1 Bakalenga 15 - MUKANDA WA MYIDI MUKULU

Abiyame, mukalenga wa bena Yuda

¹ Mu tshidimu tshia dikumi ne muanda mukulu tshivua Yerobowame, muana wa Nebate, mu bukalenga bua Izrayele, Abiyame kupeta bukalenga mu Yuda.

² Kushalaye mukalenga mu Yerushalayime bidimu bisatu. Dina dia mamuende divua Maaka, muana wa Abishalome.

³ Abiyame kuenza kabidi buenzayi anu bu bua tatuende Robowame. Kavua muenze malu mimpe, avua nkambua wende Davide muenze to. Kawa munange Maweja-Nangila Mvidi Mukulu wende ne muoyi mujima to.

⁴ Kadi, Maweja-Nangila Mvidi Mukulu wende uvua anu mumupeshe muana wa balume, uvua mua kumupingana mu bukalenga, bua bena nzubu wa Davide, kabumuki bonsu mu bukalenga to, kabidi bua Yerushalayime ashale tshimenga tshia bukalenga. Maweja-Nangila uvua wenzela nanku, anu bualu bua Davide,

⁵ uvua muenze malu mimpe avua asankisha Maweja-Nangila. Davide kavua mubenge kutumikila ku diyi dia Maweja-Nangila nansha dimue to. Bubi bua Davide buvua anu buvuaye muenzele Uriye, muena Iti.

⁶ Robowame uvua uluangana mvita matuku onsu ne Yerobowame.

⁷ Bavua bafunde malu makuabu a Abiyame mu mukanda udibu babikila ne: Malu adi bakalenga ba bena Yuda benza. Abiyame kabidi uvua uluangana ne Yerobowame.

⁸ Yeye mumane kufua, kumujiikabu mu Tshimenga tshia Davide. Muanende wa balume Asa, kumupingana mu bukalenga.

Asa, mukalenga wa bena Yuda

⁹ Mu tshidimu tshia makumi abidi tshivua Yerobowame mu bukalenga bua bena Izrayele, Asa kupeta bukalenga mu bena Yuda.

¹⁰ Nanku, Asa kushala mukalenga mu Yerushalayime, bidimu makumi anayi ne tshimue. Kakuende wa Asa uvua Maaka, muana wa Abishalome.

¹¹ Asa kuenza malu mimpe avua asankisha Maweja-Nangila, muvua kakuende Davide muenze.

¹² Kuipataye mu ditunga balume ne bakaji bavua benda tshiendenda mu nzubu ya mvidie yabu. Kumushaye mpingu yonsu ya kutendelela mvidie ivua bankambua bende benza.

¹³ Asa kukandikaye bantu bua kababikidi kakuende Maaka ne: “Mukalenga muadi,” bualu Maaka uvua mupete meji mabi a kuenza lupingu lua mvidie mukaji Ashera. Asa kutuma diyi bua banyangakaje lupingu alu, baloshile ku muelelu wa musulu wa Sedrone.

¹⁴ Bushuwa, Asa uvua munange Maweja-Nangila ne muoyi wende mujima, kadi kavua munyangakaje miaba ivua bantu batendelela mvidie to.

¹⁵ Uvua ubueja mu nzubu wa Maweja-Nangila milambu ivuabu balambula Maweja-Nangila kudi tatuende Abiyame, ne ivuaye mulambule yeye mene. Milambu ayi ivua ya tshiamu tshitoke tshia mushinga mukole, ne tshiamu tshia mpawungi, ne ya bintu bikuabu bishilangane.

¹⁶ Asa uvua uluangana mvita matuku onsu ne Basha, mukalenga wa bena Izrayele.

¹⁷ Dituku dikuabu, Basha kuya kuluisha ditunga dia bena Yuda. Kutuadija kuibaka bimana bikole mu musoku wa Rama, bua Asa ne bena Yuda kabendakanyi luseke alu mudibu basue.

¹⁸ Diba adi, Asa kupesha balombodi ba mu bukalenga buende tshiamu tshitoke tshia mushinga mukole, ne tshiamu tshia mapwungi, bivua bishala ne mu nzubu wa Mvidi Mukulu, ne mu nzubu wende wa bukalenga. Uvua mutume, balombodi ba mu bukalenga buende ku Damase ne bintu abi, bua baye kupesha mukalenga wa bena Siriya, Benadade, muana wa Tabrimone, kabidi muikulu wa Eziyone. Uvua mubatume kabidi bua bambila Benadade ne:

¹⁹ “Tutue nebe ndondu bu muvua batatuetu batue. Ke pandi nkutumina tshiamu tshitoke tshia mushinga mukole ne tshiamu tshia mpawungi bua kukusankisha. Nanku, uye kushipa ndondu uuvua mutue ne Basha, mukalenga wa bena Izrayele, bua Basha umushe bena mvita bende badi mu buloba buanyi.”

²⁰ Benadade kuitaba dilomba dia Asa. Kutumaye bamfumu balombodi ba bena mvita bende bua kuluisha bimenga bia bena Izrayele. Bena mvita abu kukuata bimenga ebi: Yone, Dane, Abele-Bete-Maaka, buloba bua Kinerete, ne buloba bua Naftali buvua bushala.

²¹ Basha umvua lumu alu, kulekelaye mudimu wa kuibaka bimana bikole mu musoku wa Rama. Kupinganaye mu tshimenga tshia Tirsa.

²² Mukalenga Asa kubikidisha bena Yuda bonsu, kakuyi kushala muntu. Bena Yuda kuambula mabue onsu ne mabaya manene, bivua Basha munguje bua kuibaka nabi bimana bia musoku wa Rama. Kuibakabu nabi bimana bia musoku wa Ngeba wa Binyamine ne bia musoku wa Mispa, bu muvua mukalenga Asa muambe.

²³ Bavua bafunda malu makuabu a Asa mu mukanda udibu babikila ne: Malu adi bakalenga ba bena Yuda benza. Mu mukanda awu, mbafundemu malu onsu avua Asa muenze, baleja ne dikima divuaye nadi, kabidi ne bimenga bivuaye muibake ne bimana bikole. Asa mumane kukulakaja, kuwulaye makasa.

²⁴ Yeye mumane kufua, kumujiikabu mu lukita lua bena diku diende, luvua mu Tshimenga tshia Davide. Muanende wa balume Yosafate kumupingana mu bukalenga.

Nadabe, mukalenga wa bena Izrayele

²⁵ Mu tshidimu tshibidi tshivua Asa mu bukalenga bua bena Yuda, Nadabe, muana wa Yerobowame, kudia bukalenga bua bena Izrayele. Kushalaye mu bukalenga bidimu bibidi.

²⁶ Uvua muenze bidi Maweja-Nangila ubenga. Uvua muenze malu anu bu tatuende, uvua ufikisha bena Izrayele ku dienza bibi. Nadabe uvua muenze malu mabi onsu avua tatuende muenze.

²⁷ Ke Basha, muana wa Akiya, muena tshisamba tshia Isakare, kuelela Nadabe tshifufu tshibi. Bena Peleshete bavua bamane kukuata tshimenga tshia Ngibetone. Dibadivua Nadabe ne bena mvita baluisha tshimenga atshi, Basha kushipa mukalenga Nadabe.

²⁸ Bionsu abi bivua bienzeka mu tshidimu tshisatu tshivua Asa mu bukalenga bua bena Yuda. Basha kuangata bukalenga bua bena Izrayele.

²⁹ Anu ubuela mu bukalenga, kushipeshaye bena nzubu wa Yerobowame bonsu. Kawa mushiye muntu wa ku ndelanganyi ya Yerobowame nansha umue ne muoyi. Kubabutulaye bonsu bu muvua muambi Akiya, uvua ku Silo, muambile bantu mu dina dia Maweja-Nangila.

³⁰ Bionsu abi bivua bienzeka bualu Yerobowame uvua muenze bibi, mufikishe kabidi bena Izrayele ku dienza bibi. Bualu ebu buvua bufikisha Maweja-Nangila Mvidi Mukulu wa bena Izrayele, munda bikole.

³¹ Malu makuabu a Nadabe, mbaafunde mu mukanda udibu babikila ne: Malu adi bakalenga ba bena Izrayele benza.

³² Asa uvua uluangana mvita matuku onsu ne Basha, mukalenga wa bena Izrayele.

Basha, mukalenga wa bena Izrayele

³³ Nanku, mu tshidimu tshisatu tshivua Asa mu bukalenga mu Yuda, Basha, muana wa Akiya, kubuelaye mu bukalenga bua bena Izrayele. Basha kushala mu bukalenga mu tshimenga tshia Tirsa bidimu makumi abidi ne binayi.

³⁴ Kadi, kuenzaye malu mabi avua Maweja-Nangila kayi musue to. Kuenzaye malu mabi bu muvua Yerobowame muenze, mufikishe ne bena Izrayele ku dienza bibi. Uvua muenze malu mabi avua Yerobowame muenze.