Yoshua 6 - Mukanda wa Nzambi Dihungila Dikulukulu ne Dihungila Dihia-dihia 2003

Dibutuka dia Yeleko

¹ Bakinshila bibi bionso bia Yeleko, bakabikanga, bualu bua Bena Isalele; muntu kakahatuka, muntu kakabuelamu.

² Yehowa wakambila Yoshua ne, Mona, nakulala Yeleko ne mukelenge wa musoko ne bena nvita bonso ba dikima mu tshianza tshiebe.

³ Nuenu bena nvita bonso nenunyunguluke musoko musangu umue. Nenuenze nunku tô matuku asambombo.

⁴ Bakuidi muanda mutekete nebaye ne mpungi muanda mutekete ya nsengu ya bimpanga ku mpala kua mushete wa tshihungidi; dituku dia muanda mutekete nenunyunguluke musoko misangu muanda mutekete, ne bakuidi nebele mpungi.

⁵ Nunku helabo mpungi bikole, hanunvua muadi wa mpungi, bantu bonso nebele mbila; ne lumbu lua musoko neludishimbukile hanshi mu muaba walu, ne muntu yonso neabuele mu muaba udi buludiludi nʼandi.

⁶ Yoshua, muana wa Nuna, wakabikila bakuidi, wakabambila ne, Ambulai mushete wa tshihungidi tshia mei; bakuidi muanda mutekete baye ne mpungi muanda mutekete ya nsengu ya bimpanga ku mpala kua mushete wa tshihungidi wa Yehowa.

⁷ Bakambila bantu ne, Hitai, nunyunguluke musoko, bena nvita baye ku mpala kua mushete wa Yehowa.

⁸ Hakambila Yoshua bantu nunku, bakuidi muanda mutekete bakadi baya ne mpungi muanda mutekete ya nsengu ya bimpanga ku mpala kua Yehowa, bakahita, bakela mpungi; mushete wa tshihungidi tshia mei a Yehowa wakabanda ku nyima.

⁹ Bena nvita bakaya ku mpala kua bakuidi bakadi bela mpungi, bantu bakuabo bakalonda mushete, bakuidi bakadi benda bela mpungi.

¹⁰ Yoshua wakambila bantu ne, Kanuedi mbila, dî dienu kadiunvuiki, di dimue kadiluhuki mukana muenu tô ne halua dituku dinanuambila ne, Elai mbila; hananuambila nunku, nuele mbila.

¹¹ Nunku yeye wakanyunguluisha mushete wa Yehowa musoko musangu umue; bantu bakalua kabidi ku tshitudilu, bakalalaku.

¹² Yoshua wakabika ne dinda dionso, ne bakuidi bakambula mushete wa tshihungidi wa Yehowa.

¹³ Bakuidi muanda mutekete bakadi ne mpungi muanda mutekete ya nsengu ya bimpanga bakaya ku mpala kua mushete wa tshihungidi wa Yehowa, bakela mpungi; bena nvita bakaya ku mpala kuabo; bantu bakuabo bakadiunguisha ku nyima kua mushete wa Yehowa, bakuidi bakadi benda bela mpungi.

¹⁴ Dituku dibidi bakanyunguluka musoko musangu umue, bakahingana ku tshitudilu; bakenza nunku matuku asambombo.

¹⁵ Hakalua dituku dia muanda mutekete, bakabika ne dinda hakatshia butuku, bakanyunguluka musoko misangu muanda mutekete bu muakenzabo diambedi, kadi dituku adi bakanyunguluka musoko misangu muanda mutekete.

¹⁶ Hakanyungulukabo musangu wa muanda mutekete, ne hakela bakuidi mpungi, Yoshua wakambila bantu ne, Elai mbila, bualu bua Yehowa wakunuha musoko.

¹⁷ Musoko eu ne bintu bionso bidimu bikale bia tshijila kudi Yehowa. Anu Lahaba, mukashi wa tshiendenda, ikale ne muoyo ne bantu bonso badi nʼandi mu nsubu muandi, bualu bua yeye wakasokoka batentekedi batuakatuma.

¹⁸ Nuenu nuhidie tshintu tshia tshijila; kanuangatshi tshintu tshinuakajila; binuatshiangata, nenueleshe tshitudilu tshia Bena Isalele mulau, nenutshikengeshe.

¹⁹ Kadi tshiamu tshionso tshia argent ne tshia or, ne malonga a tshiamu tshia mitaku ne tshiamu tshifike bidi bajidila kudi Yehowa; bintu ebi bionso nebikale mu tshibutshilu tshia Yehowa.

²⁰ Nunku bantu bakela mbila, ne bakuidi bakela mpungi; hakunvua bantu muadi wa mpungi, bakela mbila bikole, ne lumbu luakadishimbukila, ne bantu bakabuela mu musoko, muntu yonso wakabuelamu anu mu buludiludi nʼandi, bakanyenga musoko.

²¹ Bakashiha bionso biakadi mu musoko ku miele yabo, balume ne bakashi, bana ne bakulumpe, ngombe ne mikoko ne mpunda.

²² Yoshua wakambila balume babidi bakaya kutentekela buloba ne, Yai bienu mu nsubu wa mukashi au muena tshiendenda, nulue ne mukashi ne bintu bionso bidiye nʼabi, bu munu akadi tshiha kudiye.

²³ Batentekedi aba bakayamu, bakalua ne Lahaba ne tatu wandi ne mamu wandi ne bana babo ne bintu bionso biakadiye nʼabi; bakalua ne bena diku diandi bonso kabidi, bakabateka ku butshika bua tshitudilu tshia Bena Isalele.

²⁴ Bakosha musoko ne bintu bionso biakadimu ne kahia; anu tshiamu tshia argent ne tshia or, ne malonga a tshiamu tshia mitaku ne tshia tshiamu tshifike, bakahueka mu tshibutshilu tshia mu nsubu wa Yehowa.

²⁵ Kadi Yoshua wakasungila Lahaba, mukashi muena tshiendenda, ne bantu bonso ba mu nsubu wa tatu wandi ne bintu bionso biakadiye nʼabi; yeye wakashikama munkatshi mua Bena Isalele tô ne ku dituku edi, bualu bua yeye wakasokoka batentekedi bakatuma Yoshua bua kutentekela Yeleko.

²⁶ Yoshua wakadimusha bantu dituku adi, wakabambila ne, Muntu yonso udi ubika bua kuasa musoko eu wa Yeleko kabidi neikale ne mulau ku mpala kua Yehowa; habangeye kuasa musoko neajimishe muanʼa bute wandi ne hajadikeye bibi bia musoko neajimishe muanʼa mukala wandi.

²⁷ Nunku Yehowa wakadi ne Yoshua; ne lumu luandi luakatangadika buloba buonso.