1 Bakalenga 11 - MUKANDA WA MYIDI MUKULU

Shelomu udi utombokela Maweja-Nangila

¹ Mukalenga Shelomu mumane kusela muana wa mukalenga wa bena Ejipitu, kuselaye kabidi bakaji ba bungi ba bisamba bikuabu: ba bena Mowabe, bena Amone, bena Edome, bena Sidone ne bena Iti.

² Kadi Maweja-Nangila uvua mumane kuambila bena Izrayele bua bisamba ebi ne: “Kanusedi bantu ba bisamba ebi to. Kanuitabi bua bantu ba bisamba ebi basele bana benu. Bualu badi mua kunuibidija bua nuenu kutendelela mvidie yabu.” Kadi, Shelomu kuangata bakaji ba bisamba bikuabu abu, bualu uvua mubanange bikole.

³ Uvua musele bakaji nkama muanda mutekete, bana ba bakalenga, ne bakaji bakuabu nkama isatu. Bakaji bonsu aba, bavua benzeja Shelomu muvuabu basue.

⁴ Shelomu mumane kukola mukulakaje, bakaji aba kumuibidija mua kutendelelaye mvidie mikuabu. Shelomu katshivua munange Maweja-Nangila Mvidi Mukulu wende ne muoyi mujima, bu muvua tatuende Davide mumunange to.

⁵ Shelomu kutendelela Astarte, mvidie mukaji wa bena Sidone, ne Milkome, mvidie mubi wa bena Amone.

⁶ Shelomu kufikisha Maweja-Nangila munda, bualu kavua umutumikila muende muonsu, bu muvua tatuende Davide wenza to.

⁷ Tshikondu atshi, Shelomu kulongoluela Kemoshe, mvidie mubi wa bena Mowabe, muaba wa tshijila pa mukuna uvua mutangilangane ne Yerushalayime. Kulongololaye kabidi Milkome, mvidie mubi wa bena Amone, muaba wa tshijila.

⁸ Kulongolaye kabidi miaba ya tshijila bua mvidie ya bakaji bende bonsu ba bisamba bikuabu, bua bakaji bende balambule mvidie ayi milambu ya manananshi, nansha ya nyama.

^9-10 Maweja-Nangila Mvidi Mukulu wa bena Izrayele, uvua mumane kumuenekela Shelomu misangu ibidi, mumukandike ne: kuena mua kutendelela mvidie mikuabu to. Kadi, Shelomu kavua mutumikile diyi dia Maweja-Nangila to. Uvua mubenge Maweja-Nangila. Nanku, Maweja-Nangila kufikila Shelomu munda,

¹¹ umuambila ne: — Bu muudi muenze nanku, kuyi munemeke ndondu utuvua batue nebe, nansha mikenji imvua mukuambile, ndi nkunyenga bukalenga, mbupesha muntu webe mukuabu.

¹² Kadi bualu bua tatuebe Davide, tshiena nkunyenga bukalenga pautshidi ne muoyi to. Nennyenge bukalenga kudi muanebe.

¹³ Kadi, tshiena mmunyenge bukalenga buonsu to. Nemmushile tshisamba tshimue, anu bualu bua muntu wanyi Davide, ne bualu bua Yerushalayime tshimenga tshimvua musungule.

Baluishi ba Shelomu

¹⁴ Maweja-Nangila kutumina Shelomu muluishi, muena Edome. Dina diende divua Adade, muana wa ku ndelanganyi ya mu nzubu wa bukalenga bua bena Edome.

¹⁵ Tshikondu tshivua Davide uluisha bena Edome, Yowabe, mfumu mulombodi wa bena mvita ba Davide, uvua muye ku Edome ne bena mvita, bua kujiika bitalu bia bena mvita ba bena Izrayele. Yowabe kushipesha nsongalume yonsu ya bena Edome, ne bantu balume bonsu.

¹⁶ Yowabe ne bena mvita bavuaye nabu, kushala mu Edome ngondu isambombu, bua kushipa nsongalume, ne bantu balume bonsu.

¹⁷ Tshikondu atshi, Adade utshivua anu nsongalume. Kunyemaye, kuya mu Ejipitu ne bena Edome bakuabu bavua bena mudimu ba tatuende.

¹⁸ Kumukabu mu buloba bua bena Madiyane, kupitshilabu mu tshipela tshia Parane. Kuangatabu bantu bavua mu tshipela tshia Parane, kuya nabu mu Ejipitu kudi mukalenga wa ditunga. Mukalenga wa bena Ejipitu, kupesha Adade nzubu ne maloba. Kumulayaye bua kumudisha.

¹⁹ Mukalenga wa bena Ejipitu kunanga nsongalume awu Adade bikole. Kumuseleshaye bukonde buende, muanabu ne Tapenese, mukajende mukalenga muadi.

²⁰ Nsongakaji awu, muanabu ne Tapenese, kulela muana wa balume ne bayende Adade. Dina dia muana awu Ngenubate. Tapenese kukoleshila muana awu anu mu nzubu mua mukalenga wa bena Ejipitu, munkatshi mua bana ba mukalenga.

²¹ Patshivua Adade mu Ejipitu, kumvuaye lumu ne: Davide ne Yowabe, mfumu wa bena mvita bende, mbamane kufua. Adade kuambila mukalenga wa bena Ejipitu ne: — Witabe, mpingane mu ditunga dianyi!

²² Mukalenga wa bena Ejipitu kumukonka ne: — Tshiudi ujinga tshindi tshiyi mua kukupa ntshinyi? Udi musue kupingana mu ditunga diebe bua tshinyi? Awu kuandamuna ne: — Tshiena nkengela tshintu to. Kadi, anji kuitaba bua meme kuya!

²³ Mvidi Mukulu kutumina Shelomu muluishi mukuabu. Dina diende divua Rezone, muana wa Eliyada. Rezone uvua munyeme kua mfumuende Adadezere, mukalenga wa Soba.

²⁴ Tshikondu tshivua Davide mushipe bena mvita ba Adadezere. Rezone uvua musangishe bena mvita, ubalombola. Kuyaye nabu, kusomba ku Damase, kuangataye bukalenga muaba awu.

²⁵ Nanku, Rezone uvua muluishi wa bena Izrayele matuku onsu avua Shelomu mushale mu bukalenga. Rezone uvua ukengesha Shelomu, anu muvua Adade uluisha bena Izrayele. Matuku onsu avua Rezone muikale mukalenga wa bena Siriya, kavua munange bena Izrayele to.

Yerobowame udi utombokela Shelomu

^26-27 Yerobowame kabidi uvua mutombokele mukalenga Shelomu mushindu ewu: Yerobowame, muana wa Nebate, uvua muena Efrayime wa mu musoku wa Sereda. Mamuende uvua mukaji mukamba, dina diende Seruya. Yerobowame uvua muena mudimu wa Shelomu. Kadi kumutombokelaye. Tshikondu tshivua Shelomu muwuje ne buloba muaba wa Milo, ulongoluesha miaba ivua mitubuke ku bimana bivua binyungulule Tshimenga tshia Davide,

²⁸ Yerobowame uvua nsongalume wa mushinga mukole. Shelomu uvua mumone muvua Yerobowame wenza mudimu wende bimpe. Nanku kumusungulaye bua ikale utangila bena mudimu ba bena Efrayime ne bena Menashe.

²⁹ Dituku dikuabu, Yerobowame uvua umukila mu Yerushalayime. Mu njila, kusambakenaye ne muambi Akiya wa ku tshimenga tshia Silo. Bavua anu nkayabu babidi mu tshisuku. Muambi Akiya uvua mudiele tshinkutu tshipiatshipia pa makaya.

³⁰ Muambi Akiya kupanda tshinkutu atshi bipese dikumi ne bibidi.

³¹ Pashishe kuambilaye Yerobowame ne: — Angata bipese bia tshinkutu etshi dikumi! Bualu Maweja-Nangila Mvidi Mukulu wa bena Izrayele udi ukuambila ne: “Ne-nnyenge Shelomu bukalenga. Nenkupe wewe bisamba dikumi.

³² Shelomu neashale anu ne tshisamba tshimue, bualu bua muntu wanyi Davide, ne bua Yerushalayime, tshimenga tshimuepela tshimvua mumane kusungula mu buloba bua bena Izrayele.

³³ Nengenze nanku, bualu bena Izrayele mbambenge. Badi batendelela Astarte, mvidie mukaji wa bena Sidone, Kemoshe mvidie wa bena Mowabe, ne Milkome, mvidie wa bena Amone. Kabena balonda njila umvua mubaleje to. Kabena bangenzela bimpe. Kabena batumikila meyi anyi ne mikenji yanyi bimvua mubambile. Kabena babikumbaja bu muvuabu babikumbaja kudi Davide, tatuende wa Shelomu.

³⁴ Nanku, tshiena nnyenga Shelomu bukalenga bujima to. Nemmulame bu mukalenga wa bantu banyi bena Izrayele matuku onsu atshidiye ne muoyi, anu bua muntu wanyi Davide umvua musungule, uvua utumikila ku meyi anyi ne ku mikenji yanyi.

³⁵ Nanku, nennyenge bukalenga anu kudi muana wa Shelomu. Nenkupeshe wewe Yerobowame bisamba dikumi.

³⁶ Kadi, nenshile muana wa Shelomu tshisamba tshimue, bua muntu wa ku ndelanganyi ya Davide ikale mu bukalenga kashidi, kumpala kuanyi mu Yerushalayime, tshimenga tshimvua mumane kusungula, bua bantu kuntendelelamu muaba wanyi wa tshijila.

³⁷ “Kadi, Yerobowame, ndi nkupa bukalenga buudi ujinga. Newikale mukalenga wa bisamba dikumi bia bena Izrayele.

³⁸ Wewe muteleje bionsu bingikala nkuambila, wewe mulonde njila ungikala nkuleja, wewe mungenzele bimpe, wewe mutumikile meyi anyi ne mikenji yanyi bingakupesha, bu muvua muntu wanyi Davide utumikila, nengikale nebe kashidi. Ndi nkulaya ne: ndelanganyi yebe neishale mu bukalenga kashidi anu bu mudi ndelanganyi ya Davide ishala mu bukalenga. Meme nenkupe bisamba bia bena Izrayele dikumi,

³⁹ bua meme kufuisha ndelanganyi ya Davide bundu. Kadi, tshiena mfuisha ndelanganyi ya Davide bundu kashidi to.”

⁴⁰ Ke Shelomu kukeba muvuaye mua kushipa Yerobowame. Kadi Yerobowame kunyema kuya mu Ejipitu. Kuyaye kudi Shishake, mukalenga wa ditunga adi. Kushalaye mu Ejipitu too ne pakafua Shelomu.

⁴¹ Malu makuabu a Shelomu bavua baafunde mu mukanda udibu babikila ne: Malu adi Shelomu muenze. Mu mukanda awu, badi bakula bua malu onsu adi Shelomu muenze, balejamu kabidi meji onsu avuaye nawu.

⁴² Shelomu uvua mushale mu bukalenga mu Yerushalayime bidimu makumi anayi, ulombola bisamba bionsu bia bena Izrayele.

⁴³ Shelomu mumane kufua, kumujikabu pabuipi ne muaba uvuabu bajika tatuende, mu Tshimenga tshia Davide. Muanende wa balume Robowame kumupingana mu bukalenga.