1 Bakalenga 16 - MUKANDA WA MYIDI MUKULU

¹ Ke Maweja-Nangila kuambila muambi Yehu, muana wa Anani, bua kumanyishaye Basha ne:

² — Wewe Basha uvua muntu tshianana. Meme kukusungula munkatshi mua bantu banyi bena Izrayele bua wewe kushala mukalenga wabu. Kadi, udi muenze malu mabi bu muvuabu benza kudi Yerobowame. Udi mufikishe bena Izrayele ku dienza bibi. Nanku, bena Izrayele mbamfikishe munda bua bubi buabu.

³ Ke pandi musue kunubutula ne bena nzubu webe bonsu. Nennubutule bu mumvua mubutule bena nzubu wa Yerobowame, muana wa Nebate.

⁴ Pikala muntu wa mu nzubu muebe mufuile mu tshimenga, nebadie tshitalu tshiende kudi mbua. Kadi yeye mufuile mu tshisuku, nebazokole tshitalu tshiende kudi nyunyi ya mikanku.

⁵ Malu makuabu a Basha, mbaafunde mu mukanda udibu babikila ne: Malu adi bakalenga ba bena Yuda benza. Mu mukanda emu, mbafundemu malu onsu avua Basha muenze, baleja kabidi ne bukitu buvuaye nabu.

⁶ Basha mumane kufua, kumujiikabu mu tshimenga tshia Tirsa. Muanende wa balume Ela kumupingana mu bukalenga.

⁷ Maweja-Nangila uvua muambile muambi Yehu, muana wa Anani, bua amanyishe Basha ne bena nzubu malu aa, anu bua buenzayi buabu. Basha ne bena nzubu wende bavua benza bidi Maweja-Nangila ubenga, bualu bavua benza malu mabi anu bu muvua Yerobowame ne bena nzubu wende benza. Uvua mushipeshe kabidi ndelanganyi ya Yerobowame yonsu.

Ela, mukalenga wa bena Izrayele

⁸ Mu tshidimu tshia makumi abidi ne tshisambombu tshivua Asa mu bukalenga bua bena Yuda, Ela, muana wa Basha, kubuela mu bukalenga bua bena Izrayele. Ela kushala mukalenga mu tshimenga tshia Tirsa bidimu bibidi.

⁹ Zimri, mulombodi wa bena mvita ba Ela, uvua ulombola tshia bibidi tshimue tshia bena mvita bavua ne matempu a mvita, kuelelaye Ela tshifufu tshibi. Pavua mukalenga Ela mu tshimenga tshia Tirsa, unua maluvu, kukuatshikaye mu nzubu mua Arsa, mulombodi wa nzubu wa bukalenga,

¹⁰ Zimri kubuela mu nzubu amu, kumushipa. Bionsu abi bivua bienzeka mu tshidimu tshia makumi abidi ne muanda mutekete tshivua Asa mu bukalenga bua bena Yuda. Zimri kuangata bukalenga.

¹¹ Amu ubuela mu bukalenga bua bena Izrayele, kushipaye bena nzubu wa Basha bonsu. Kena mushiye nansha muntu umue ne muoyi to. Uvua mushipe bana ne bantu bakulumpe bonsu ba mu nzubu wa Basha, ne bantu bonsu bavua batue ku tshia Basha.

¹² Nanku, Zimri uvua mubutule bena nzubu wa Basha bonsu, bu muvua muambi Yehu muambile bantu mu dina dia Maweja-Nangila.

¹³ Bionsu abi bivua bienzeka, bualu Basha ne muanende Ela bavua benza bibi. Bavua bafikisha kabidi bena Izrayele ku dienza bibi. Bualu Maweja-Nangila Mvidi Mukulu wa bena Izrayele, uvua mufike munda bua mvidie ivuabu batendelela.

¹⁴ Malu makuabu a Ela, mbaafunde mu mukanda udibu babikila ne: Malu adi bakalenga ba bena Izrayele benza.

Zimri, mukalenga wa bena Izrayele

¹⁵ Mu tshidimu tshia makumi abidi ne muanda mutekete, tshivua Asa mu bukalenga bua bena Yuda, Zimri kuangata bukalenga mu Izrayele. Kushalaye mu bukalenga mu tshimenga tshia Tirsa matuku muanda mutekete. Diba adi, bena mvita ba bena Izrayele, bavua baluisha bena Ngibetone, tshimenga tshivua bena Peleshete bakuate.

¹⁶ Bena mvita kumvua lumu ne: Zimri mmuelele mukalenga Ela tshifufu tshibi, mmumane kumushipa. Diakamue bena mvita bonsu bavua mu mitanda kumvuangana muaba awu, kusungula Omri, mulombodi wa bena mvita, bua kushalaye mukalenga wa bena Izrayele.

¹⁷ Nanku, Omri ne bena mvita bavuaye nabu, kumuka mu tshimenga tshia Ngibetone, kuya kuluisha tshimenga tshia Tirsa.

¹⁸ Zimri umona ne: mbamane kukuata tshimenga tshia Tirsa, kunyemenaye mu tshibambalu tshikuabu tshia nzubu wa bukalenga. Kutuaye kapia ku tshibambalu atshi, kufuaye mu kapia.

¹⁹ Bionsu ebi, bivua bienzeka bualu Zimri uvua muenze bidi Maweja-Nangila ubenga. Uvua muenze buenzayi, anu bu muvua Yerobowame muenze, mufikishe kabidi bena Izrayele ku dienza bibi.

²⁰ Malu makuabu a Zimri, mbaafunde mu mukanda udibu babikila ne: Malu adi bakalenga ba bena Izrayele benza. Mu mukanda amu, badi balonda kabidi tshifufu tshibi tshivua Zimri muele.

²¹ Zimri mumane kufua, bena Izrayele kukosoloka bitupa bibidi: aba basue kusungula Tibni, muana wa Nginate, bua kuikalaye mukalenga, bakuabu basue kusungula Omri.

²² Kadi bantu bavua ku luseke lua Omri kutshimuna bantu bavua ku luseke lua Tibni, muana wa Nginate. Tibni kufua. Omri kushala mukalenga wa bena Izrayele.

Omri, mukalenga wa bena Izrayele

²³ Mu tshidimu tshia makumi asatu ne tshimue tshivua Asa mu bukalenga bua bena Yuda, Omri kuangata bukalenga mu Izrayele bua bidimu dikumi ne bibidi. Bangabanga uvua mushale mu bukalenga mu tshimenga tshia Tirsa, bidimu bisambombu.

²⁴ Pashishe, kuyaye kusumba mukuna wa Samariya kudi Semere. Uvua muusumbe ku nkanu mitoke ya mushinga mukole binunu bisambombu. Omri kuasa tshimenga pa mukuna awu. Kuinyikaye tshimenga atshi dina dia Samariya, bilondeshile dina dia Semere, uvua muena mukuna awu.

²⁵ Kadi, Omri kuenza bidi Maweja-Nangila ubenga. Uvua muenze bibi mupite bakalenga bonsu bavua bamudianjidile mu bukalenga.

²⁶ Uvua muenze buenzavi anu bu Yerobowame, muana wa Nebate, uvua mufikishe bena Izrayele ku dienza bibi. Maweja-Nangila Mvidi Mukulu wa bena Izrayele, uvua mufike munda bua mvidie ivuabu batendelela.

²⁷ Malu makuabu a Omri, mbaafunde mu mukanda udibu babikila ne: Malu adi bakalenga ba bena Izrayele benza. Mu mukanda amu, mbafundemu malu onsu adi Omri muenze, baleja kabidi ne bukitu buvuaye nabu.

²⁸ Omri mumane kufua, kumujiikabu mu tshimenga tshia Samariya. Muanende wa balume Akabe kumupingana mu bukalenga.

Akabe, mukalenga wa bena Izrayele

²⁹ Mu tshidimu tshia makumi asatu ne muanda mukulu tshivua Asa mu bukalenga bua bena Yuda, Akabe, muana wa Omri, kupiana bukalenga mu Izrayele. Akabe kushala mu bukalenga mu tshimenga tshia Samariya, bidimu makumi abidi ne bibidi.

³⁰ Kadi, uvua wenza bidi Maweja-Nangila ubenga. Uvua muenze bibi mupite bakalenga bonsu bavua bamudianjidile mu bukalenga.

³¹ Kawa muenze anu malu mabi bu avua Yerobowame, muana wa Nebate muenze to. Uvua musele kabidi Yezabele, muana wa Etbale, mukalenga wa bena Sidone. Uvua uyakukukuila kabidi mvidie Baale, umutendelela.

³² Kuibakilaye mvidie Baale nzubu wa ditendelela mu tshimenga tshia Samariya amu. Kuasaye tshilambuilu mu nzubu amu bua kulambuilamu Baale milambu.

³³ Kuasaye momu kabidi dikunji bua kutendelela Astarte, mvidie mukaji. Maweja-Nangila Mvidi Mukulu wa bena Izrayele, kufika munda bua bionsu bivua Akabe muenze abi. Nanku, Akabe uvua muenze bibi mupite bakalenga bonsu bavua bamudianjidile mu bukalenga.

³⁴ Tshikondu atshi, muntu mukuabu wa mu tshimenga tshia Betele, diende Iyele, kuibakulula tshimenga tshia Yeriko. Kadi bionsu bivua Maweja-Nangila muambile Yoshuwa, muana wa Nune, kukumbanabi: pavuabu benza tshitaku tshia tshimenga tshia Yeriko, Abirame, muana wa balume, muanabute wa Iyele kufua; pavuabu bela biibi bia tshimenga atshi, Segube, muanende wa balume muana mukala kufua.