Yowanane 4 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi uya ma Galela

¹ Hakamanya Mukelenge ne, Bafalese bakunvua ne, Yesu udi mutambe Yone kuvuisha bantu bayidi ne kubabatiza

² (kadi Yesu mene kakadi ubabatiza, bayidi bandi bakadi bababatiza),

³ yeye wakumuka mu Yudaya, wakahingana mu Galela kabidi.

Mukashi wa mu Samalea

⁴ Buakadiye nʼabu mbua kuhitshila mu Samalea.

⁵ Yeye wakalua ku musoko wa Samalea, dina diau Suka, hehi ne muaba wakadi Yakoba muhe muanʼandi Yosefe.

⁶ Dina dia mai dia Yakoba diakadihu. Luendu luakatonda Yesu, yeye wakashikama nunku kukala kua dina. Diba diakadi munda munya.

⁷ Mukashi wa mu Samalea wakalua kusuna mai. Yesu wakamuambila ne, Umpe mai a kunua.

⁸ Bayidi bandi bakadi bamane kuya mu musoko bua kusumba bia kudia.

⁹ Mukashi wa mu Samalea wakamukonka ne, Wewe Muena Yuda udi undombela meme Muena Samalea mai a kunua tshinyi? (Bualu bua Bena Yuda kabena babuelakana ne Bena Samalea.)

¹⁰ Yesu wakamuandamuna ne, Bu wewe mumanye diha dia Nzambi ne wakukulomba ne, Umpe mai a kunua, wewe wakadi kumulomba ne yeye wakadi kukuha mai a muoyo.

¹¹ Mukashi wakamuambila ne, Mukelenge, wewe kuena ne tshia kukoka nʼatshi mai, dina didi dile, wewe udi ne mai a muoyo kudi kunyi?

¹² Wewe udi mutambe tatu wetu Yakoba, anyi? Yeye wakatuha dina, wakânuaku ne bana bandi ne bimuna biandi.

¹³ Yesu wakamuandamuna ne, Wanua mai â neikale ne nyota kabidi,

¹⁴ kadi wanua mai anamuha kena wikala ne nyota kabidi tshiendelele; mai anamuha neikale munda muandi bu mushimi wa mai abanda mu muoyo wa tshiendelele.

¹⁵ Mukashi wakamuambila ne, Mukelenge, Umpe mai â, tshikadi ne nyota, tshilu tô kunoko bua kusuna.

¹⁶ Yesu wakamuambila ne, Ya ubikile mulume webe, ulue biebe kunoko.

¹⁷ Mukashi wakamuandamuna ne, Tshiena ne mulume. Yesu wakamuambila ne, Wakuamba bulelela ne, Tshiena ne mulume;

¹⁸ bualu bua wewe wakadi ne balume batanu, ûdi nʼandi katataka kena mulume webe; wewe wakuamba bulelela.

¹⁹ Mukashi wakamuambila ne, Mukelenge, ndi njingulula ne, Wewe udi muprofete.

²⁰ Bankambua betu bakadi batendelela Tatu ku mukuna eu; kadi nuenu nudi nuamba ne, Mu Yelushalema mudi muaba udi bantu ne bua kutendelelamu Tatu.

²¹ Yesu wakamuambila ne, Mukashi, witabushe dî dianyi, diba nedilue dikala bantu kabai batendelela Tatu ku mukuna eu anyi mu Yelushalema.

²² Nudi nutendelela tshinudi kanui bamanye; tuetu tudi tutendelela tshitudi bamanye; bualu bua luhandu ludi lufuma kudi Bena Yuda.

²³ Kadi diba nedilue, didiku katataka mene, ditendelela batendeledi balelela Nzambi mu nyuma ne mu bulelela; Tatu udi ukeba bantu ba nunku bamutendelela.

²⁴ Nzambi udi Nyuma; budi bamutendeledi nʼabu mbua kumutendelela mu nyuma ne mu bulelela.

²⁵ Mukashi wakamuambila ne, Ndi mumanye ne, Mashiya ulualua (udibo babikila ne, Kilisto); halueye, neatumanyishe malu onso.

²⁶ Yesu wakamuambila ne, Meme udi wakula nʼebe nyeye.

²⁷ Bayidi bandi bakalua ha diba adi mene; bakakema bualu bua yeye wakadi wakula ne mukashi; kadi muntu kakamufuka ne, Udi ukeba tshinyi? Udi wakuila nʼandi tshinyi?

²⁸ Mukashi wakashia mulondo wandi wa mai, wakaya ku musoko, wakambila bantu ne,

²⁹ Luai numone muntu wakungambila malu onso anakenzenza; nyeye Kilisto, anyi?

³⁰ Bakaluhuka mu musoko, bakadi balua kudiye.

³¹ Hakadibo benza nunku, bayidi bakamusengelela ne, Labi, diaku.

³² Kadi yeye wakabambila ne, Ndi ne bia kudia binudi kanui bamanye.

³³ Bayidi bakakonkangana ne, Bakulua ne bia kudia kudiye, anyi?

³⁴ Yesu wakabambila ne, Bidia bianyi bidi kuenza bu mudi wakuntuma musue ne kushikisha mudimu wandi.

³⁵ Kanutu nuamba ne, Hahua ngondo inai, kunowa nekulue, anyi? Ndi nuambila ne, Bandulukai, numone madimi, adi matoke katataka bua kunowabo.

³⁶ Udi unowa udi wangata difutu, udi usangisha bintu bia ku muoyo wa tshiendelele; bua mukunyi ne munowi basanke hohamue.

³⁷ Dî edi ndilelela ne, Munga udi ukuna, munga udi unowa.

³⁸ Nakunutuma bua kunowa bintu binuakadi kanui bakuatshile mudimu; bakuabo bakakuata mudimu, nuenu nuakuhingana mu mudimu wabo.

Bena Samalea ba bungi badi bitabusha Yesu

³⁹ Bena Samalea ba bungi ba mu musoko au bakamuitabusha bualu bua dî dia mukashi diakambeye ne, Yeye wakungambila malu onso anakenzela.

⁴⁰ Hakalua Bena Samalea kudiye, bakamusengelela ne, Shala nʼetu; yeye wakalalamu matuku abidi.

⁴¹ Bakuabo ba bungi kabidi bakitabusha bualu bua dî diandi;

⁴² bakambila mukashi ne, Tuakuitabusha katataka, kambualu bua dî diebe, tuakudiunvuila, tudi bamanye ne, Bulelela, eu udi Musungidi wa ba ha buloba.

⁴³ Hakahita matuku abidi, wakumukamu, wakaya mu Galela.

⁴⁴ Yesu mene wakamba ne, Muprofete kena ne butumbi mu luseke luabo.

⁴⁵ Hakalueye mu Galela nunku, Bena Galela bakamuitabusha, bua bobo bakatangila malu onso akenzeye mu Yelushalema ku disanka dia Kuhita kua Yehowa; bobo kabidi bakadi baye ku disanka.

Yesu udi ukolesha muana wa muloho wa mukelenge

⁴⁶ Yeye wakalua kabidi ku Kana wa Galela kuakakudimuneye mai nvinyo. Muloho wa mukelenge wakadi ne muanʼandi usama mu Kapênuma.

⁴⁷ Hakunvueye lumu ne, Yesu wakumuka mu Yudaya, wakulua mu Galela, wakaya kudiye, wakamutendekena ne, Uhueke, wondahe muanʼanyi; bualu bua lufu luakadi lumutonde.

⁴⁸ Yesu wakamuambila ne, Binuikala kanui numona bimanyinu ne malu a kukema, kanuena nuitabusha, nasha kakese.

⁴⁹ Muloho wa mukelenge wakamuambila ne, Mukelenge, hueka diambedi muanʼanyi kai muanze kufua.

⁵⁰ Yesu wakamuambila ne, Ya biebe, muanʼebe udi ne muoyo, Muntu au wakitabusha dî diakamuambila Yesu, wakaya biandi.

⁵¹ Hakadiye uya mu nshila, bantu bandi bakasangila nʼandi, bakamuambila ne, Muanʼebe udi ne muoyo.

⁵² Yeye wakabakonka diba diakabangeye kusangala. Bakamuambila ne, Makelela, hakadi diba ha umue, mubidi kahia wakamulekela,

⁵³ Nunku tatu wakamanya ne, Mpa diba adi mene diakungambila Yesu ne, Muanʼebe udi ne muoyo. Yeye wakitabusha ne ba mu nsubu wandi bonso.

⁵⁴ Etshi ntshimanyinu tshibidi tshiakenza Yesu hakumukeye mu Yudaya, bakalueye mu Galela.