1 Bakalenga 12 - MUKANDA WA MYIDI MUKULU

Tshisangilu tshia ku Shekeme

¹ Robowame kuya ku Shekeme, bualu ke muaba uvua bisamba bionsu bia ku mutu bifike bua kumubanjija mu bukalenga.

² Yerobowame, muana wa Nebate, uvua anu mu Ejipitu, muaba uvuaye munyeme mukalenga Shelomu. Yerobowame kumvua lumu lua tshisangilu tshia ku Shekeme, kadi uvua musue kushala muindile ku Ejipitu.

³ Kumutuminabu bantu bua kumubikila. Yerobowame kufika ku Shekeme, pamue ne bantu bonsu ba bisamba bia ku mutu bavua badisangisha, kuambilabu Robowame ne:

⁴ — Tatuebe Shelomu uvua unkengesha bu bapika. Kadi mpinndiewu, wewe utukepeshile kakese dikenga edi, didi ditutonda bu mudi mutshi wa kuambula nawu bujitu utonda pa makaya, netukuenzele mudimu.

⁵ Robowame kuandamuna ne: — Ndekelayi nganji kuela meji. Papita matuku asatu, nupingane kabidi bua kumonangana nanyi. Bantu bonsu kutangalaka.

⁶ Mukalenga Robowame kuya kuebeja lungenyi kudi bakulu bavua tatuende Shelomu wenza nabu mudimu, patshivuaye ne muoyi. Robowame kubakonka ne: — Nudi numpesha lungenyi kaayi bua meme kuandamuna bantu aba?

⁷ Bakulu kuandamuna ne: — Wewe mubaleje muudi musue kuenzela bantu bebe mudimu, kuikala muntu wa bantu, wewe mubandamune meyi mimpe, nebikale bena mudimu bebe kashidi.

⁸ Kadi, mukalenga Robowame kubenga lungenyi lua bakulu alu. Kuebejaye lungenyi kudi bansongalume, bena mulongu nende, bavuaye mukole nabu.

⁹ Kubakonkaye ne: — Bena Izrayele badi bajinga bua meme kubakepeshila dikenga divuabu babakengesha kudi tatu wanyi Shelomu, bualu ndimane kubatonda bu mudi mutshi wa kuambula nawu bujitu utonda. Kadi nuenu nudi numpesha lungenyi kaayi bua meme kubandamuna?

¹⁰ Bansongalume, bena mulongu nende kumuandamuna ne: — Bantu abu badi banyingalala, bualu tatuebe Shelomu uvua ubakengesha bu bapika. Kabidi badi bakulomba bua wewe kubakepeshila dikenga adi. Nanku, ubandamune mushindu ewu: “Munu wanyi wa kantengenene mmunene mupite diboku dia tatu wanyi.

¹¹ Tatu wanyi mmunuambuishe bujitu ku mutshi wa kuambula nawu bujitu. Kadi meme, nensakidila bujitu bukuabu ku mutshi aku. Tatu wanyi uvua unukengesha, unutuuta mikaba bitekete. Kadi meme nennukengeshe, nnutuute mikaba misuika tukanu.”

¹² Matuku asatu akumbana, Yerobowame ne bena Izrayele bonsu kuya kudi Robowame, bu nuwuaye mubalaye.

¹³ Mukalenga Robowame mumane kubenga lungenyi luwabu bamupesha kudi bakulu, kuandamunaye bena Izrayele ne lonji,

¹⁴ bilondeshile lungenyi luvuabu bamupesha kudi bansongalume, bena mulongu nende. Robowame kuambila bena Izrayele ne: — Tatu wanyi uvua munuambuishe bujitu ku mutshi wa kuambula nawu bujitu. Kadi meme, nensakidila bujitu bukuabu ku mutshi aku. Tatu wanyi uvua unukengesha, unutuuta mikaba, kadi meme, nennukengeshe, nnutuute mikaba misuika misonsu.

¹⁵ Nanku, mukalenga Robowame kavua muitabe dilomba dia bena Izrayele to. Maweja-Nangila Mvidi Mukulu ke uvua muenzeje bionsu abi, bua kukumbaja bualu buvuaye mumane kuambila muambi Akiya ku Silo bua kumanyishaye Yerobowame, muana wa Nebate.

Bukalenga budi bapanduluka

¹⁶ Bena Izrayele ba ku mutu, bamane kumvua ne: mukalenga Robowame kena muitabe dilomba diabu, kuandamunabu ne: — Davide katuena nende bualu, katuena basue kulonda muana wa Ishayi to! Bena Izrayele, tupinganayi ku nzubu yetu; wewe muntu wa ku ndelanganyi ya Davide, shala ne bukalenga buebe mpindiewu! Ke bena Izrayele kumuka muaba awu.

¹⁷ Robowame kushala anu mukalenga wa bantu bavua mu buloba bua bena Yuda.

¹⁸ Pashishe kutumaye Adorame kudi bena Izrayele ba ku mutu mu ditunga: Adorame uvua mulombodi wa midimu ya kulongolola ditunga. Kadi, bena Izrayele kuasa Adorame mabue, kumushipa. Nanku, Robowame kubandaye pa ditempu diende dia mvita, kunyema kuya mu Yerushalayime.

¹⁹ Ke muvua bisamba bia bena Izrayele bia ku mutu bibenga bumfumu bua bena nzubu wa Davide nanku. Bisamba ebi bitshidi anu bibubenga too ne mpindiewu.

²⁰ Bena Izrayele bonsu ba ku mutu, bamane kumvua lumu lua dipingana dia Yerobowame, kudisangisha nkayabu. Kubikidishabu Yerobowame mu tshisangilu atshi, kumusungula bua ikale mukalenga wa bena Izrayele. Nanku, anu tshisamba tshia Yuda nkayatshi kushala kuitaba nzubu wa Davide.

²¹ Anu Robowame upingana mu Yerushalayime, kusangishaye bena mvita binunu lukama ne makumi muanda mukulu bavua bamanye mvita bikole, ba mu tshisamba tshia bena Yuda ne tshia bena Binyamine. Uvua musue kuya kuluisha bena Izrayele bavua ku mutu mu ditunga, bua yeye muana wa Shelomu, ashale mukalenga wabu ku bukole.

²² Kadi, Mvidi Mukulu kuyukila ne muambi Shemaya, umuambila ne:

²³ — Uye kudi Robowame, muana wa Shelomu, mukalenga wa bena Yuda, ne kudi bena Yuda ne bena Binyamine bonsu, ubambile ne:

²⁴ Maweja-Nangila udi wamba ne: “Kanuyi kuluisha bana benu bena Izrayele nansha. Muntu yonsu wa kunudi apingane ku nzubu kuende. Bualu meme Maweja-Nangila, ndi mukumbaje bionsu bidi bienzeka ebi.” Robowame ne bena Yuda bumvue diyi dia Maweja-Nangila, kuitababu. Kupinganabu ku nzubu yabu.

²⁵ Yerobowame kukoleshisha tshimenga tshia Shekeme ne bimana, mu buloba bua mikuna bua Efrayime. Kusombaye mu tshimenga atshi. Pashishe, kumukaye mu Shekeme, bua kuya kukolesha kabidi tshimenga tshia Penuyele ne bimana.

Bubi bua Yerobowame

²⁶ Yerobowame kudikonka, wamba ne: “Mushindu udi bulongolodi bua ditunga mpindiewu, bantu ba mu bukalenga buanyi badi mua kupingana kudi bena nzubu wa Davide.

²⁷ Bualu padibu baya mu Yerushalayime bua kulambula milambu mu nzubu wa Maweja-Nangila, mioyi yabu idi mua kupingana kudi mukalenga wabu wa kale Robowame, wa bena Yuda. Nanku nebanshipe, bua bashale ku bumfumu bua Robowame.”

²⁸ Mukalenga Yerobowame kuela meji, ukeba tshia kuenza. Pashishe kuenzaye tuana tua ngombe tubidi tua tshiamu tshia mpawungi. Kuambilaye bena Izrayele ne: — Nuvua nuya mu Yerushalayime misangu yonsu. Kadi mpindiewu kanuyi kabidi mu Yerushalayime to. Tangilayi Mvidi Mukulu wenu uvua munupatule mu Ejipitu udi muaba ewu.

²⁹ Yerobowame kuteka lupingu lua tshiamu tshia mpawungi ku Betele, lukuabu ku Dane.

³⁰ Nanku, Yerobowame kufikisha bena Izrayele ku dienza bibi. Bantu ba bungi kuya kushindikija lupingu luibidi too ne ku Dane.

³¹ Yerobowame kuibaka nzubu ya tshijila pabuipi ne miaba mitumbuke kuabu batendelela mvidie kale. Kusungulaye bantu ba munkatshi mua bena Izrayele, bua kuikalabu batuangaji. Bantu abu, kabavua ba mu tshisamba tshia bena Levi to.

³² Yerobowame kujadika bua bikale benza tshibilu mu matuku dikumi ne atanu a ngondu wa muanda mukulu. Tshibilu atshi, tshivua mushindu umue ne tshivuabu benza mu buloba bua bena Yuda. Kabidi Yerobowame nkayende uvua ulambula milambu pa tshilambuilu. Ke tshivua Yerobowame wenza mu Betele. Uvua ulambuila mpingu ya tuana tua ngombe tuvuaye wenza milambu ayi. Batuangaji bakuabu bavuaye musungule bua kuenzabu mudimu miaba ya tshijila, uvua mubateke ne mu Betele amu.

Maweja-Nangila udi ukandika ditendelela dia mu Betele

³³ Mu matuku dikumi ne atanu a ngondu wa muanda mukulu, Yerobowame yeye nkayende uvua musungule dituku dia kuenza tshibilu ne bena Izrayele mu Betele. Munkatshi mua tshibilu, Yerobowame nkayende uvua ulambula milambu pa tshilambuilu tshivuaye muenze atshi.