Yowanane 12 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi udia bidia ne balunda bandi mu Betania

¹ Yesu wakalua ku Betania, kuakadi Lazalo wakabisheye ku lufu; wakalalaku matuku asambombo diambedi Kuhita kua Yehowa kakui kuanze kulua.

² Bakamulambishila bidia bia butuku; Mata wakadi ubakuatshisha, kadi Lazalo wakadi mukuabo wa bakadi bashikame nʼandi ku mesa.

³ Malia wakangata tshituha tshia kilogama tshia mananashi a mushinga mutambe bukole, menza ne nâdo mulelela, wakamuela mananashi ku makasa a Yesu, wakâkuhula ne nsuki yandi, nsubu wakadi mule tente ne muhuya wa mananashi.

⁴ Kadi muyidi wandi mukuabo, Yudasa Isakaliote, wakadi ha kumutungila tshitungu, wakakonka ne,

⁵ Munyi kabakahana mananashi â ku ndenalio nkama isatu, bua kuha bantu bahele?

⁶ Yeye kakamba dî edi bua wakadi ne bahele luse, anu bua wakadi muibi; bualu bua yeye wakadi ne tshibutshilu, wakadi udiangatshila biakadi bitekamu.

⁷ Yesu wakamba ne, Mulekelai, nuitabushe ne, Yeye wakadi mualame tô ne dianjikabo.

⁸ Nudi ne bahele matuku onso munkatshi muenu, kadi kanuena nʼanyi meme matuku onso.

⁹ Bantu ba bungi ba Bena Yuda bakunvua lumu ne, Yeye udi eku; kabakaluila bua Yesu nkayandi, bakaluila kabidi bua kutangila Lazalo wakabisheye ku lufu.

¹⁰ Kadi bakuidi banene bakasangisha dî diabo bua kushiha Lazalo kabidi,

¹¹ bua Bena Yuda ba bungi bakadi bumuka bitabushila Yesu bua bualu buandi.

Yesu udi ubuela mu Yelushalema ne butumbi

¹² Hakatshiabu, bantu ba bungi bakadi balue ku disanka, hakunvuabo ne, Yesu ulualua ku Yelushalema,

¹³ bakangata malala a mabue, bakaluhuka bua kusangila nʼandi, bakela mbila ne, Hosana; udi ulua mu dina dia Mukelenge, Mukelenge wa Isalele mene, udi ne disanka.

¹⁴ Hakasangana Yesu muana wa mpunda, wakashikama ha nyima handi, bu muakafundabo ne,

¹⁵ Muana mukashi wa Siona, kutshinyi; mona, Mukelenge webe ulualua mushikame ha nyima ha muana wa mpunda.

¹⁶ Diambedi bayidi bandi kabakamanya malu â; kadi hakatumbishibua Yesu, bakavuluka malu akamufundabo ne akamuenzelabo.

¹⁷ Bantu tshisumbu tshinene bakadi nʼandi hakabikileye Lazalo mu lukita ne hakamubisheye ku lufu, bakadi bamanyishangana bualu ebu.

¹⁸ Bantu bakaya kusangila nʼandi, bua bakunvua bualu bua tshimanyinu etshi tshiakenzeye.

¹⁹ Bafalese bakambilangana ne, Nudi numona ne kanuena nuheta bualu; monai, ba ha buloba bonso badi bamulonda.

Bena Gelika badi basue kutangila Yesu

²⁰ Bena Gelika bakuabo bakadi munkatshi mua bakaya kutendelela Nzambi ku disanka.

²¹ Bobo bakahia kudi Filipo, muena Bete-saîda wa Galela, bakamuambila ne, Mukelenge, tudi basue kutangila Yesu.

²² Filipo wakaya, wakambila Andele; Andele ne Filipo bakaya, bakambila Yesu.

²³ Yesu wakabambila ne, Diba diakufika bua Muana wa muntu kutumbishibua.

²⁴ Bulelela, bulelela, ndi nuambila ne, Bikala lutete lua blé kalui luhone mu buloba, kalui lufue, nelushale nkayalu; kadi biafualu, nelukuamishe maminu makuabo a bungi.

²⁵ Wasua muoyo wandi neaujimishe; wikala ne muoyo wandi udiye nʼau ha buloba lukuna neaulame tô ne ku muoyo wa tshiendelele.

²⁶ Biangenzela muntu mudimu, andonde; muena mudimi wanyi neikale kundi ngikala; biangenzela muntu mudimu, Tatu neamutumbishe.

²⁷ Katataka mutshima wanyi udi utata, nengambe tshinyi? Tatu, unsungile mu dikenga dia diba edi. Kadi nakuluila ku diba edi bua bualu ebu.

²⁸ Tatu, utumbishe dina diebe. Di diakafuma mu diulu ne, Nakaditumbisha, nenditumbishe kabidi.

²⁹ Bantu bakadi bimane ha buihi bakunvua di edi, bakamba ne, Mukungulu wa nvula; bakuabo bakamba ne, Muanjelo wakuakula nʼandi.

³⁰ Yesu wakandamuna ne, Dî edi kadiakuluila bua bualu buanyi, diakuluila bua bualu buenu.

³¹ Katataka dihila dia buloba ebu didiku; nebihate mukokeshi wa buloba ebu.

³² Ne meme, biambishabo ha buloba, nenkoke bantu bonso kundi.

³³ Yeye wakamba nunku bua kubamanyisha bua lufu luafueye nʼalu.

³⁴ Bantu bakamukonka ne, Tuakunvua mu mikenshi ya Nzambi ne, Kilisto udi wikala tshiendelele; ahu munyi mûdi wamba ne, Budi nʼabu Muana wa muntu mbua kubishibua? Eu Muana wa muntu nganyi?

³⁵ Yesu wakabambila ne, Nenuikale ne munya munkatshi muenu anu tshituha tshihi. Endakanai hanutshidi ne munya, butuku kabunuididi; wendakana mu mîdima kena mumanye kudiye uya.

³⁶ Hanutshidi ne munya, nuitabushe munya, nunku nenuikale bana ba munya. Yesu wakamba malu â, wakumukaku, wakabasokoma.

³⁷ Yeye wakenza bimanyinu bia bungi ku mesu kuabo, kadi kabakamuitabusha;

³⁸ bua dî diakamba muprofete Yeshaya dishike ne, Mukelenge, wakitabusha dî dietu nganyi? Diboko dia Mukelenge diakamueneka kudi nganyi?

³⁹ Bua bualu ebu kabakamanya mua kuitabusha, bua Yeshaya wakamba kabidi ne,

⁴⁰ Yeye wakafofomesha mesu abo, wakakolesha mitshima yabo; Nunku mesu abo kâmonyi, kabamanyi mu mitshima yabo, Kabakudimunyi mitshima yabo Bua meme kubondaha.

⁴¹ Yeshaya wakamba malu â, bualu bua yeye wakatangila butumbi buandi; yeye wakamuamba nunku,

⁴² Kadi ba munkatshi mua bakokeshi mene ba bungi bakamuitabusha; kadi bualu bua Bafalese kabakajukula muanda eu, batshina ne, Nebatumbile mu nsunagoga.

⁴³ Kusua kuabo kua butumbi bua bantu kuakatamba kusua kuabo kua butumbi bua Nzambi.

⁴⁴ Yesu wakela dî diandi bikole ne, Udi ungitabusha meme kena ungitabusha meme nkayanyi, udi witabusha ne wakuntuma kabidi.

⁴⁵ Udi untangila meme udi utangila ne wakuntuma kabidi.

⁴⁶ Nakulua ha buloba bu munya, bua yonso wangitabusha kashadi biandi mu midima.

⁴⁷ Biunvua muntu mei anyi, biahidieye kuênza, meme tshiena mulumbuluisha; bualu bua tshiakuluila bua kulumbuluisha ba ha buloba, nakuluila bua kubasungila.

⁴⁸ Wampidia meme ne wahidia mei anyi udi ne mumulumbuluishi; dî diakamba nedimulumbuluishe dituku dia kunshikidilu.

⁴⁹ Tshiena ndiambila nkayanyi; Tatu wakantuma wakampa mukenshi wa malu anamba ne bu munâmba.

⁵⁰ Ndi mumanye ne, Mukenshi wandi udi muoyo wa tshiendelele; nunku malu andi ngamba ndi ngamba bu mudi Tatu ungambila.