Yoshua 22 - Mukanda wa Nzambi Dihungila Dikulukulu ne Dihungila Dihia-dihia 2003

Tshioshelu Tshiakasabo Kukala kua Yadene

¹ Yoshua wakabikila Bena Lubena ne Bena Gada ne tshituha tshia tshisamba tshia Bena Manashe,

² wakabambila ne, Nuenu nuakatumikila mei onso akanuambila Mose, muntu wa Yehowa, nuakunyua dî dianyi mu malu onso anakunuambila;

³ kanuakalekela bana benu matuku au onso tô ne ku dituku edi, kadi nuakatumikila mei a Yehowa, Nzambi wenu.

⁴ Katataka Yehowa, Nzambi wenu, wakaha bana benu dikisha bu muakabambileye; nunku nuhingane, yai bienu ku ntenta yenu, ku buloba bua buhianyi buenu, buakanuha Mose, muntu wa Yehowa, dishiya dia Yadene.

⁵ Nuikale ne dinanukila dia kutumikila mei ne mikenji biakanuambila Mose, muntu wa Yehowa, bua kusua Yehowa, Nzambi wenu, ne bua kuenda mu nshila yandi yonso, ne bua kutumikila mikenji yandi, ne bua kulamata kudiye, ne bua kumukuatshia mudimu ne mitshima yenu yonso ne mioyo yenu yonso.

⁶ Nunku Yoshua wakabandisha a disanka, wakalayangana nʼabo; bakaya ku ntenta yabo.

⁷ Mose wakamana kuha tshituha tshia tshisamba tshia Manashe buhianyi mu Bashana; kadi Yoshua wakaha tshituha tshiabo tshikuabo buhianyi dishiya dia Yadene ku wesete. Hakabatuma Yoshua ku ntenta yabo, hashishe yeye wakabandisha disanka,

⁸ wakabambila ne, Yai bienu ne biuma bia bungi ku ntenta yenu, ne bimuna bia bungi, ne tshiamu tshia argent ne or ne tshiamu tshia mitaku ne tshiamu tshifike, ne bilulu bia bungi; nuabanyangane ne bana benu bintu binuakanyenga kudi bena lukuna benu.

⁹ Bena Lubena ne Bena Gada ne tshituha tshia tshisamba tshia Bena Manashe bakumuka munkatshi mua Bena Isalele mu Shilo wa mu buloba bua Kanâna, bakaya ku buloba ba Gilada ku buloba bua buhianyi buakangatabo bu muakadi di dia Yehowa kudi Mose.

¹⁰ Hakafuabo ku luseke ludi hehi ne Yadene mu buloba bua Kanâna, Bena Lubena ne Bena Gada ne tshituha tshia tshisamba tshia Bena Manashe, bakasa tshioshelu ku Yadene, tshioshelu tshinene tshia dikema.

¹¹ Bena Isalele bakuabo bakunvua lumu ne, Bena Lubena ne Bena Gada ne tshituha tshia tshisamba tshia Manashe bakasa tshioshelu ku mukalu wa buloba bua Kanâna hehi ne Yadene ku luseke lua Bena Isalele aba.

¹² Hakunvua Bena Isalele lumu alu, tshisumbu tshionso tshia Bena Isalele aba tshiakadisangisha ku Shilo, bua kuluangana nʼabo.

¹³ Bena Isalele aba bakatuma Pinehasa, muana mulume wa Eleazâ muakuidi, kudi Bena Lubena ne Bena Gada ne tshituha tshia tshisamba tshia Bena Manashe,

¹⁴ bakamutuma ne bukelenge dikumi, mukelenge wa ku tshisamba mukelenge wa ku tshisamba; muntu ne muntu wakadi ku mutu bua binunu bia meku a Bena Isalele a mu tshisamba tshiandi.

¹⁵ Bakalua kudi Bena Lubena ne Bena Gada ne tshituha tshia tshisamba tshia Bena Manashe mu buloba bua Gilada, bakabambila ne,

¹⁶ Tshisumbu tshionso tshia bantu ba Yehowa tshidi tshianza ne, Bualu ebu bubi bunuakuenzela Nzambi wa Isalele budi munyi? Munyi munuakulekela kulonda Yehowa hanuakadiashila tshioshelu bua kutombokela Yehowa lelu?

¹⁷ Bualu bubi bua Peô budi bututamba bukese, anyi? Katuyi banze kudilengesha, tô ne ku dituku edi, bua mulau wakela Yehowa tshisumbu tshia bantu,

¹⁸ nuenu nudi basue kuhambuka lelu ne kuhanga kulonda Yehowa, anyi? Binuatombokela Yehowa lelu, makelela yeye neakuatshile tshisumbu tshionso tshia Bena Isalele tshiji.

¹⁹ Bikala buloba bua buhianyi buenu kabuyi buimpe, nusabuke mu buloba bua buhianyi bua Yehowa, kudi tshitendelelu tshia Yehowa, nuangate buhianyi munkatshi muetu; kadi kanutombokedi Yehowa anyi tuetu bua kudiashila tshioshelu tshikuabo ha mutu ha tshioshelu tshia Yehowa, Nzambi wetu.

²⁰ Akana, muana wa Zela, kakenza bualu bubi hakangateye tshintu tshia tshijila, ne mulau kawakakuata tshisumbu tshionso tshia Bena Isalele, anyi? Muntu au kakafua nkayandi bua bualu bubi buakenzeye.

²¹ Bena Lubena ne Bena Gada ne tshituha tshia tshisamba tshia Manashe bakambila bakadi ku mutu kua binunu bia Bena Isalele ne,

²² Nzambi Umue Munene, Yehowa, Nzambi Umue Munene, Yehowa, udi mumanye; Bena Isalele nebamanye biabo ne, Bikalaku ditomboka, anyi bikalaku buhidia bua kuhidia Yehowa, kanutusungidi lelu.

²³ Bituikala badiashile tshioshelu bua kuhambuka ne bua kuhanga kulonda Yehowa, ne bua kufila milambu ya kuoshilahu, ne milambu ya bukula ne milambu ya kuvuisha nʼai ditalala, Yehowa nkayandi ashikishe bualu.

²⁴ Tuakenza bualu ebu tuela meji ne, Halua matuku makuabo bana benu nebakonke bana betu ne, Nuenu nudi ne Yehowa, Nzambi wa Isalele, bualu, anyi?

²⁵ Bualu bua Yehowa wakateka Yadene bu mukalu hankatshi hetu nʼenu, nuenu Bena Lubena ne Bena Gada; kanuena ne buhianyi kudi Yehowa: nunku bana benu nebakande bana betu bua kutshinabo Yehowa.

²⁶ Nunku tuakuambilangana ne, Tudiashile tshioshelu, kambualu bua kuoshilahu nyama, anyi mulambu;

²⁷ kadi netshikale bu mumanyi wa bualu hankatshi hetu nʼenu, ne hankatshi ha milongo idi ilonda ku nyima kuetu, bua tuetu kuenzela Yehowa mudimu ku mpala kuandi ne milambu ya kuosha ne milambu yetu ya kuvuisha nʼai ditalala; ne bua bana benu kabambidi bana betu mu matuku alualua ku mpala ne, Nuenu kanuena ne buhianyi kudi Yehowa.

²⁸ Nunku tuakuambilangana ne, Hatuambilabo anyi hambilabo milongo idi ilonda ku nyima mei â, netuambe ne, Monai tshifuanyikishi tshia tshioshelu tshia Yehowa tshiakenza batatu betu, kambualu bua kuoshelahu milambu ya kuosha, anyi nyama mishiha; kadi tshidi bu mumanyi wa bualu hankatshi hetu nʼenu.

²⁹ Yehowa atukande bua katumutombokedi, katubambuki kudiye, katuhangi kumulonda, ne katuashi tshioshelu tshia milambu ya kuosha ne ya bukula, ne ya nyama mishiha, anu tshioshelu tshia Yehowa, Nzambi wetu, tshidi ku mpala kua tshitendelelu tshiandi.

³⁰ Pinehasa muakuidi, ne bukelenge ba tshisumbu tshia Bena Isalele bakadi ku mutu kua binunu bia Bena Isalele bakadi nʼandi hakunvuabo mei akabambila Bena Lubena ne Bena Gada ne Bena Manashe, bakadi ne disanka.

³¹ Pinehasa, muana wa Eleazâ, muakuidi, wakambila Bena Lubena ne Bena Gada ne Bena Manashe ne, Lelu tudi bamanye ne, Yehowa udi munkatshi muetu, bualu bua nuenu kanuakenzela Yehowa bualu bubi ebu: katataka nuakasungila Bena Isalele mu tshianza tshia Yehowa.

³² Pinehasa, muana wa Eleazâ, muakuidi, ne bukelenge bakumuka kudi Bena Lubena ne kudi Bena Gada mu buloba bua Gilada, bakahingana ku buloba bua Kanâna kudi Bena Isalele, bakabalondela mei kabidi.

³³ Bualu ebu buakasankisha Bena Isalele; Bena Isalele bakatumbisha Nzambi, kabakamba dî dikuabo bua kuluangana nʼabo, ne bua kubutula buloba buakadi Bena Lubena ne Bena Gada bashikama.

³⁴ Bena Lubena ne Bena Gada bakidika tshioshelu ne Ede, bualu bua hankatshi betu nʼabo tshidi bu mumanyi wa bualu ne, Yehowa udi Nzambi.