Yowanane 18 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi ufika ku Getesemane

¹ Hakamba Yesu mei â, wakaya ne bayidi bandi dishia dia kasulu ka Kidilona diakadi muaba wa mitshi ya mamuma, wakabuelamu ne bayidi bandi.

Badi bakuata Yesu

² Yudasa kabidi, mumutungidi, wakadi mumanye muaba au; bualu bua Yesu wakadi uyaku misangu ya bungi ne bayidi bandi.

³ Nunku hakangata Yudasa tshisumbu tshia masalayi ne tuhalai tua bakuidi banene ne Bafalese, wakaluamu ne minda ne bimunyi ne bintu bia nvita.

⁴ Nunku Yesu wakamanya matu onso akadi alua kudiye, wakaya kudibo, wakabakonka ne, Nudi nukeba nganyi?

⁵ Bakamukudimuna ne, Yesu wa ku Nazaleta. Yesu wakabambila ne, Mmeme. Yudasa, mumutungidi, wakadi muimane nʼabo.

⁶ Hakabambileye ne, Mmeme, bakahingana tshianyima, bakadishinda.

⁷ Yeye wakabakonka tshiakabidi ne, Nudi nukeba nganyi? Bakamba ne, Yesu wa ku Nazaleta.

⁸ Yesu wakamba ne, Nakunuambila ne, Mmeme; binuikala nunkeba meme, lekelai aba baye;

⁹ bua kushikishabo dî diandi diakambeye ne, Bawakampa tshiakujimisha umue.

¹⁰ Simona Petelo wakadi ne muele wa nvita, wakatula, wakataha muntu wa muakuidi munene, wakamukosa ditshu dia ku tshianza tshia bukole. Muntu au dina diandi mMalako.

¹¹ Yesu wakambila Petelo ne, Hingasha muele webe mu luhaha; tshiena nua luhanza luakumpa Tatu, anyi?

Badi baya ne Yesu kudi muakuidi munene

¹² Masalayi ne kapitene ne tuhalai tua Bena Yuda bakakuata Yesu, bakamusuika,

¹³ bakaya nʼandi diambedi kudi Ana, bualu bua yeye wakadi tatuʼandi-muenu wa Kayafa, nguakadi ha mutu ha bakuidi bakuabo tshidimu atshi.

¹⁴ Kayafa nguakaha Bena Yuda lungenyi ne, Mbimpe bia muntu umue kufuila bantu.

Petelo adi uhidia Yesu

¹⁵ Simona Petelo wakalonda Yesu, ne muyidi mukuabo. Muyidi au wakamanyibua kudi muakuidi munene, wakabuela ne Yesu mu nsubu wa muakuidi;

¹⁶ kadi Petelo wakadi muimane ku tshibi ku bula. Muyidi wakadi mumanyibue kudi muakuidi munene wakaluhuka, wakakula ne mukashi wakadi ulama ku tshibi, wakabuela ne Petelo.

¹⁷ Mukashi muenji wa mudimu wakadi ulama ku tshibi, wakakonka Petelo ne, Wewe kabidi udi mukuabo wa bayidi ba muntu eu, nasha? Yeye wakamba ne, Tshiena wabo.

¹⁸ Bena mudimu ne tuhalai bakadi bimaneku, bamane kutemesha kahia ka makala, bualu bua mashika; bakadi bota, kahia; Petelo kabidi wakadi nʼabo, muimane wota kahia.

Muakuidi mimene udi ukonka Yesu bualu buandi

¹⁹ Muakuidi mimene wakakonka Yesu bua bayidi bandi ne bua diyisha diandi.

²⁰ Yesu wakamukudimuna ne, Nakujukuila bantu dî dianyi hatoke; matuku onso nakadi uyisha mu nsunagoga ne mu ntempelo, muakadi Bena Yuda bonso bunguile; tshiakamba bualu bumue mu busokoko.

²¹ Udi unkonkela meme tshinyi? Ukonke bakunva mei anyi bua malu anakabambila; monai, aba badi bamanye malu anakamba.

²² Hakambeye dî edi, kahalai kakuabo kakadi kimane nʼandi ha buihi kakamukuma, kakamba ne, Wakukudimuina muakuidi wa Nzambi dî nunku tshinyi?

²³ Yesu wakamuambila ne, Bingikala muambe bualu bubi, ubilambe; bingikala muambe bimpe, udi unkumina tshinyi?

²⁴ Ana wakamutuma musuika kudi Kayafa, muakuidi munene.

²⁵ Simona Petelo wakadi muimane wota kahia. Bakamukonka ne, Wewe kabidi udi mukuabo wa bayidi bandi, nasha? Yeye wakavila, wakamba ne, Tshiena wabo.

²⁶ Mukuabo wa bantu ba muakuidi munene, muanʼabo ne wakakosabo ditshu kudi Petelo, wakamukonka ne, Tshiakukutangila nʼandi mu muaba wa mitshi ya mamuma, anyi?

²⁷ Petelo wakayila kabidi. Tshitala tshiakasama.

Badi baya ne Yesu kudi Pilato

²⁸ Bakumuka ne Yesu kua Kayafa, bakaya nʼandi mu nsubu munene wa mukelenge; hakadi hatshiatshia; kadi bobo bine kabakabuela mu nsubu munene bua kabakasua kubiha, nunku kabakadi kumanya mua kudia Kuhita kua Yehowa.

²⁹ Pilato wakaya kudibo, wakabakonka ne, Nudi mibanda muntu eu ne bualu kai?

³⁰ Bakamukudimuna ne, Bu muntu eu kai muenze bualu bubi, katuakadi kumufila mu bianza biebe.

³¹ Pilato wakabambila ne, Nuenu numuangate, nulumbulule tshilumbu tshiandi bu mudi mukenshi wenu. Bena Yuda bakamuambila ne, Katuena ne bukokeshi bua kushiha muntu.

³² Nunku bakashikisha dî dia Yesu diakambeye hakadiye wamba bualu bua lufu luafueye nʼalu.

³³ Pilato wakabuela mu nsubu munene wa mukelenge kabidi, wakabikila Yesu, wakamukonka ne, Wewe udi Mukelenge wa Bena Yuda, anyi?

³⁴ Yesu wakamukonka ne, Wewe udi udikonkela dî edi, anyi bakuabo bakungamba kûdi?

³⁵ Pilato wakamukudimuna ne, Meme ndi Muena Yuda, anyi? Bantu ba tshisamba tshienu ne bakuidi banene bakukufila mu bianza bianyi, wakuenza tshinyi?

³⁶ Yesu wakamukudimuna ne, Bukelenge buanyi kabuena bua ha buloba ebu; bu bukelenge buanyi buikale bua ha buloba ebu, bantu banyi bakadi kuluangana, tshifidibu mu bianza bia Bena Yuda; kadi katataka bukelenge buanyi kabuena bua kunoko.

³⁷ Pilato wakamukonka ne, Ahu wewe mukelenge, anyi? Yesu wakamba ne, Bûdi Wamba mbulelela, ndi Mukelenge. Nakuledibua bua bualu ebu, nakuluila ha buloba bualu ebu, ne bua kuamba malu malelela. Muntu yonso wa bulelela udi unvua dî dianyi.

³⁸ Pilato wakamukonka ne, Bulelela ntshinyi? Hakamukonkeye dî edi, wakaluhuka, wakaya kudi Bena Yuda, wakabambila ne, Tshiena mumusangane ne bualu.

Yesu anyi Balaba

³⁹ Nudi ne tshilele tshienu tshia meme kunulekelela muntu umue ha Kuhita kua Yehowa; nudi basue nnulekelele Mukelenge wa Bena Yuda, anyi?

⁴⁰ Kadi bobo bakela mbila kabidi ne, Muntu eu nasha, anu Balaba. Balaba wakadi munyengi wa bintu.