Yoshua 16 - Mukanda wa Nzambi Dihungila Dikulukulu ne Dihungila Dihia-dihia 2003

Buhianyi bua Efelayima ne Manashe

¹ Bana ba Yosefe bakangata buhianyi buabo ku Yadene ku Yeleko, ku mai a Yeleko ku esete, ne tshihela tshidi tshijima ku Yeleko tô ne ku mukuna wa ku Betele;

² mukulu wakafumina ku Betele ku Luze, wakaya ku butshika bua Bena Akâ ku Atalota;

³ wakahueka ku wesete ku mukalu wa Bena Yafelete, ku butshika bua Bete-holona udi kumanda tô ne ku Gezê; kunshikidilu kua mukalu kuakadi kukala kua mai manene.

⁴ Bana ba Yosefe, Manashe ne Efelayima, bakangata buhianyi buabo.

⁵ Au mmukalu wa Bena Efelayima ku meku abo; mukalu wa buhianyi buabo bua ku esete wakadi Atalota-adalâ tô ne ku Bete-holona udi ku mutu;

⁶ ne mukalu wa ku wesete wakahatuka ku Mikemetata ku nôde, ne mukalu wakanyunguluka ku esete ku Tânata-shilo, wakaya ku esete kua Yanoa;

⁷ wakahueka ku Yanoa ku Atalota ne ku Nâla tô ne ku Yeleko, wakahatuka ku Yadene.

⁸ Mukalu wakayila ku wesete kua Tapua ku musulu wa Kana; wakahatuka kukala kua mai manene. Ebu mbuhianyi bua tshisamba tshia Bena Efelayima ku meku abo;

⁹ ne bimenga biakatahuluilabo Bena Efelayima munkatshi mua buhianyi bua Bena Manashe; ne bimenga bionso ne misoko yabi.

¹⁰ Kabakihata Bena Kanâna bakadi mu Gezê: kadi Bena Kanâna batshidi bashikama munkatshi mua Bena Efelayima tô ne ku dituku edi, bakatua bu bahika babo ba mudimu.