele benza to. Bualu bena Izrayele mbanyangakaje ndondu webe, mbupule bilambuilu biebe, mbashipe bambi bebe. Ndi mushale anu meme nkayanyi. Kadi, badi bakeba kunshipa ne meme.

¹⁵ Kadi Maweja-Nangila kumuambila ne: — Pingana anu mu njila ewu, upitshile mu tshipela, uye ku Damase. Paudi ufika ku Damase, ujidile Azayele mu dina dianyi, bua ikale mukalenga wa bena Siriya.

¹⁶ Pashishe, uye ujidile Yehu, muana wa Nimshi, bua ikale mukalenga wa bena Izrayele. Ujidile kabidi Elisha, muana wa Shafate, wa mu musoku wa Abele-Mekola bua akupingane mu mudimu wa buambi.

¹⁷ Bantu bikale bapanduka mu mvita ya Azayele, Yehu neabashipe. Bantu bikale bapanduka mu mvita ya Yehu, Elisha neabashipe.

¹⁸ Kadi munkatshi mua bena Izrayele, nenshiye bantu bakuabu binunu muanda mutekete ne muoyi, mmumue ne: bonsu badikabayi banji kukukuila mvidie Baale, kabayi banji kutua mpingu ayi mishiku.

Eliya udi usungula Elisha bua kumupingana.

¹⁹ Eliya kumuka muaba awu, kusangana Elisha, muana wa Shafate udima budimi ne ngombe makumi abidi ne inayi misuikakaja ibidi ibidi. Elisha mene uvua udima ne tshisumbu tshia dikumi ne tshibidi. Pavua muambi Eliya upitshila pabuipi ne Elisha, kutekaye Elisha tshinkutu pambidi.

²⁰ Ke Elisha kushiya ngombe ivuaye nayi, kuya lubilu kudi muambi Eliya, umuambila ne: — Ndi nkulomba ne: nye kulayangana ne tatu wanyi ne mamu wanyi, pashishe nenkulonde. Muambi Eliya kuambila Elisha ne: — Udi mua kupingana ku mudimu webe. Ndi mukuebeje bualu anyi?

²¹ Elisha kupingana ku budimi buende. Muaba awu, kuangataye ngombe yende ibidi, ivuaye ukuata nayi mudimu, kuyilambulaye. Kuangataye ditempu, kukuatshisha nadi kapia bua kulamba munyinyi. Bantu bavua muaba awu, kubapeshaye munyinyi awu, kudiabu. Pashishe, Elisha kulonda Eliya, kushala muena mudimu wende.