1 Bakalenga 10 - MUKANDA WA MYIDI MUKULU

Mukalenga mukaji wa ku Saba udi umonangana ne Shelomu

¹ Mukalenga mukaji wa mu ditunga dia Saba, kumvuaye lumu lua Shelomu. Kuyaye bua kumonangana nende, kumukonka malu makole bua kujadika muvua lungenyi luende.

² Mukalenga mukaji awu, kufika mu Yerushalayime ne musumba munene wa bantu bavuaye nabu. Uvua kabidi ne nyama ya tumelu miambule manananshi, tshiamu tshia mpawungi kilo mivule, ne mabue a mushinga mukole. Kufikaye kudi Shelomu. Kumuelaye makonka onsu avuaye mumane kulongolola.

³ Mukalenga Shelomu kuandamuna ku makonka awu onsu. Kawa mushiye dikonka nansha dimue, kayi mudiandamune.

⁴ Mukalenga mukaji wa mu Saba kujadika muvua Shelomu muakule ne lungenyi, kukema bikole bua mushindu uvua nzubu wa bukalenga uvua Shelomu mudibakile,

⁵ bua biakudia bivuabu bateka ku mesa, bua balombodi ba bukalenga bua Shelomu, bavua basombe ku mesa balondangane bimpe, bua bilamba bivuabu bavuale kudi bena mudimu bavua babanya biakudia ne bia kunua. Mukalenga mukaji umona milambu ivua Shelomu ulambula mu nzubu wa Maweja-Nangila, kukemaye bikole bua bintu bionsu abi, kupangaye ne mua kuakula.

^6-7 Pashishe kuambilaye mukalenga Shelomu ne: — Pamvua mu ditunga dianyi, mvua mumvue lumu luebe ne lua meji audi nawu. Pamvua tshiyi muanji kufika kuneku bua meme kudijadikila nkayanyi bivuabu bangambila, mvua anu ne mpata. Kadi bionsu bivuabu bangambila, bivua anu bia bushuwa. Kadi bavua bangambila anu malu makese. Meji ebe ne bubanji buebe mbipite lumu luebe lumvua mumvue.

⁸ Bena mudimu bebe ne bantu badi mu nzubu webe wa bukalenga mbena diakalenga! Bualu udi nabu matuku onsu. Badi bumvue meji ebe ne lungenyi luudi nalu.

⁹ Maweja-Nangila Mvidi Mukulu webe atumbe. Uvua mukusungule bua wikale mukalenga wa bena Izrayele! Bualu Maweja-Nangila mmunange bena Izrayele kashidi. Ke padiye mukuteke mukalenga wabu bua kubaludika mu njila wa malu mimpe.

¹⁰ Pashishe mukalenga mukaji wa Saba, kupesha mukalenga Shelomu tshiamu tshia mpawungi kilo binunu bisatu ne nkama itanu. Kumupeshaye kabidi manananshi a bungi, ne mabue a mushinga mukole. Biangatshile ku dituku adi, kabena banji kufika ne manananshi bungi ebu mu ditunga dia bena Izrayele to.

¹¹ Matu a mukalenga Irame avua maye ku Ofire, avua matuadile mukalenga Shelomu tshiamu tshia mpawungi, mitshi ya santale mipite bungi, ne mabue a mushinga mukole.

¹² Mukalenga Shelomu kuenza lutanda ne makunji a kueyemena ku nzubu wa Mvidi Mukulu, ne ku nzubu wende wa bukalenga, ne mitshi ya santale. Kuenzaye nayi kabidi bisanji ne nzenze, bua bantu bavua bimba misambu. Too ne mpindiewu, kabena banji kufika kabidi ne mitshi ya santale bungi ebu mu ditunga dia bena Izrayele to.

¹³ Mukalenga Shelomu kupesha mukalenga mukaji wa ku Saba, bintu bionsu bivuaye ukengela ne bivuaye ulomba. Kumupeshaye kabidi ne muoyi muimpe bintu bia kumusankisha nabi bivua mukalenga mukaji awu kayi mulombe to. Pashishe mukalenga mukaji ne bena mudimu bende bavuaye nabu, kupingana mu ditunga diabu.

Bubanji bua Shelomu

¹⁴ Ku tshidimu tshimue, tshiamu tshia mpawungi tshi wa mukalenga Shelomu mupete mu Yerushalayime tshivua kilo binunu makumi abidi.

¹⁵ Tusakidile milambu ivuabu bapeta ku bintu bia ku matunga makuabu bivua bangenda mushinga babueje mu ditunga, ku bungenda mushinga bukuabu, ne ku bitadi bivuabu balambula kudi bakalenga ba bisamba bikuabu, nansha bivuabu bapeta kudi balongolodi ba maloba a mu ditunga.

¹⁶ Mukalenga Shelomu kuenzeja ngabu minene nkama ibidi milamakaja ne tshiamu tshia mpawungi. — Ngabu yonsu, uvua ukengela tshiamu tshia mpawungi kilo isambombu. —

¹⁷ Uvua muenzeje kabidi ngabu mikese nkama isatu, milamakaje ne tshiamu tshia mpawungi. — Ngabu yonsu uvua ukengela tshiamu tshia mpawungi kilo umue ne tshitupa. — Shelomu kuteka ngabu yonsu ayi mu nzubu uvuabu babikila ne: “Ditu dia Lebanone.”

¹⁸ Mukalenga Shelomu kuenzeja nkuasa munene wa bukalenga mulengeja ne mibanga, mulamika tshiamu tshia mpawungi.

¹⁹ Bavua bateka nkuasa wa bukalenga awu pa tshibandilu tshivua ne bidiatshilu bisambombu. Uvua ne tshia kueyemina panyima tshienza dintonya. Nkuasa uvua kabidi ne maboku eku ne eku. Bavua bateke mpingu ya nyama ya ntambue, ewu ku luseke, mukuabu ku luseke lua nkuasa.

²⁰ Mpingu mikuabu ya nyama ya ntambue dikumi ne ibidi ivua ku bidiatshilu bia tshibandilu atshi: nyama isambombu ku dia balume, mikuabu isambombu ku dia bakaji. Kabavua banji kuenza nkuasa wa bukalenga wa mushindu ewu mu ditunga dikuabu to.

²¹ Makopu a mukalenga Shelomu awu, avua anu a tshiamu tshia mpawungi. Kabidi bintu bionsu bia kudila bivua mu nzubu uvuabu babikila ne: “Ditu dia Lebanone,” bivua anu bia tshiamu tshia mpawungi menemene. Kabavua benza bintu bia tshiamu tshitoke tshia mushinga mukole to. Bualu mu tshikondu tshia Shelomu, tshiamu tshitoke tshia mushinga mukole katshivua ne lumu.

²² Mukalenga Shelomu uvua ne matu avuaye utuma mitantshi mile, musangu umue ne matu a mukalenga Irame. Pavua bidimu bisatu bipite, matu awu avua apingana mambule tshiamu tshia mpawungi, tshiamu tshitoke tshia mushinga mukole, mibanga, nyama ya nkima, ne nyunyi ya mu matunga makuabu.

²³ Nanku, mukalenga Shelomu uvua mupite bakalenga bonsu ba pa buloba, ku bubanji ne ku lungenyi.

²⁴ Bualu Mvidi Mukulu uvua mumupe lungenyi lua bungi. Bantu bavua bafuma nseke yonsu, bua kuebeja Shelomu malu.

²⁵ Ku tshidimu tshionsu, bantu bonsu aba bavua bakadila Shelomu bintu bia kumusankisha nabi: bintu bienza ne tshiamu tshitoke tshia mushinga mukole, ne tshiamu tshia mpawungi, bilamba, bintu bia kuluangana nabi mvita, manananshi, nyama ya tubalu nansha ya mpunde.

²⁶ Shelomu kusangisha matempu a mvita ne nyama ya tubalu. Uvua ne matempu a mvita tshinunu ne nkama inayi, ne nyama ya tubalu binunu dikumi ne bibidi. Kulamaye tshitupa tshia nyama ya tubalu ayi mu Yerushalayime. Nyama mikuabu kuyabanyabu mu bimenga bivua ne bikumbi Alongolola bua kuyiteka.

²⁷ Mu tshikondu tshia mukalenga Shelomu, mu Yerushalayime muvua nkanu mitoke ya mushinga mukole bungi bu nsoka. Muvua kabidi mitshi ya sedre ya bungi bu bua mitshi ya sikomore idi itoloka mu Mpata.

²⁸ Nyama ya tubalu ya Shelomu ivua ifumina ku Ejipitu ne ku Silisiya, miaba ivuabu baya kuyisumbila mukalenga Shelomu kudi bangenda mushinga.

²⁹ Ditempu dia mvita dimue dia mu Ejipitu, divua ne mushinga wa nkanu mitoke ya mushinga mukole nkama isambombu. Nyama wa kabalu umue, uvua ne mushinga wa nkanu mitoke ya mushinga mukole lukama ne makumi atanu. Bangenda mushinga aba, bavua basumbila kabidi bakalenga ba bena Iti ne ba bena Siriya bintu abi.