Yoshua 4 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bajadika Mabue a Tshivulukidi

¹ Hakasabuka bantu bonso Yadene, Yehowa wakambila Yoshua ne,

² Usungule bantu dikumi ne babidi munkatshi mua bantu, muntu umue wa mu tshisamba ne tshisamba,

³ ubambile ne, Nuangate mabue dikumi ne abidi munkatshi mua Yadene mu muaba wakadiata makasa a bakuidi, nuatuale, nuâele hanshi mu muaba unudi nulala butuku ebu.

⁴ Hashishe, Yoshua wakabikila bantu dikumi ne babidi bakasunguleye munkatshi mua Bena Isalele, muntu wa mu tshisamba ne tshisamba;

⁵ Yoshua wakabambila ne, Hitai ku mpala kua mushete wa Yehowa, Nzambi wenu, munkatshi mua Yadene, muntu ne muntu ambule dibue, aditeke ha diaha diandi, bu bungi bua bisamba bia Bena Isalele;

⁶ nunku mabue au neikale munkatshi muenu bu tshivulukidi, ne hanukonka bana benu mu tshikondo tshialua ne, Mabue â ntshinyi?

⁷ nenubambile ne, Bualu bua mai a Yadene akahanduluka ku mpala kua mushete wa tshihungidi tshia mei a Yehowa; hakasabuka mushete Yadene, mai a Yadene akahanduluka; ne mabue au neikale bu tshivulukidi kudi Bena Isalele tshiendelele.

⁸ Bena Isalele bakenza bu muakamba Yoshua, bakambula mabue dikumi ne abidi munkatshi mua Yadene, bu bungi bua bisamba bia Bena Isalele, bu muakambila Yehowa Yoshua; bakâtuala ku muaba wakadibo balala, bakâelaku hanshi.

⁹ Yoshua wakajadika mabue au dikumi ne abidi munkatshi mua Yadene mu muaba wakadiata makasa a bakuidi bakatuala mushete wa tshihungidi tshia mei: adiku tô ne ku lelu.

¹⁰ Bakuidi bakadi batuala mushete bakimana munkatshi mua Yadene, tô ne hakashika malu onso akambila Yehowa Yoshua bua kuambileye bantu, malu onso akambila Mose Yoshua; ne bantu bakasabuka lubilu.

¹¹ Hakasabuka bantu bonso, ku nyima bakuidi bakasabuka ne mushete wa Yehowa ku mesu kua bantu.

¹² Bena Lubena ne Bena Gada ne tshituha tshia tshisamba tshia Bena Manashe bakasabuka bavuale bintu biabo bia nvita ku mpala kua Bena Isalele, bu muakabambila Mose;

¹³ bantu bu binunu makumi anai bakadi ne bintu biabo bia nvita bilongolola bakasabuka ku mpala kua Yehowa, bua kuluangana ku mpata ya Yeleko.

¹⁴ Dituku adi Yehowa wakabandisha Yoshua ku mesu kua Bena Isalele bonso; bobo bakamutshina bu muakatshinabo Mose matuku onso a muoyo wandi.

¹⁵ Yehowa wakambila Yoshua ne,

¹⁶ Wambile bakuidi badi batuala mushete wa tshihungidi ne, Umukai mu Yadene.

¹⁷ Yoshua wakambila bakuidi ne, Umukai mu Yadene.

¹⁸ Hakumuka bakuidi bakadi batuala mushete wa tshihungidi tshia mei a Yehowa, hakadiatabo makasa abo ha buloba bume, hashishe mai a Yadene akahingana mu muaba wau, aka tua ku muelelu bu diambedi.

¹⁹ Bantu bakumuka ku Yadene mu matuku dikumi a ngondo wa kunfudilu, bakasa tshitudilu mu Gilegala ku esete kua Yeleko.

²⁰ Mabue au dikumi ne abidi akangatabo mu Yadene, Yoshua wakâjadika mu Gilegala.

²¹ Yeye wakambila Bena Isalele ne, Biakonka bana benu batatuʼabo mu matuku atshidi ku mpala ne, Mabue â ntshinyi?

²² nenumanyishe bana benu ne, Bena Isalele bakasabuka Yadene eu ha lusenga lume.

²³ Bualu bua Yehowa, Nzambi wenu, wakûmisha mai a Yadene ku mpala kuenu, tô ne hanuakasabuka bonso, bu muakenza Yehowa, Nzambi wenu, ku Dishiba Dikunze diakumisheye ku mpala kuetu, tô ne hatuakasabuka buonso buetu;

²⁴ bua bantu bonso ba ha buloba bamanye ne, Tshianza tshia Yehowa tshidi tshikole; ne bua nuenu nutshine Yehowa, Nzambi wenu, tshiendelele.