Yobe 9 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Kena Mumanye mua Kuitaba kudi Nzambi

¹ Hashishe, Yobo wakamukudimuna ne,

² Ndi mumanye bimpe ne, Bualu ebu mbulelela; kadi muntu neamanye mua kuikala muakane ku mpala kua Nzambi munyi?

³ Biasueye kuelangana nʼandi mpata, kena mumanye mua kuitaba ku dikonka dimue munkatshi mua makonka tshinunu.

⁴ Yeye udi ne meji mu mutshima, ne udi ne bukole buhite, muntu kai wakukolesha mutshima wandi ku mpala kuandi ne wakutula dikasa dimpe?

⁵ Yeye udi umusha mikuna minene kayiyi mimanye bualu, hayikudimuneye mu tshiji tshiandi.

⁶ Udi uzakasha buloba, ubûmusha mu muaba wabu, ne bishimikidi biabu bidi bikanka.

⁷ Udi welela diba mukenji, ne kadiena dibanda, udi ubuikila mitoto, utekahu tshimanyishilu tshiandi.

⁸ Udi uvungulula bintu bia mu diulu nkayandi, udi wenda ha mavuala a mu mai manene.

⁹ Udi ufuka mitoto ya Ourse Munene, ya Nyama ne Mbua ne Muntu ne ya Tshidiminanzashi, ne mitoto ya ku sude.

¹⁰ Udi wenza malu manene ne adi bantu kabayi bamanye mua kujingulula, udi wenza malu a kukema adi kâyi mua kubadibua.

¹¹ Tangila, yeye udi uhita hehi nʼanyi, tshiena mmutangila nansha, udi utambaku, tshiena mmumona to.

¹² Tangila, bîanyengeye tshintu, udi mua kumukanda nganyi? Muntu kai udi mua kumukonka ne, Udi wenza tshinyi?

¹³ Nzambi kena ukanda tshiji tshia ndi; bakuatshishi ba Lahaba badi binama ku mpala kuandi.

¹⁴ Nunku meme hanyi ndi mua kuandamuna dî kudi kunyi anyi kusungula mei bua kuelangana nʼandi mpata?

¹⁵ Bu meme muikale muakane, tshiakadi kumanya mua kumufuisha; nakadi kutendekena mulumbuluishi wanyi.

¹⁶ Bu meme mumubikile ne bu yeye muitabe kundi, tshiakadi kuitabusha ne, Yeye udi mua kunvua dî dianyi.

¹⁷ Bualu bua yeye udi mutshibula ne tshihehele, udi uvudisha mputa yanyi tshiyi ne bualu.

¹⁸ Kena witabusha bua meme kueyela, kadi udi ûsha mutshima wanyi tente ne bululu.

¹⁹ Bituakula bua bukole, monai, yeye udi muhite bukole! Bituakula bua kulumbulula kuakane, yeye udi wamba ne, Wambikila nganyi?

²⁰ Bingikala mubinge, mukana mua nyi nemumpishe; bingikala muakane, nemungambile ne, Udi ne bualu bubi.

²¹ Meme muakane! Tshiena mua kudimanya nkayanyi; muoyo wanyi udi untondesha.

²² Malu au onso adi muomumue kundi—nunku ndi ngamba ne, Yeye udi ushiha bantu bakane ne bantu babi.

²³ Biashiha tshihuhu bantu lubilu, yeye udi useka bua dikenga dikole dia bantu badi kabayi ne tshilumbu.

²⁴ Buloba budi bufidibua mu bianza bia bantu babi; yeye udi ubuikila mesu a balumbuluishi babu. Bikaleye kayi wenza nunku,— udi wenza bualu ebu nganyi?

²⁵ Matuku anyi adi ahita luendu lua messager lubilu, adi anyema lubilu, kaena atangila diakalengele.

²⁶ Adi ahita bu mudi matu a ntuhu enda, bu nyunyu wa mukanku udi wauka ha tshintu tshia kubakuleye.

²⁷ Bingamba ne, Nempue meji adi annyingalasha muoyo, nendekele kubungama kuanyi, nengikale ne disanka,

²⁸ ndi ntshina makenga anyi onso, ndi mumanye ne, Wewe kuena umbingisha.

²⁹ Nempishibue; nunku ndi ukuata mudimu hatuhu bua tshinyi?

³⁰ Binowa ne neige, binatokesha bianza bianyi ne binshindimba,

³¹ wewe neungele mu mutubu wa bintampi kabidi, ne bivualu bianyi mene nebindengulule.

³² Bualu bua yeye kena muntu bu meme bua meme kumukudimuna dî, bua tuetu kulua hamue mu tshilumbuluidi.

³³ Kakuena musungi hankatshi betu udi mua kutulenga bubidi buetu tshianza.

³⁴ Umushe biandi mulangala wandi kundi, ne buowa buandi kabuntshinyishi;

³⁵ hashishe, nakadi kuakula ne tshia kadi kumutshina, bualu bua tshiena bu muntu ngikala.