Yoshua 24 - Mukanda wa Nzambi Dihungila Dikulukulu ne Dihungila Dihia-dihia 2003

Dî dia Kunshikidilu dia Yoshua

¹ Yoshua wakasangisha bisamba bionso bia Bena Isalele ku Shekeme, wakabikila bakulu ba Bena Isalele ne bakadi ku mutu kua bisamba ne balumbuluishi babo ne tuhita tuabo; bakadisangisha ku mpala kua Nzambi.

² Yoshua wakambila bantu bonso ne, Yehowa, Nzambi wa Isalele, udi Wamba ne, Kale bankambua benu bu Tela, tatu wa Abalahama ne wa Nahô, bakadi bashikama dishiya dia musulu wa Pelata, bakadi batendelela nzambi mikuabo.

³ Nakangata nkambua wenu Abalahama dishiya dia musulu wa Pelata, nakamuendesha mu buloba buonso bua Kanâna, nakavudisha bana bandi, nakamufila Isaka.

⁴ Nakaha Isaka Yakoba ne Esau; nakaha Esau mukuna wa Sei bu buhianyi buandi; Yakoba ne tunkanunuma tuandi bakahueka mu Ejipitu.

⁵ Nakatuma Mose ne Alona, nakakengesha Bena Ejipitu ne malu onso anakenza munkatshi muabo; hashishe nakanuluhula.

⁶ Nakaluhula bankambua benu mu Ejipitu, bakatua kukala kua mai manene; Bena Ejipitu bakalonda bankambua benu ne makalu ne tubalu tô ne ku Dishiba Dikunze.

⁷ Hakadilabo kudi Yehowa, yeye wakateka midima hankatshi habo ne Bena Ejipitu; wakatuma mai manene ha mutu habo, wakababuikila; mesu enu akatangila malu anakenza mu Ejipitu; nuakashikama mu tshihela matuku a bungi.

⁸ Nakalua nʼenu mu buloba bua Bena Amole bakadi bashikama dishiya dia Yadene; bobo bakaluangana nʼenu, nakabafila mu bianza bienu, nuakanyenga buloba buabo; nakababutula ku mpala kuenu.

⁹ Balaka, muana mulume wa Sipô, mukelenge wa Moaba, wakabika, wakaluangana ne Bena Isalele; wakatuma bantu, bakabikila Belâma, muana mulume wa Beô, bua kunueleye mulau;

¹⁰ kadi meme nakahidia kumufila Belâma; nunku yeye wakanuvudishila disanka; nakanusungila mu tshianza tshiandi.

¹¹ Nuakasabuka Yadene, nuakalua ku Yeleko; Bena Yeleko bakaluangana nʼenu ne Bena Amole ne Bena Pelizi ne Bena Kanâna ne Bena Hiti ne Bena Gîgashi ne Bena Hiwi ne Bena Yebuse; nakabafila mu bianza bienu.

¹² Nakatuma matembue ku mpala kuenu, akabihata ku mpala kuenu, bakelenge babidi ba Amole mene; ka nku muele webe wa nvita, anyi ku buta buebe.

¹³ Nakanuha buloba bunudi kanuyi badima, ne bimenga bia kushikamamu binuakadi kanuyi base, ne nuenu nuakashikamamu; nuakadia tumuma tua nvinyo ne tua olive tunuakadi kanuyi bakune.

¹⁴ Nunku nutshine Yehowa, numukuatshile mudimu ne muoyo wonso udi kauyi ne lubombo, nûmushe nzambi yakakuatshila bankambua bena mudimu dishiya dia musulu wa Pelata ne mu Ejipitu; nukuatshile Yehowa mudimu.

¹⁵ Binuamona ne kukuatshila Yehowa mudimu kudi kubi, lelu nusungule unudi basue kukuatshila mudimu, ne nzambi yakadi bankambua benu bakuatshile mudimu dishiya dia musulu wa Pelata anyi nzambi ya Bena Amole, bena buloba bunudi bashikame; kadi meme ne ba mu nsubu muanyi netukuatshile Yehowa mudimu.

¹⁶ Bantu bakamukudimuna dî ne, Yehowa atukande bua katumulekedi bua kukuatshila nzambi mikuabo mudimu;

¹⁷ Yehowa, Nzambi wetu, wakatuluhula ne batatu betu mu buloba bua Ejipitu ne mu nsubu wa buluka, wakenza malu a kukema ku mesu kuetu, wakatulama bimpe mu nshila yonso utuakenda ne munkatshi mua bantu bonso butuakahita mu nshila.

¹⁸ Yehowa wakatuihatshila bantu bonso ku mpala kuetu, Bena Amole mene bakadi bashikama mu buloba; netukuatshile Yehowa mudimu kabidi, bualu bua yeye udi Nzambi wetu.

¹⁹ Yoshua wakambila bantu ne, Nuenu kanuena mua kukuatshila Yehowa mudimu, bualu bua yeye udi Nzambi wa tshijila, udi Nzambi wa mukau, yeye kena unujimishila mahanga enu anyi mibi yenu.

²⁰ Binualekela Yehowa, binuakuatshi la nzambi ya bende mudimu, hashishe yeye neakudimuke, neanukengeshe, neanubutule, yeye mumane kunuenzela bimpe.

²¹ Bantu bakambila Yoshua ne, Nansha, netukuatshile Yehowa mudimu.

²² Yoshua wakambila bantu ne, Nuenu nudi bamanyi ba bualu buenu bunuakadiambila ne, Tuakusungula Yehowa, bua kumukuatshia mudimu. Bobo bakamba ne, Tudi bamanyi ba bualu ebu.

²³ Wakabambila ne, Numushe nzambi ya bende idi munkatshi muenu, nuteke mitshima yenu kudi Yehowa, Nzambi wa Isalele.

²⁴ Bantu bakambila Yoshua ne, Netukuatshile Yehowa, Nzambi wetu, mudimu, netutumikile dî diandi.

²⁵ Yoshua wakahunga dî ne bantu dituku adi, wakabajadikila mukenji ne dî dijadika mu Shekeme.

²⁶ Yoshua wakafunda mei â mu mukanda wa mikenji ya Nzambi; wakangata dibue dinene, wakadimanyika muinshi mua mutshi wa telebinta wakadi hehi ne tshitendelelu tshia Nzambi.

²⁷ Yoshua wakambila bantu bonso ne, Monai, dibue edi nedikale bu mumanyi wa bualu kutudi, bualu bua diakunvua mei onso a Yehowa akatuambileye; diodi nedikale bu mumanyi wa bualu kunudi, bua kanubidi Nzambi wenu.

²⁸ Yoshua wakamuangalasha bantu, mu ntu ku buhianyi buandi mundi ku buhianyi buandi.

Lufu lua Yoshua

²⁹ Ku nyima kua malu â Yoshua, muana wa Nuna, muntu wa Yehowa, wakafua, wakadi ne bidimu lukama ne dikumi.

³⁰ Bakamujika ku mukalu wa buhianyi buandi mu Timenata-sela wa mu mikuna ya Efelayima, ku nôde kua mukuna wa Gâsha.

³¹ Nunku Bena Isalele bakakuatshila Yehowa mudimu matuku onso a Yoshua, ne matuku onso a bakulu bakashala ne muoyo hakafua Yoshua ne bakadi bamanye malu onso akenzela Yehowa Bena Isalele.

Badi Bajika Mifuba ya Yosefe ku Shekeme

³² Bakajika mifuba ya Yosefe, yakalua nʼai Bena Isalele ku Ejipitu, mu Shekeme mu tshituha tshia buloba tshiakasumba Yakoba kudi bana ba Hamo, tatu wa Shekeme, ku bituha lukama bia argent; buakalua buhianyi bua tunkanunuma tua Yosefe.

Lufu kua Eleazâ

³³ Eleazâ, muana mulume wa Alona, wakafua; bakamujika mu mukuna wa Pinehasa, muanʼandi mulume, wakamuhabo mu buloba bua Bena Efelayima.