Yoshua 20 - Mukanda wa Nzambi Dihungila Dikulukulu ne Dihungila Dihia-dihia 2003

Misoko ya Kunyemena

¹ Yehowa wakambila Yoshua ne,

² Ambila Bena Isalele ne, Nudisunguile misoko ya kunyemena bu munakanutumina dî kudi Mose,

³ mushihi wa muntu mukuabo ku mpukahuka anyemenemu; neyikale tshinyemenu tshienu kudi musombuedi.

⁴ Yeye anyemene ku umue wa misoko ai, imane biandi ku tshibuelelu tshia musoko, ambile biandi bakulu ba musoko bualu buandi; bobo bamuteke mu musoko, bamuhe muaba, ashikame biandi munkatshi muabo.

⁵ Biamulonda musombuedi, kabafidi mushihi mu tshianza tshiandi, bualu bua yeye wakashiha mukuandi ku mpukahuka, kakadi nʼandi lukuna diambedi.

⁶ Yeye ashikame biandi mu musoko au tô ne himaneye ku mpala kua tshisumbu, bua kumulumbuluishabo bualu buandi, tô ne hafua muakuidi munene wa mu matuku au; hashishe mushihianganyi ahingane, alue ku musoko wandi, ne ku nsubu kuandi, ku musoko kuakadiye mumuke.

⁷ Bakasungula Kedeshe wa mu Galela wa mu mikuna ya Nafatale, ne Shekeme wa mu mikuna ya Efelayima, ne Kîyata-âba (dina dikuabo ne, Hebelone) wa mu mikuna ya Yuda.

⁸ Dishiya dia Yadene ku Yeleko ku esete bakasungula Besê wa mu tshihela tshia mu mpata wa tshisamba tshia Bena Lubena, ne Lamota wa mu Gilada wa mu tshisamba tshia Bena Gada, ne Golana wa mu Bashana wa mu tshisamba tshia Bena Manashe.

⁹ Ai mmisoko yakasunguilabo Bena Isalele bonso, ne benyi bakadi bashikama munkatshi muabo, bua muntu yonso washiha muntu mukuabo ku mpukahuka anyemenemu, kafu biandi ku tshianza tshia musombuedi, tô ne himaneye ku mpala kua tshisumbu.