Yoshua 9 - Mukanda wa Nzambi Dihungila Dikulukulu ne Dihungila Dihia-dihia 2003

Budimu bua Bena Gibeona

¹ Kakunyua bakelenge bonso ba dia munemu dia Yadene, ku mikuna ne mu bibanda ne kukala kua mai manene ku mpala kua Lebanona, Bena Hiti ne Bena Amole ne Bena Kanâna ne Bena Pelizi ne Bena Hiwi ne Bena Yebuse, lumu elu;

² Buonso buabo bakahunga dî diabo, bakadisangisha bua kutuisha Yoshua ne Bena Isalele.

³ Kakunyua Bena Gibeona muakenzela Yoshua Yeleko ne Ai,

⁴ hobo bakenza budimu, bakadisangisha bu miloho yakalua kule, bakateka bibombi bikulakasha ha nyima ha mpunda yabo, ne milondo ya nvinyo ya biseba bihandike ne bilamakasha,

⁵ ne bisabata bilamakasha ku makasa abo, ne bilulu bisunsuke hamʼbidi habo, ne mampa abo onso akûma, akakuata butu.

⁶ Bakaya kudi Yoshua mu tshitudilu ku Gilegala, bakamuambila ne Bena Isalele bonso ne, Tuetu tuakufuma kule ku buloba bukuabo, nunku nuhunge nʼetu tshihungidi.

⁷ Bena Isalele bakambila Bena Hiwi ne, Bumue nuenu nudi ba munkatshi muetu, nunku netuhunge nʼenu tshihungidi munyi?

⁸ Bobo bakambila Yoshua ne, Tuetu tudi bahika bebe. Yoshua wakabakonka ne, Nudi banganyi? Nuakufuma kudi kunyi?

⁹ Bakamuambila ne, Bahika bebe bakalua kule ku buloba bukuabo bualu bua dina dia Yehowa, Nzambi webe; bualu bua tuetu tuakunvua lumu luandi ne malu onso akenzeye mu Ejipitu,

¹⁰ ne malu akenzeleye bakelenge babidi ba Bena Amole bakadi dishiya dia Yadene, Sihona, mukelenge wa Heshebona, ne Oga, mukelenge wa Bashana, wakadi mu Ashatelota.

¹¹ Bakulu betu ne bena kuetu bonso bakatuambila ne, Angata! bintu bia kudia mu nshila mu bianza bienu, yai bienu kusangakana nʼabo, nubambile ne, Tuetu tudi bahika benu, nuhunge nʼetu tshihungidi.

¹² Mampa â akadi ne kahia hatuakângata mu nsubu yetu dituku dituakabanga luendu bua kulua kunudi, kadi monai, adi mûme, adi makuate butu;

¹³ ne milondo ei ya nvinyo ituakûsha tente yakadi mihia-mihia, kadi monai, yakahandika; ne bilulu ebi ne bisabata bietu biakakulakasha bualu bua luendu bakatamba bule.

¹⁴ Bantu bakangata bintu biabo, kabakakonka lungenyi kudi Yehowa.

¹⁵ Yoshua wakabaha budishikaminyi, wakahunga nʼabo tshihungidi, bua bobo bikale ne muoyo; bakelenge ba mu Isalele bakaditshiha kudibo.

¹⁶ Hakahita matuku asatu ku nyima bamane kuhunga nʼabo tshihungidi, bakunvua lumu ne bobo bakadi nʼabo mutumba, bakashikama munkatshi muabo.

¹⁷ Bena Isalele bakabisha luendu luabo, bakalua ku misoko yabo dituku disatu. Mena a misoko yabo akadi Gibeona ne Kefila ne Bêlota ne Kîyata-yalima.

¹⁸ Bena Isalele kabakabashiha, bualu bua bakelenge babo bakamana kuditshiha kudibo mu dina dia Yehowa, Nzambi wa Isalele. Kadi bantu bonso bakatontolola bakelenge babo.

¹⁹ Kadi bakelenge bonso bakabambila ne, Tuakamana kuditshiha kudibo mu dina dia Yehowa, Nzambi wa Isalele, ne katataka katuena bamanye mua kubalenga tshianza.

²⁰ Ebu mbualu butudi mua kubenzela bua bobo bashale ne muoyo: tshiji katshitukuatshi bualu bua mutshihu utuakuditshiha nʼau.

²¹ Bakelenge bakabambila kabidi ne, Bobo bikale ne muoyo. Nunku bakalua bahandi ba nkunyi ne basunyi ba mai kudi Bena Isalele bonso, bu muakabambila bakelenge babo.

²² Yoshua wakababikila, wakabambila ne, Bualu kai nuakatudinga ne, Tudi ba kule, nuenu bikale anu munkatshi muetu?

²³ Nunku nudi ne mulau, kakuena umue wenu wahanga kuikala muhika: buonso buenu nenuikale bahandi ba nkunyi ne basunyi ba mai ba mu nsubu wa Nzambi wanyi.

²⁴ Bobo bakakudimuna Yoshua dî ne, Bualu bua bakambila bantu bebe bu muakadi Yehowa, Nzambi wenu, muambile muntu wandi Mose bua kunuha buloba buonso, ne bua kushiha bena buloba bonso ku mpala kuenu; nunku tuakatshina bikole bua bualu buenu, ne tuakenza bualu ebu.

²⁵ Katataka, tudi mu tshianza tshiebe, utuenzele budi buimpe ku mesu kuebe.

²⁶ Wakabenzela nunku, wakabasungila mu tshianza tshia Bena Isalele, bua bobo kababashihi.

²⁷ Yoshua wakabayuisha dituku adi bu bahandi ba nkunyi ne basunyi ba mai ba Bena Isalele ne ba tshioshelu tshia Yehowa mu muaba wakadiye musungule tô ne ku dituku edi.