Yoshua 17 - Mukanda wa Nzambi Dihungila Dikulukulu ne Dihungila Dihia-dihia 2003

¹ Ebu mbuhianyi bua tshisamba tshia Manashe, bualu bua yeye wakadi muanʼa bute wa Yosefe. Bualu bua Maki, muanʼa bute wa Manashe, tatu wa Gilada, wakaheta Gilada ne Bashana, bualu bua yeye wakadi tshilobo.

² Bakaha bana bakuabo ba Manashe tshituha tshiabo ku meku abo: bana ba Ahiezê, ne bana ba Heleka ne bana ba Aseliele ne bana ba Shekeme ne bana ba Hefê ne bana ba Shemida; aba mbana balume ba Manashe, muana wa Yosefe, ku meku abo.

³ Kadi Selofehada, muana mulume wa Hefê, muana mulume wa Maki, muana mulume wa Manashe, kakadi ne bana ba balume nansha, anu bana ba bakashi; au mmena a bana bandi ba bakashi: Mahala ne Noa ne Hogela ne Mileka ne Tîsa.

⁴ Bobo bakalua ku mpala kua Eleazâ muakuidi, ne ku mpala kua Yoshua, muana wa Nuna, ne ku mpala kua bakelenge, bakamba ne, Yehowa wakelela Mose mukenji bua kutuha buhianyi munkatshi mua bana betu: nunku yeye wakabaha buhianyi munkatshi mua bana babo ne tatu wabo bu mu dî dia Yehowa.

⁵ Bena Manashe bakangata bituha dikumi ha mutu ha buloba bua Gilada ne Bashana budi dishiya dia Yadene;

⁶ bualu bua bana ba bakashi ba Manashe bakangata buhianyi munkatshi mua bana bandi ba balume. Buloba bua Gilada buakadi bua bana ba balume bakuabo ba Manashe.

⁷ Mukalu wa Bena Manashe wakadi ku Ashê tô ne ku Mikemetata udi ku mpala kua Shekeme; wakayila ku tshianza tshia balume tô ku musoko wa Bena Ene-tapua.

⁸ Buloba bua Tapua buakadi bua Bena Manashe; kadi musoko wa Tapua wakadi ku mukaba wa Bena Manashe ngua Bena Efelayima.

⁹ Mukalu wakahueka ku musulu wa Kana ku sude kuau; bimenga ebi biakadi bia Bena Efelayima munkatshi mua bimenga bia Bena Manashe; mukalu wa Bena Manashe wakadi ku luseke lua nôde lua musulu, wakahatukila kukala kua mai manene:

¹⁰ luseke lua ku sude luakadi lua Bena Efelayima ne luseke lua ku nôde luakadi lua Bena Manashe, ne mai manene akadi mukalu wabo; mukalu wakafika tô ne ku Ashê ku nôde ne ku Yisakâ ku esete.

¹¹ Bena Manashe bakadi ne misoko ei munkatshi mua Bena Yisakâ ne Bena Ashê: Bete-sheana ne misoko yau, ne Yibelama ne misoko yau, ne Bena Dô ne misoko yabo, ne Bena Endô ne misoko yabo, ne Bena Tanaka ne misoko yabo, ne Bena Megido ne misoko yabo, ne mikuna isatu.

¹² Bena Manashe kabakamanya mua kuihata bena misoko ai; kadi Bena Kanâna bakahangidisha bua kushikama mu buloba abu.

¹³ Kadi hakaheta Bena Isalele bukole, bakalambuisha Bena Kanâna mulambu wa mudimu, kabakabihata mene.

¹⁴ Bana ba Yosefe bakambila Yoshua ne, Bualu kai wewe wakatuha anu tshituha tshimue bu buhianyi buetu, tuetu tudi bantu ba bungi bualu bua Yehowa wakatusankisha?

¹⁵ Yoshua wakabambila ne, Binuikala bantu ba bungi, yai bienu muitu nuditahile muaba mu buloba bua Bena Pelizi ne bua Bena Lefa; bualu bua buloba bua mikuna ya Bena Efelayima budi butamba bukese kunudi.

¹⁶ Bana ba Yosefe bakamba ne, Buloba bua ku mikuna kabuena butukumbana; Bena Kanâna bonso badi bashikama mu tshibanda badi ne makalu a biamu, ne badi mu Bete-sheana ne misoko ei ne badi mu tshibanda tshia Yizelele.

¹⁷ Yoshua wakambila ba mu nsubu wa Yosefe, Bena Efelayima ne Bena Manashe, ne, Nuenu nudi bantu ba bungi, nudi ne bukole bua bungi, kanuena anu ne tshituha tshimue:

¹⁸ kadi buloba bua ku mikuna nebuikale buenu; ditu didiku, kadi nenuditahe, ne muaba au newikale wenu; nudi mua kuihata Bena Kanâna nansha bobo ne makalu a biamu nansha bobo ne bukole.