Yowanane 6 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi udisha bantu binunu bitanu

¹ Hakashika malu â, Yesu wakaya dishia dia dishiba dia Galela, didi dishiba dia Tibelia.

² Bantu ba bungi bakamulonda, bualu bua bakatangila bimanyinu biakenzeleye bena mabedi.

³ Yesu wakabanda ku mukuna, wakashikamaku ne bayidi bandi.

⁴ Kuhita kua Yehowa, disanka dia Bena Yuda, kuakadi ha buihi.

⁵ Yesu wakabanduluka, wakamona bantu ba bungi balua kudiye, wakakonka Filipo ne, Netusumbe mitanda ya bidia kudi kunyi, bantu aba badie?

⁶ Wakamukonka nunku bua kumuteta munda, bua yeye wakadi mumanye bualu buakadiye ha kuenza.

⁷ Filipo wakamuandamuna ne, Bidia bia mushinga wa ndenalio nkama ibidi kabiena bibakumbana bua muntu ne muntu kuangata anu bikese.

⁸ Muyidi wandi mukuabo, Andele, muanʼabo ne Simona Petelo, wakamuambila ne,

⁹ Nsongalume mukese udi aha, udi ne mitanda itanu ya bidia bia seola ne mishiha ibidi; kadi bintu ebi ntshinyi tshienzelabi bantu bungi nunku?

¹⁰ Yesu wakamba ne, Shikamishai bantu. Mashinde a bungi akadihu. Nunku balume bakashikama, bakadi bu binunu bitanu.

¹¹ Yesu wakamema mitanda; hakatendeleleye Nzambi, wakayabanyina bakadi bashikame, ne mishiha kabidi bungi buakadibo basue.

¹² Hakûkutabo, wakambila bayidi ne, Angula! bihesa bia bidia bidi bishale, tshintu katshijiminyi.

¹³ Bakabiangula nunku, bakûsha bisaka dikumi ne bibidi tente ne bihesa bia mitanda itanu ya bidia bia seola biakadibo bashîa kudi bakadia.

¹⁴ Hakamona bantu tshimanyinu etshi tshiakenzeye, bakamba ne, Bulelela, eu udi muprofete ulualua ha buloba.

Yesu udi wenda ha mutu ha mai

¹⁵ Hakamanya Yesu ne, Badi bamba kunkuata ku bukole bua kumbuesha mu bukelenge, wakaya ku mukuna kabidi, yeye nkayandi.

¹⁶ Hakabuela diba, bayidi bandi bakahueka ku dishiba;

¹⁷ bakabuela mu buatu, bakadi baya dishia ku Kapênuma. Butuku buakila, Yesu kakanza kulua kudibo.

¹⁸ Mai akadi ajuka mavuala bualu bua tshihehele tshikole tshiakadi tshiheha.

¹⁹ Hakitabo bualu ntanta bu ya kilometa inai anyi itanu, bakatangila Yesu wenda ha mutu ha mai, ulua hehi ne bualu; bakatshina.

²⁰ Kadi yeye wakabambila ne, Nmeme, kanutshinyi.

²¹ Nunku bakitabusha bua kumubuesha mu buabi; buatu buakafika lukasa ku mpata kuakadibo baya.

Yesu udi bidia bia muoyo

²² Hakatshiabu, bantu bakadi bimane dishia dia dishiba bakamona anu buatu bumue; bakamanya kabidi ne, Yesu kena mubuele mu buatu ne bayidi bandi, anu bobo nkayabo bakuya,

²³ (kadi matu mafume ku Tibelia akalua hehi ne muaba wakadiabo bidia, hakatendelela Mukelenge Nzambi);

²⁴ hakamanya bantu ne, Yesu kena kunoko ne bayidi bandi, bakabuela mu matu, bakalua ku Kapênuma, bakeba Yesu.

²⁵ Hakamumonabo dishia dia dishiba, bakamukonka ne, Labi, wakulua kunoko diba henyi?

²⁶ Yesu wakabandamuna ne, Bulelela, bulelela, udi nuambila ne, Kanuena nunkeba bua bimanyinu binuakutangila, nudi nunkebela bua nuakudia mitanda, nuakûkuta.

²⁷ Kanukuatshi mudimu bua bia kudia bitu biafua, kadi nûkuate bua bidi bishala tô ne ku muoyo wa tshiendelele, bianuha Muana wa muntu; bualu bua Tatu, Nzambi mene, wakamuteka tshimanyishilu.

²⁸ Bakamukonka ne, Netuenze tshinyi bua tuetu kuenza midimu ya Nzambi?

²⁹ Yesu wakabandamuna ne, Mudimu wa Nzambi udi nunku: nuitabushe wakatumeye.

³⁰ Bakamukonka ne, Udi wenza tshimanyinu kai bua tuetu tumone, tuitabushe dî diebe? Tshiudi wenza ntshinyi?

³¹ Bankambua betu bakadia mana mu tshihela, bu muakafundabo ne, Yeye wakabaha bidia bia mu diulu.

³² Yesu wakabambila ne. Bulelela, bulelela, udi nuambila ne, Mose kakanuha bidia bia mu diulu, Tatu wanyi udi unuha bidia bilelela bia mu diulu.

³³ Bua bidia bia Nzambi mbiobio bîdi bifuma mu diulu, bidi biha ba ha buloba muoyo.

³⁴ Bakamuambila ne, Mukelenge, Utuhe bidia ebi matuku onso.

³⁵ Yesu wakabambila ne, Ndi bianyi bidia bia muoyo; walua kundi kena wikala ne nsala, wangitabusha kena wikala ne nyota.

³⁶ Kadi nakunuambila ne, Nuakutangila, kanuena nuitabusha.

³⁷ Bonso badi Tatu umpa nebalue kundi; tshiena ngihata walua kundi.

³⁸ Tshiakufika mu diulu bua kuenza bu mundi musue, anu bu mudi wakuntuma musue.

³⁹ Edi ndisua dia wakuntuma ne tshijimishi muntu umue wa mu bantu bakampeye, yeye udi musue mbabishe dituku dia kunshikidilu.

⁴⁰ Tatu wanyi udi musue muntu yonso udi utangila Muana, udi umuitabusha, ikale ne muoyo wa tshiendelele; ne meme nemubishe dituku dia kunshikidilu.

⁴¹ Bena Yuda bakamujiana, bualu bua yeye wakamba ne, Ndi bianyi bidia biakafuma mu diulu.

⁴² Bakakonka ne, Eu kena Yesu, muana wa Yosefe utudi bamanye tatuʼandi ne mamuʼandi, anyi? Ahu munyi mudiye wamba ne, Ndi mufume mu diulu?

⁴³ Yesu wakabandamuna ne, Kanuikadi ne tshimanu munkatshi muenu.

⁴⁴ Kakuena muntu udi mumanye mua kudivuila kundi, hikala Tatu wakuntuma kai mumukoke; ne meme nemubishe dituku dia kunshikidilu.

⁴⁵ Baprofete bakafunda ne, Nzambi neabayishe bonso. Muntu yonso wakunvua mei a Tatu, wakuayila, ulualua kundi.

⁴⁶ Kakuena muntu wakumona Tatu, anu yeye udi mufume kudi Nzambi, yeye wakumona Tatu.

⁴⁷ Bulelela, bulelela, ndi nuambila ne, Udi witabusha udi ne muoyo wa tshiendelele.

⁴⁸ Ndi bianyi bidia bia muoyo.

⁴⁹ Bankambua benu bakadia mana mu tshihela, bakafua.

⁵⁰ Ebi mbidia bitu biafuma mu diulu, bua muntu kudia biandi, kafu.

⁵¹ Ndi bianyi bidia bidi ne muoyo biakafuma mu diulu; biadia muntu bidia ebi, neikale ne muoyo tshiendelele; bulelela, bidia binafila ku muoyo wa ba ha buloba nmubidi wanyi.

⁵² Bua dî edi Bena Yuda bakelangana mpata ne, Muntu eu udi mumanye mua kutuha mubidi wandi, tudie, munyi?

⁵³ Nunku Yesu wakabambila ne, Bulelela, bulelela, ndi nuambila ne, Binuikala kanui nudia mubidi wa Muana wa muntu, binuikala kanui nunua mashi andi, kanuena ne muoyo munda muenu.

⁵⁴ Udi udia mubidi wanyi, udi unua mashi anyi, udi ne muoyo wa tshiendelele, nemubishe dituku dia kunshikidilu.

⁵⁵ Mubidi wanyi udi bidia bilelela, mashi anyi adi bia kunua bilelela.

⁵⁶ Udi udia mubidi wanyi, udi unua mashi anyi, udi wikala munda muanyi ne meme munda muandi.

⁵⁷ Bu muakantuma Tatu udi ne muoyo, ne bu mundi ne muoyo bualu bua Tatu, nunku wandia meme neikale ne muoyo bualu buanyi.

⁵⁸ Ebi mbidia biakufuma mu diulu; kabiena bu wakadia bankambua betu, bakafua; wadia bidia ebi neikale ne muoyo tshiendelele.

⁵⁹ Yeye wakamba malu â mu nsunagoga hakadiye uyisha bantu mu Kapênuma.

Yesu udi uteta bayidi bandi munda

⁶⁰ Bayidi bandi ba bungi, hakunvuabo dî edi, bakamba ne, Dî edi didi dikole, udi mumanye mua kuditabusha nganyi?

⁶¹ Hakamanya Yesu munda munda ne, Bayidi banyi badi bajiana bua dî edi, wakabakonka ne, Bualu ebu budi bunulenduisha, anyi?

⁶² Ahu binuatangila Muana wa muntu ubanda kuakadiye diambedi?

⁶³ Nyuma ngudi uha muoyo, mubidi kawena wenza bualu; mei anakunuambila adi nyuma ne muoyo.

⁶⁴ Kadi bakuabo benu kabena bitabusha. Ku tshibangidilu Yesu wakadi mumanye bakadi kabai bitabushe, wakadi mumanye wamutungila tshitungu.

⁶⁵ Wakamba ne, Bua bualu ebu nakunuambila ne, Kakuena muntu ndi mumanye mua kudivuila kundi, bikalabo kabai bamuhebu kudi Tatu.

⁶⁶ Bayidi bandi ba bungi bakahingana ku malu a diambedi bualu bua dî edi, kabakenda nʼandi kabidi.

Petelo udi witabusha Yesu

⁶⁷ Yesu wakakonka bayidi dikumi ne babidi ne, Nuenu kabidi, kanuena basue kuya, anyi?

⁶⁸ Simona Petelo wakamukudimuna ne, Mukelenge, netuye kudi nganyi? Wewe udi ne mei a muoyo wa tshiendelele.

⁶⁹ Tuakuitabusha, tudi bamanye ne, Wewe udi Wa Tshijila wa Nzambi.

⁷⁰ Yesu wakabakonka ne, Tshiakunusungula dikumi ne babidi, anyi? Kadi umue wenu udi wa diabolo.

⁷¹ Yeye wakadi wamba bua Yudasa, muana wa Simona Isakaliote, bualu bua yeye nguakadi ha kumutungila tshitungu, yeye wakadi umue wabo wa ba dikumi ne babidi.