Yoshua 14 - Mukanda wa Nzambi Dihungila Dikulukulu ne Dihungila Dihia-dihia 2003

Badi Batahulula Buloba bua Kanâna ku Nshobo

¹ Au mmahianyi akangata Bena Isalele mu buloba bua Kanâna, akababanyinabo kudi Eleazâ muakuidi, ne Yoshua, muana wa Nuna, ne kudi bakadi ku mutu kua meku a batatu a mu bisamba bia Bena Isalele;

² bakatahulula muhianyi abo ne nshobo, bu muakambila Yehowa Mose, bua bisamba tshitema ne bua tshituha tshia tshisamba.

³ Bualu bua Mose wakamana kuha bisamba bibidi ne tshituha buhianyi buabo dishiya dia Yadene; kadi yeye kakaha Bena Lewi buhianyi munkatshi muabo nansha.

⁴ Bualu bua bana ba Yosefe bakadi bisamba bibidi, Manashe ne Efelayima: kabakaha Bena Lewi buhianyi mu buloba, anu misoko ya kushikamabo ne miaba ya kudishabo bimuna biabo ne ya kutekabo bintu biabo.

⁵ Bena Isalele bakenza bu muakambila Yehowa Mose; bakabanya buloba.

Hebelone Udi Buhianyi bua Kaleba

⁶ Bena Yuda bakalua kudi Yoshua mu Gilegala. Kaleba, muana wa Yefune, Muena Kenizi, wakamuambila ne, Wewe udi mumanye bualu buakambila Yehowa Mose, muntu wa Nzambi, bualu buanyi ne bualu buebe mu Kadeshe-bânea.

⁷ Nakatshidi bidimu makumi anai hakantuma Mose, muntu wa Yehowa, ku Kadeshe-bânea bua kutentekela buloba; nakahingana kudiye kabidi ne dî diakadi mu mutshima wanyi.

⁸ Bana betu batuakaya nʼabo bakatekesha mitshima ya bantu; kadi meme nakalonda Yehowa, Nzambi wanyi.

⁹ Mose wakaditshiha dituku adi ne, Bulelela, buloba buwakadiata makasa ebe nebuikale kûdi ne kudi bana bebe bu buhianyi tshiendelele, bualu bua wewe wakalonda Yehowa, Nzambi wanyi mene mene.

¹⁰ Katataka mona, Yehowa wakundama ne ntshidi ne muoyo, bu muakambeye tô bidimu ebi makumi anai ne bitanu, ku dituku diakambila Yehowa Mose dî adi, hakadi Bena Isalele bendakana mu tshihela: lelu ndi ne bidimu makumi muanda mukulu ne bitanu.

¹¹ Ntshidi ne bukole lelu, bu munakadi nʼabu dituku diakantuma Mose; bu muakadi Bukole buanyi dituku adi, mbu mutshidibu katataka, bua kuluangana nvita ne bua kuya ne bua kuhingana.

¹² Katataka Umpe bianyi luseke elu lua ku mikuna, bu muakamba Yehowa dituku adi; bualu bua wewe wakunyua dituku adi bu muakadiku Bena Anaka, ne misoko minene ya ngumbu; bikala Yehowa nʼanyi, nembihate, bu muakamba Yehowa.

¹³ Yoshua wakamuvudishila disanka; yeye wakaha Kaleba, muana wa Yefune, Hebelone bu buhianyi.

¹⁴ Nunku Hebelone wakalua buhianyi bua Kaleba, muana wa Yefune, Muena Kenizi, tô ne ku dituku edi; bualu bua yeye wakalonda Yehowa, Nzambi wa Isalele mene mene.

¹⁵ Dina dia Hebelone diambedi diakadi Kîyata-âba; muntu eu Aba wakatamba balume bonso ba munkatshi mua Bena Anaka. Buloba buakashala talalâ, kakuyi nvita.