Yobe 8 - Mukanda wa Nzambi Dihungila Dikulukulu ne Dihungila Dihia-dihia 2003

Biledada Udi Ukolesha ne, Nzambi Udi Ulumbulula Biakane

¹ Hashishe, Biledada, Muena Shuhi, wakakudimuna Yobo ne,

² Wewe newambe mei â musangu bule bishi? Mei a mukana muebe neikale bu tshihehele tshikole musangu bule bishi?

³ Nzambi udi ukonyangasha kulumbulula kuakane, anyi? Wa Bukole Buonso udi ukonyangasha buakane, anyi?

⁴ Bikala bana bebe bamuenzele bibi, yeye wakubafila mu dikenga dikole bua bubi buabo;

⁵ biwasua kukeba Nzambi ne disuminyina, biwasua kulomba Wa Bukole Buonso ne disengelela diebe,

⁶ biwikala ne mutshima mutoke, biwikala muakane; bulelela, yeye neabike bua kukukuatshisha mu bualu buebe, neahingashe diakalengele ku nsubu webe wa buakane.

⁷ Nansha bikala tshibangidilu tshiebe tshikese, nshikidilu webe neahite bunene.

⁸ Ndi nkusengelela bua kukonka bantu ba mu milongo ya kale, teka mutshima webe ku malu akakeba batatu babo kujingulula.

⁹ Bualu bua tuetu ludi anu bu bantu bakalelabo makelela, katuena bamanye bualu, bualu bua matuku etu a ha buloba adi anu bu mundidimbi.

¹⁰ Bobo kabena bakuyisha, kabena bakuambila, kabena bamba mei a mu mitshima yabo, anyi?

¹¹ Lutuhu ludi mua kudiunda bimpe hadi kahayi lunteke, anyi? Disele didi mua kudiunda hadi kahayi mai, anyi?

¹² Hatshididi dihia-dihia, kabayi banze kudikosa, didi ditamba midioko yonso kufubidila lubilu.

¹³ Nshikidilu wa bonso badi bahua Nzambi muoyo udi nunku; ne ditekemena dia muntu udi ubenga Nzambi didi difua;

¹⁴ bualu bua ditekemena diandi didi dijimina, ne tshieyemenu tshiandi tshidi bu butande.

¹⁵ Yeye udi weyemena nsubu wandi, kadi nsubu kena ushindama; neamuobokele ne bianza biandi, kadi kena ukandamana.

¹⁶ Yeye udi bu mudioko mubishi mu munya, ntonga yandi idi ilamba mu tshibidi tshiandi.

¹⁷ Miji yandi idi ijingila ku mushiki wa mabue, ne yeye udi udiunda munkatshi mua mabue.

¹⁸ Biamubutulabo mu muaba wandi, muaba eu neumubenge ne, Tshiena muanze kukumona.

¹⁹ Tangila, edi ndisanka didiye nʼadi mu nshila wandi! Ne bakuabo badi batoloka mu buloba kabidi.

²⁰ Bulelela, Nzambi kena uhidia muntu udi muakane tshishiki, kena ujadika benji ba malu mabi.

²¹ Yeye neanji kûsha mukana muebe ne tuseku ne mishiku yebe ne mbila ya disanka.

²² Bena lukuna bebe nebafuishibue bundu, ne ntenta wa bantu babi kena wikalaku kabidi.